Saturday, April 27, 2013

Mga kandidato sa Aklan na nagkakalat ng mga poster, inabisuhan na ng Comelec

Ni Edzel Mainit, YES FM Boracay

Aaasahang nagkakaraoon pa umano ng “Operation Baklas” ng mga poster ng pulitoko ang Comelec sa Aklan.

Ito ang inihayag ni Jetulio Esto ng Comelec Aklan, kung saan sa ngayon ay marami na umano silang kandidato sa probinsiya na napadalhan na ng sulat para sila na mismo ang bumaklas ng kanilang mga poster at campaign paraphernalia.

Sa oras umano na hindi natangal ng mga pulitikong ito ang kanilang mga campaign materials, ang Comelec na mismo umano ang magbabaklas nito kahit hindi pa tapos ang election.

Nilinaw din nito na mariing ipinagbabawal ang paglalagay ng anumang naglalakihang larawan ng kandidato sa labas ng mga paaaralan kung saan isasagawa ang botohanm at maging sa mga daanan man.

Sapagkat ang designated common poster area lamang umano na diniklara ng komisyon ay ang mga public plaza.

Kaya ang mga poster na wala doon ay maikukonsiderang iligal at dapat na tangalin.

Samantala, hindi naman pinangalanan ni Esto kung sino-sinong mga kandidato sa Aklan ang napadalhan na nila ng sulat.

Nagsusulputang boarding houses sa Bukid Talipapa, Manoc-manoc, napuna

Ni Edzel Mainit, YES FM Boracay

Hindi lamang mga basura ang nakitang problema sa Bukid Talipapa sa Barangay Manoc-manoc.

Kundi ang pagsulputan umano ng mga boarding houses doon, na wala namang permiso o kaukulang dokumento bago ito itinayo, ayon kay Island Adminstrator Glenn Sacapaño.

Maliban dito, hindi din umano rehistrado sa LGU o maging sa barangay ang mga boarding house na ito doon na animo ay squatters’ area sa dami nilang nagsiksikan sa nasabing lugar.

Dahil dito, nagpahayag si Sacapaño na kapag hinayaan lamang na ganito ang lugar na hindi magkaroon ng disiplina sa iba’t ibang aspeto ang mga nakatira doon, nababahala umano sila sa posibleng sakuna na posibleng mangyari na sa huli at ibabalik din ang sisi sa lokal na pamahalaan sa Boracay.

Nabatid din mula dito na may ilang beses na rin nilang binisita ng monitoring team ng LGU  ang lugar para kausapin ang mga nakatira doon kaugnay sa mga problemang nararanasan at nakita doon, lalo na sa usapin ng boarding houses.

Pero pinagtataguan pa umano sila minsan ng may-ari.

Problema sa basura sa Bukid Talipapa, babalikan ng LGU kapag natapos na ang 2013 Elections

Ni Edzel Mainit, YES FM Boracay

Tila ramdam na rin ng lokal na pahalaan ng Malay sa Boracay ang problema sa basura sa Talipapa Bukid.

Maliban kasi sa hindi maayos ang pagkakadispatsa ng mga hinugsang tubig na ginamit sa paglilinis ng isda, karne at gulay sa palengke na ito.

Problema din sa mga Boarding House ang isa pang nakitang suliranin na siyang nakakapagdala din ng basura.

Katunayan ay marami na umano silang nabigyan ng citation ticket sa area na ito ayon kay Island Administrator at Solid Waste Management Manager Glenn Sacapaño.

Ngunit hanggang ngayon ay marami pa rin talaga umano ang pasaway na mga residente at vendors sa nasabing lugar na madalas na alibi ay hindi parin alam ang ordinansa gayong ilang taon na nakatira ang mga ito doon.

Ito ay kaugnay sana sa tamang paghihiwalay ng basura at ordinasang nagbabawal na magtapon ng basura kahit saan lang.

Sa panayam ng himpilang ito sa administrator, inihayag nitong ilang beses na rin silang nakipag-diyalogo  sa mga tao sa Bukid Talipapa upang ipaliwanag sa mga ito ang ordinansa at ilatag ang mga dapat gawin upang hindi bumaho at mabalot ng basura ang nasabing lugar.

Subalit, tuwing bumabalik umano ang monitoring team ng LGU doon ay maroon pa rin silang nakikitang hindi sumusunod at nagtuturuan pa.

