Friday, January 06, 2012

Ilang poste ng streetlights sa Boracay, hindi nanaman umiilaw

Ni Edzel Mainit, Senior Field Reporter, YES FM Boracay

Matapos ang Pasko at pormal nang pailawin ang mga Streetlights sa Boracay makaraang batikusin ito ng publiko dahil matagal bago mapa-ilaw.

Ilang araw palang ang nakakalipas, sa ngayon may ilang poste ng street lights na ito ang hindi nanaman umiilaw.

Kung saan, may bahagi ng street lights na ito partikular sa Station 1 ay hindi nanaman gumagana ngayon sa kabila ng ginawang pagkukumpuni dito nitong nagdaang buwan ng Disyembre.

Subalit sa panayam kay Island Administrator Glenn Sacapaño kaugnay sa usaping ito, sinabi nito na ipagbibigay alam niya ang bagay na ito sa Engineering Department ng LGU Malay para maayos habang maaga pa.

Samantala, aminado naman ang naturang administrador na may ilang bahagi talaga ng streetlights na ito ang hindi pa napapa-ilaw, at tinukoy nito na ang sa harap ng Don Ciriaco Tirol Hospital  ay hindi pa naman talaga iyon napapa-ilaw sapagkat may dapat pang-ayusin.

Ngunit sa kawalan ng ilaw ng ilang poste, may mga panahon ding buong araw umiilaw ang mga streetlights na ito kahit nakatirik na ang araw.

Matatandaang, bago ang Pasko ay pinailaw na ang street lights na ito, at naglaan na rin ng pondo ang lokal na pamahalaan ng Malay para sa buwanang bayarin sa kuryente.

Seguridad sa Boracay Ati-atihan, pinaplantsa na

Ni Edzel Mainit, Senior Field Reporter, YES FM Boracay

Dahil sa dalawang araw nalang, Ati-atihan na rin sa Boracay.

Dahil dito, ngayong hapon ay nakatakdang plantsahin ang lahat ng detalye kaugnay sa pagdiriwang, partikular na seguridad ng publiko na makikibahagi sa naturang selebrasyon.

Bagamat okasyon ito ng simbahan at may mga plano na rin ukol dito, pag-uusapan pa rin mamaya ang ruta ng parade o “sadsad” ng mga tribu at ang mga lugar na madadaanan nito.

Kasama din sa magpaplano para sa selebrasyon mamaya na ipinatawag ng tanggapan ng Alkalde ng bayang ito si Fr. Magloire “Adlay “ Placer, Kura Paroko ng Holy Rosary Parish Church, ang hepe ng Boracay Pulis, opisyal ng Philippine Army, at mga Non-Government Organizations na katuwang ng awtoridad para masiguro ang kaligtasan ng mga makikisaya.

Samantala, dahil sa pagdiriwang na ito ay magiging mabigat na naman ang trapik sa isla partikular sa mainroad dahil sa inaasahang pagdagsa ng mga bisita na makibahagi sa okasyon, kung kaya’t isa ito sa mga tatalakayin sa pulong na gagawin mamaya.

Mga artista at iba pang personalidad sa Aklan, tampok sa coronation Night ng “Mutya ag Lakan it Kalibo Ati-atihan 2012”

Ni Edzel Mainit, Senior Field Reporter, YES FM Boracay

Inaasahang magiging makulay mamayang gabi ang gaganaping Coronation Night ng Mutya ag Lakan it Kalibo Ati-atihan 2012.

Dahil maliban sa labing-anim na magagandang kandidata ng Aklan at labing-anim na makikisig at matitipunong kalahok sa Lakan, bibigyang kulay din ang koranasyon ng ilang artista, na makikibahagi ng nasabing patimpalak.

Maghaharana sa mga kandidata ang singer na si Kris Lawrence, at kabilang din si Bella Padilla na talent ng isang higanteng TV Network sa mga hurado ng pageant, kasama na sikat na fashion designer ng 0bansa Renee Salud, at ang ilan pang opisyal ng probinsiya kasama ang maybahay ni Malay Mayor John Yap na si Abigail Humady-Yap.

Mga disenyo naman ni Renee Salud ang ipaparada ng mga kandidata sa long gown competition ngayong gabi.