Ganoon pa man, ang sitwasyon doon ngayon ayon dito ay tila naging maayos na rin kung ikukumpara sa dati.

Bilang sagot na rin nito sa ilang residente doon kaugnay sa pagsisiga sa nasabing lugar ng mga basura.

Paliwanag nito, pwede naman iyon kung puro dahon o damo lamang umano sinisigaan.

Pero mahigpit na paalala nito na huwag isama ang mga plastic sapagkat mariin umano nila itong ipinagbabawal dahil nakakasira sa kapaligiran at maaaring makapagdala ng sakit kapag nalanghap ng mga indibidwal doon.

Sa halip ay ihiwalay na lamang at ilagay sa isang lalagyan para makuha din ng mga garbage collector na umiikot tuwing umaga.

Sa kabila ng mga pahayag na ito ni Sacapaño, nilinaw nito na muli nilang gagalugarin ang area na ito at ayusin ang mga problema doon pagkatapos nitong May 2013 Elections.

PHO walang pang naitatalang kaso na biktima ng heatstoke sa Aklan

Ni Edzel Mainit, YES FM Boracay

Sa kabila ng sobrang init na nararanasan ngayon hindi lamang sa Boracay, kundi maging sa buong probinsiya ng Aklan at bansa, walang pang naitalang kaso ng heat stoke ang Provincial Health Office sa ngayon ayon kay Dr. Cornelio Cuatchon Jr., PHO Officer.

Pero hindi umano nito masiguro na walang nabiktima ng sakit na ito sa buong probinsiya, dahil hindi pa nito hawak ang records ng iba pang hospital sa Aklan.

Subalit sa ngayon aniya, wala pa silang naitalang kaso ng sakit na ito sa Provincial Hospital.

Ganoon pa man, nagpaalala ang PHO Officer hinggil sa “6S” na inilunsad ng Department of Heath na siyang nauusong sakit din sa panahong ito.

Kung saan ito ay kinabibilangan ng mga sakit na: sore eyes, sunburn, sipon at ubo, pagsusuka at pagdudumi, sakit sa balat at sakmal ng aso.

Aniya, maiiwasan umano ang mga sakit na ito kung paiiralin ang pagiging malinis sa katawan katulad ng madalas na paghuhugas ng kamay at pagpanatili na malakas ang immune system.

Samantala, inihayag naman ng manggagamot na mayroon na silang naitalang turista sa Boracay na nagkaroon ng sore eyes kamakailan lang.

Comelec Aklan may paalala sa mga kandidato

Ni Edzel Mainit, YES FM Boracay

Ngayon pa lang ay dapat na sumunod na umano ang mga kandidato sa patakaran ng Comelec lalo na sa pagsabit at paglalagay ng mga poster o campaign paraphernalia nila.

Ito ang paalala ng Commission on Election Aklan, dahil aminado ito na pagkatapos ng halalan ay tila hindi na papansinin pa mga kandidatong ito ang mga basura o mga poster na ikinabit nila katulad noong mga nagdaang halalan, lalo na umano ang mga talong kandidato.

Kaya paalala ng kumisyon, magkabit o maglagay lamang ng mga poster sa common poster area upang hindi ito maging basura sa mata matapos ang election lalo na dito sa isla ng Boracay.

Sa panayam kay Jetulio Esto ng Comelec Aklan, obligasyon umano ng mga kandidatong ito na sila na ang magbaklas ng kanilang mga poster, o kaya ay sila na umano ang gumastos para maligpit ito pagkatapos ng election.

Dahil noon pa man umanong nag-file ng Certificate of Candidacy, ay pina-alalahanan na ng komisyon ang mga kandidato sa kanilang mga obligasyon.

Sa oras umano na hindi tumalima ang mga pulitikong ito, sinumang indibidwal na may malasakit sa kapaligiran ay maaaring magreklamo laban sa mga ito.

Sa panig naman umano ng Comelec, papadalhan nila ng sulat ang mga may-ari ng poster upang ipatanggal na ang mga ito, at maaaring masampahan ng kaso ang ayaw pa talagang tumalima sa kautusang ito.

Friday, April 26, 2013

Beach Management ng PRC, umaalalay sa mga naliligo sa Boracay

Ni Rodel Abalus at Alan Palma Sr., YES FM/Easy Rock Boracay

Ang PRC o Philippine Red Cross Boracay-Malay Chapter ay nakikipagtulungan sa mga miyembro ng LGU Lifeguard para sa seguridad ng mga naliligo sa baybayin ng Boracay lalo na ngayong super peak season.

Sa panayam kay John Patrick Moreno, staff nurse ng PRC Boracay-Malay Chapter, pangunahing responsibilidad nila ay ang pagbabantay sa red at yellow flag sa beach front.

Dagdag pa nito na nagbibigay sila paalala sa mga naliligo na kung maari ay huwag na silang lumagpas sa nakatalagang dilaw at pulang flag para na rin sa kanilang seguridad .

Sa ganito ring paraan nila mapapaalahanan ang mga turista lalo na kung medyo malakas ang alon.

Ang beach management ng PRC ay nagbibigay din ng mga impormasyon tungkol sa tamang kasuotan sa paliligo at kung paano alalayan ang mga batang kasama para maiwasan ang anumang sakuna dulot ng kapabayaan ng magulang.

Ilan din sa madalas nilang pa-abiso ay ang pag-iwas sa paliligo kung nakainom, kung may kulog at malakas ang agos ng tubig dagat.

Samantala, inanyayahan naman ng PRC ang lahat na magkakaroon sila ng aktibidad na pinamagatan na “Festival of the Winds” sa darating na May 17-18, 2013.

Tampok dito ang Life Guard Competition at Ocean Swim at Adventure Run.

Media na nag-apply para sa absentee voting sa Aklan, iisa lamang

Ni Edzel Mainit, YES FM Boracay

Tila nanghihinayang ang mga Aklanon na media na hindi maiboto ang kanilang kandidato sa lokal na nagpapapili mula kongresista pababa sa konsehal ng mga bayan, sapagkat iisang media lamang sa Aklan ang nag-apply para sa absentee voting.

Ito ay sa kabila ng panawagan ng pamahalaan sa mga media sa bansa na bumoto ng maaga kaya isinama ang mga mamamahayag sa absentee voting para sa mga ahensya at departamento ng gobyerno na inaasahang magiging abala sa darating na halalan at sa hiling na rin ng media sa bansa.

Pero sa probinsyang ito, tila inisnab lamang ang pagkakataong makapag-boto ang mga ito ng maaga bago ang eleksyon.

Ayon kay Aklan Comelec Supervisor Atty. Roberto Salazar, solo lamang ng isang tao na hindi na pinangalanan ang pagkakataon na makapag-boto, bagay na hindi umano nila alam kung bakit hindi nag-apply para sa absentee ang iba.

Pero nilinaw nito na tanging sa national level na mga kandidato lang ang pwedeng maiboto sa absentee.

Samantala, mahigit sa isandaang mamamahayag naman ang nagpa-accredit sa Comelec para sa May 2013 Elections.

Kaso ng pinaslang na Ati Spokesperson, umuusad na

Ni Christy Dela Torre, YES FM Boracay

Dalawang buwan matapos paslangin, umuusad na umano ngayon ang kaso ng Ati Spokesperson na si Dexter Condez.

Matatandaang si Condez ay pinatay noong gabi ng Pebrero a-bente-dos, taong kasalukuyan, habang naglalakad ito pauwi sa kanilang Village sa Sitio Lugutan, Manoc-manoc, kasama ang dalawang babae na kapwa nito katutubong Ati.

 Ayon kay Deputy Police Superintendent Region 6, Manuel Felix, wala na umano sa kamay ng Philippine National Police o PNP ang kaso ni Dexter, dahil nai-akyat na ito sa Higher Court.

Kung saan tatlong suspek na umano ang kinasuhan, kasama na si Daniel Celestino, ang unang itinuturong suspek sa kremin, at ang dalawa pang suspek na hindi na pinangalanan pa.

Kaugnay nito, nangako naman umano ang Commission on Human Rights o CHR na tutukan nila ang kaso ni Dexter upang mapabilis itong maresolba.

Matatandaang sa pagdalaw ni Department of Justice Secretary Leila De Lima sa Ati Community kamakailan ay inihayag din nitong mahigpit nilang mino-monitor ang kaso ni Dexter upang mabigyan ng agarang hustisya .

Aklan, mayaman sa buong Region 6 --- NSCB Suvey

Ni Edzel Mainit, YES FM Boracay

Itinuturing na angat na ngayon ang probinsiya ng Aklan sa buong Region 6.