Samantala, matapos ang kompetisyon, lulusubin naman ng mga nagwagi sa Mutya at Lakan it Kalibo Ati-atihan 2012 ang isla ng Boracay, dahil kasama sa mga matatanggap nilang premyo sa patimpalak maliban sa pera, at mga prudukto ng sponsors ay magkakaroon din ang mga ito ng akomodasyon para sa bakasyon sa Boracay.

Ang Coronation Night ng Mutya at Lakan it Kalibo Ati-atihan 2012 ay pormal na mapapanuod mamayang las syete ng gabi sa bayan ng Kalibo sa ABL Sports Complex.

Matatandaang, nitong nagdaang a-diyes ng Disyembre ginanap dito sa Boracay ang Swim Suit Competition, samantala sa bayan ng Kalibo naman isinagawa ang Talent Night noong ika dalawangput tatlo ng nasabing buwan.

Thursday, January 05, 2012

Licensing at Assessment Department ng Malay, nagbigay ng paalala


Ni Edzel Mainit, Senior Field Reporter, YES FM Boracay

Nagbigay-paalala ngayon ang Licensing at Assessment Department ng Malay, na para mapadali at hindi sumablay ang pagahahanda sa mga kakailanganin sa pag-renew ng business permit, dapat unahin aniya ang pagkuha ng Health Certificate ng mga empleyado sa mga establishimiyento lalo kung ang mga ito ay konektado o nagtatrabaho sa restaurant.

Sapagakat ayon kay Alicia Manlabao, Local Treasury Operation Officer II at In-charges sa Assessment at Licensing Department ng Malay,  ito aniya ang pinakahirap kunin dahil limitado lamang din ang kayang bigyan ng certificate ng Health Center sa isang araw ng kanilang operasyon.

Maliban aniya dito, naka-iskedyul umano ang pagkuha nito, kaya para mas madali ang pagpoproseso ay mainam na unahin ito.

Samantala, dahil sa matagal na ring isyu at marami ang nagtatanong kung kailangan pa bang kumuha ng Heath Certificate ang mga empleyadong hindi naman nagtatrabaho sa restaurant, nilinaw ni Manlabao na kailangan pa ring lahat ay kumuha at hinahanap ito sa assessment bilang requirement sa pagkuha o pagre-renew ng mga business permits, kahit hindi food handler ang isang indibidwal.

Ang paaalala na ito ni Manlabao ay may kaugnayan sa inaasahang pahirapan na naman ang pagkuha at paghahanda sa requirement para sa business permit ngayong buwan.

Pagpoproseso at pagre-renew ng business permits, simula na


Ni Edzel Mainit, Senior Field Reporter, YES FM Boracay

Anumang oras ay pwede nang makapag-apply o mag-renew ng Business Permits, basta’t kumpleto na umano ang mga requirement na hinihingi sa pagpoproseso.

Ito ang inihayag ni Alicia Manlabao, Local Treasury Operation Officer II at In charges sa Assessment at Licensing Department ng Malay.

Aniya, nagsisimula na silang tumanggap basta ang mga kakailanganing dokumento ay handa na rin, lalo na kung hawak na ang total gross sale ng magre-renew.

Ayon kay Manlabao, hanggang Enero 20, 2012 ang itinakda sa pagpoproseso batay sa nakasaad sa Revenue Ordinance.

Pero maaari naman aniyang ipagpaliban ang deadline, iyon ay kung nakita at magpasa ng resolution ang Sangguniang Bayan ng Malay para sa extension.

Ngunit magkaganon man, dahil sa itinakda na ang January 20 at nasa batas ito, kahit may extension pa ay magbabayad pa rin umano ng penalidad at surcharges ang mga hindi nakahabol sa takdang petsa.

Samantala, gayong inaasahang na dadagsa ang magre-renew at kukuha ng permit, nag-paalala si Manlabao na mas mainam kung agahan ang pag-proseso.

Kaugnay nito, inihayag din ng opisyal na maaari naman mag-proseso ng permit sa Action Center sa isla, subalit kung masyadong abala doon ay maari din umanong gawin ang pagpoproseso sa mainland.

Barkong pang-RoRo sa Caticlan, wala ng overloading


Ni Edzel Mainit, Senior Field Reporter, YES FM Boracay

Wala nang oveloading ngayon sa mga pasahero ng Roll-on Roll Off (RoRo).

Ayon kay Caticlan Jetty Port Nieven Maquirang, ito ay dahil 70 at 30% scheme na ipinapatupad sa mga barkong pang-RoRo sa Caticlan sa kasalukuyan.

Napaloob sa scheme na ito na sa bawat barkong maglalayag, dapat ay 70% sa kapasidad o pasahero nito ay magmumula sa mga kumpaniya ng bus na isinasakay sa barko sa Jetty Port.

Ang natitirang 30% naman ng kapasidad nito ay dapat ilalan sa mga walk-in passengers o pasahero mula mismo sa Caticlan katulad ng mga turista at bakasyunista sa Boracay.

Aniya, dapat ding bigyan ng pagkakataon na makasakay ang mga pasahero mula sa isla at hindi puro pasahero lang ng kompanya ng bus mula sa iba’t ibang probinsiya.

Maliban dito, bilang na rin aniya ngayon ang pinapasakay sa mga barko, dahil na rin sa tulong ng turnstile na inilagay sa pantalan kaya bawat daan doon ng pasahero at bilang din.

Sabay-sabay na pagdiriwang ng Ati-atihan sa Aklan, pinaghahandaan na ng APPO


Ni Edzel Mainit, Senior Field Reporter, YES FM Boracay

Maaga pa lang ay pinahandaan na ng Aklan Police Provincial Office (APPO) ang sabay-sabay na pagdaraos ng festival sa iba’t ibang bayan sa Aklan ngayon Enero.

Dahil dito, unang linggo pa lang ng Enero, ayon kay Police Senior Supt. Cornello Defensor, Provincial Director ng APPO, nag-request na sila ng mga karagdagang Pulis mula sa Regional Office na dumating na nitong a-tres ng Enero.

Aniya, ginawa nito ang nasabing hakbangin para paghandaan ang selebrasyon ng Ati-Atihan na sabay-sabay na ipinagdiriwang ngayong buwan.

Maliban kasi sa Ati-Atihan Festival sa bayan ng Kalibo na buong linggong ipinagdiriwang kahit ang karawan ay sa a-katorse at a-kinse pa ng Enero, sumabay din sa katulad na petsa ang pagdiriwang ng selebrasyon sa mga bayan ng Batan, Makato, at Malinao, kaya dapat maaaga pa ay may mga plano na at makapag-lagay na ng mga karagdagang pulis sa mga lugar na ito.

Ngunit hindi lamang sa mga nabanggit na lugar ipagdiriwang ng Ati-atihan, dahil sa ika-walo ng Enero sa darating na linggo ay magpapadala din umano ito ng mga pulis sa selebrasyon ng Ati-Atihan sa Boracay at sa huling linggo ng buwang ito sa bayan din ng Ibajay.

Sa kasalukuyan bilang paghahanda sa mga selebrasyong ito, sinabi ni Defensor na ang kanilang layunin ay upang mag-assist sa mga bayang nabanggit, magkaroon ng check point at visibility patrol.

Dagdag pa ng opisyal, maliban sa mga naunang nang dumating ay may inaasahan pang karagdagang tropa ang ipapadala mula ng Regional Office para maging katuwang ng mga pulis dito sa Aklan.

Nais din umano ni Defensor na maitama ang maling paghahanda kumpara sa mga nagdaang Ati-atihan kung seguridad ang pag-uusapan.

Kalibo Ati-Atihan Products Expo 2012, target makahatak ng turista


Ni Edzel Mainit, Senior Field Reporter, YES FM Boracay

Naghahanda na ang Department of Trade and Industry (DTI) Aklan ng produktong tampok sa gaganaping Kalibo Ati-atihan Products Expo 2012 na magsisimula sa ika-siyam hanggang ika-labing anim ng Enero ng taong kasalukuyan.

Target ng Expo 2012 na ipakita at i-promote sa mga bisita, turistang dayuhan man o lokal ang mga produktong Aklanon, mula sa kagamitan sa bahay, pang-regalo, koleksiyon at hanggang sa mga process foods na siyang ipinagmamalaki ng probinsiya ito.

Ayon sa DTI Aklan, tampok sa nasabing expo ang mga likha ng dalawangpu’t-walong micro, small at medium enterprises, kung saan ang mga bagay na kasama sa exhibit ay mga gamit na gawa  sa kawayan, bariw, kahoy, abaka, pinya, papel at iba pang bagay na ginawa gamit lamang ang kamay mula sa mga materyales na organic.

Target din ng exhibit na ito na maging isa sa mga sentrong atraksiyon sa gaganaping Kalibo Ati-atihan Festival sa pag-diriwang ng Kapistahan ni Sr. Sto. Niño.

Matatandaang taon 2011 ay nagkaroon din ng Expo sa Kalibo Pastrana Park at dinumog naman ito ng mga turista, lalo na at ang mga ipinakita dito ay hindi lamang para sa mata, kundi ang mga bagay na ito ay ipinagbibili din.

Dahil dito, umaasa ang DTI Aklan at Kalibo Sto. Niño Ati-Atihan Foundation Inc. (KASAFI) na maging matagumpay uli ang expo ngayong taon sa suporta at pagtangkilik ng mga turista.

Tuesday, January 03, 2012

Biktima ng paputok sa Aklan ngayong nagdaang Bagong Taon, tumaas

Ni Edzel Mainit, Senior Field Reporter, YES FM Boracay

Tumaas ng apat ang naitalang nabiktima ng paputok ngayong bagong taon sa probinisya ng Aklan, batay sa rekord ng Aklan Police Provincial Office (APPO).

Kung saan ayon kay P/Senior Supt. Cornelio Defensor, Provincial Director ng APPO, noong nagdaang taon ay nakapagtala lamang ng tatlong biktima, subalit  nitong New Years eve sa pagsalubong ng  taong 2012 umabot na sa pito sa naitala hanggang sa ngayon.

Nabatid mula kay Defensor na dalawa sa mga biktimang ito ay nagmula sa bayan ng Kalibo, tag i-isa naman ay mula sa mga bayan ng New Washington, Numancia, Malinao, Altavas at Tangalan.

Samantala, nagpasalamat naman ang Provincial Director dahil walang naitalang nabiktima ng ligaw na bala o kahit indiscriminate firing manlang sa pagsalubong sa 2012.

Aniya patunay lamang ito na hindi nagpaputok ng baril ang mga Pulis, at maging ang mga Army o sundalo nitong Bagong Taon.

Samantala, wala naman naitala nabiktima ng paputok nitong Pasko ayon dito.

Sa kabilang banda, nitong umaga, sabay sabay na rin tinangal ng Pulis Director sa Aklan ang mga tape na nilagay sa dulo ng mga baril ng Pulis, para masigurong hindi nila ito magagamit magpaputok sa pagsalubong sa bagong taon. 

Pagsalubong sa Bagong Taon, naging mapayapa

Ni Edzel Mainit, Senior Field Reporter, YES FM Boracay


Bagamat nakapagtala ng pitong biktima ng paputok nitong nakaraang pagdiriwang ng Bagong Taon, napanatiling matagumpay at mapayapa pa rin ang pagsalubong sa taong 2012 sa kabuuang probinsiya ng Aklan, batay sa assessment ng Aklan Police Province Office (APPO), sa ginawa nilang pagbabantay o pag-monitor kaugnay sa malaking selebrasyong ito.

Sa panayam kay P/Senior Supt. Cornelio Defensor, Provincial Director ng APPO nitong umaga, inihayag nitong, kahit mayroong ilang naitalang insidente, naniniwala parin itong tahimik at ligtas na dinaos ang nagdaang Pasko at bagong taon sa Aklan.

Ayon kasi dito, simula a-trenta y uno ng gabi ng Disyembre hanggang mag-umaga ng a-uno ay walang naitalang kung anong insidente.

Subalit nagimbal sila noong bandang hapon na, sapagkat may nangyaring tatlong kaso ng pamamaril mula mga bayan sa Aklan at kasama na nga dito ang nagyaring aksidenteng pagkabaril sa isang 67-anyos na lalake sa Boracay.

Gayon pa man, ang mga kasong ito ng pamamaril ay maikukunsidera naman aniyang naresolba na, dahil natukoy naman ang mga salarin at nakahandang sampahan ng kaso.

Hindi rin umano maitatangi na may mga natanggap silang reklamo ng pananakit o physical Injury sa kasagsagan ng pagdiriwang, dala at epekto ng alak sa mga suspek.

Samantala ngayong unang linggo ng 2012, bagamat wala pa namang bagong programa para sa Kapulisan sa Aklan, hiling naman ni Defensor na sana ay isadiwa, isa-puso at siyang ipalaganap ng mga Pulis dito Aklan ang nakasaad sa “PNP Hymn” sapagkat  ang mga katulad nilang awtoridad lang din umano sa Aklan ang makakapagbigay ng siguridad at proteksiyon sa mga mamamayan sa probinsiyang ito.

Boracay, “zero casualties” sa paputok; accidental firing, naitala ngayong Bagong Taon

Ni Edzel Mainit, Senior Field Reporter, YES FM Boracay

Malugod na ikinatuwa ng pulis sa Boracay dahil nakamit muli sa isla ang “zero casualty” sa paputok sa pagsaulubong ng Bagong Taon nitong New Year’s Eve hanggang sa kasalukuyan.

Subalit, hindi naman nakaligtas ang isang 67-anyos na lalaki sa bala, mula sa baril ng tricycle driver nitong bagon taon sa Sitio Bantud, Mano-manoc.

Ayon sa PO2 Aven Dela Cruz, sa imbestigasyon nito, ay nililinis ni Jaser Salvador, isang tricycle drive,r ang kanilang Homemade o paltik na baril, nang bigla itong pumutok, at natamaan ang 67-anyos na si Leonsito Reoja habang pababa ng hagdan.

Nagtamo ng tama ng bala ang matanda sa binti, na kung saan, pinapaniwalaang pumasok ito sa kanang binti at tumagos naman sa kaliwang binti.

Kasalukuyan itong ginagamot sa isang pribadong pagamutan sa bayan ng Kalibo, at ang supek ay hawak ng awtoridad.

Subalit, nabatid mula kay P02 Dela Cruz, na hanggang sa ngayon ay hirap pang magsalita ang biktima kaya hindi pa ito nakukunan ng salaysay.

Dahil dito, gayong hindi pa masasampanahan ng kaso ng suspek, posibleng pansamantalang palayain ito ng awtoridad, at maaaring mahulog sa regular filling ang kaso.

Ang suspek at biktima ay magkasama rin sa bahay dahil halos ampon na rin ng 67-anyos ang suspek sa tagal na pamamalagi nito sa tirahan ng biktima.

Samantala, maliban sa insidenteng naitalang ito kasabay sa pagdiriwang ng bagong taon, may ilang aksidente rin sa kalye ang nai-rekord ng himpilang ng Boracay Pulis, gayong din ilang reklamo ng pananakit dala ng nakakalasing na inumin ang naitala nitong nagdaang a-uno ng Enero taong 2012.

Isla ng Boracay, “zero casualties” sa mga paputok at “indiscriminate firing”

Malbert Dalida, News Director, YES FM Boracay

Nitong nagdaang kapaskuhan at bagong taon, Zero casualty sa mga paputok at indiscriminate ang isla ng Boracay.

Ito ang kinumpirma ni Psupt. Gustilo Jr., hepe ng Boracay police station.

Aniya, walang naitalang malalaking insidente ng kriminalidad sa Boracay nitong kapaskuhan at bagong taon.

Idinagdag naman ni PO2 Freginer Jose Decio, imbistigador ng Boracay PNP. Kung may mga naitalang umano’y nabibiktima ng salisi o di kaya’y mga nawawalan ng mga kagamitan partikular sa baybayin ng Boracay. Karamihan umano sa mga ito ay mga dayuhang turista na kadalasa’y nabibiktima dulot ng kalasingan.

Kinumpirma din nito na walang naitalang biktima ng indiscriminate firing o nabiktima ng mga ipinagbabawal na paputok sa isla. 

Samantala, nagpaabot naman ng pagpapasalamat si Psupt. Gustilo sa lahat ng mga tumulong at kooperasyon ng kumunidad sa naging mapayapang kapaskuhan at bagong taon sa isla ng Boracay.