Sapagkat kung kumpara ito sa mga probinsiya sa Region, ang Aklan ang may pinakamamabang bilang ng mga pulubi o naghihikahos sa buhay.

Ito ay kung pagbabatayan ang pinakahuling survey na inilabas ng National Statistical Coordination Board (NSCB).

Sa ulat kasi ng NSCB, ang Aklan ang may pinakamababang bilang ng mga Pilipino na masasabing mahirap ang kanilang pamilya sa Region 6.

Kung saan nakapagtala lamang ng 21% na pamilyang naghihirap ang Aklan noong nakaraang taon, kung ikukumpara sa datus ng survey noong 2006 na nakapagtala ng 32.3% at nitong 2009 ng 38.4%.

Samantala, ang probinsiya ng Antique naman ang nakapagtala ng may pinakamalaking bilang ng mga mahihirap na pamilya sa buong Western Visayas na imabot ng 32.1%, sinundan ng Guimaras na may 26.2% Negros Occidental, Capiz 25. 4% at Iloilo na 21.9%.

Ang survey ay ginawa ng NSBC nitong nagdaang huling bahagi ng taon.

Thursday, April 25, 2013

Suporta at tulong, ipinangako ng CHR sa mga Ati sa Boracay

Ni Peach Ledesma, YES FM Boracay

Patuloy pa rin ang magiging suporta ng Commission on Human Rights (CHR) sa mga katutubong Ati dito sa isla ng Boracay.

Ito din ang rason kung bakit ipinatawag ang Inter-Agency Dialogue na isinagawa kahapon sa Balabag Barangay Hall kasama ang ilang pambansang ahensiya, non-government organizations, at Boracay Ati Tribe Organization (BATO).

Sa panayam ng himpilang ito kay CHR Commissioner Victoria Cardona kahapon, sinabi nitong nakikita nilang marami nang isyung kinahaharap ang mga Ati na nakakapag-lagay sa kanila sa mga mahirap na sitwasyon.

Kasama na dito ang mga sunud-sunod na harassment na nararanasan ng mga katutubo, kawalan o kakulangan sa pagtanggap ng serbisyo o suporta mula sa ibang ahensya, at karunungan o impormasyon sa mga legal na aspeto.

Ilan pa sa mga hinahanapan nila ng mabilis na solusyon sa ngayon ay ang naging daing ng mga katutubo na hindi umano sila nabibigyan ng karampatang suporta ng LGU Malay at ang dinaranas nilang hirap sa pag-a-avail sa Pantawid Pamilyang Pilipino Program (4Ps) o Conditional Cash Transfer (CCT) Program ng Department of Social Welfare and Development (DSWD).

Dahil dito, nangako si Cordova na ipagpapatuloy nila ang kanilang mga binitiwang salita na patuloy na tutulungan ang mga Ati sa islang ito.

Kaugnay nito, on process na sa ngayon ang kanilang pnalo na magtayo ng kanilang opisina dito sa Aklan upang mas mapadali ang pagbibigay serbisyo sa mga Ati at sa mga naghahanap ng tulong para sa may mga kaso ng pag-labag sa karapatang pantao.

Isa sa mga problemang kinahaharap sa pagbibigay ng serbisyo ay ang layo ng kanilang opisina na nasa Iloilo pa, at ang minsan ay kakapusan ng funds kaya’t nadi-delay ang kanilang operasyon lalo na sa mga malalayong lugar tulad na lang ng Aklan at Boracay.

Samantala, siniguro ng CHR Commissioner na malapitan nilang imo-monitor ang kaso ng pag-paslang kay Dexter Condez na sa ngayon ay nasa prosekusyon na para mapabilis ang pagkaka-lutas nito.

Kabataang botante, magdadala ng pagbabagong pulitikal --- COMELEC Aklan

Ni Shelah Casiano at Alan Palma Sr., YES FM/Easy Rock Boracay

“Kabataan ang pag-asa ng ating bayan”.

Kasabihan ni Jose Rizal na kung saan dito inilarawan ni Kalibo Acting Comelec Chairman Getulio M. Esto ang magiging panindigan ng mga kabataang botante sa sitemang pulitikal lalo na sa nalalpit na halalan.

Bagamat wala pa silang hawak na datos sa kasalukuyan kung ilan ang magmumula sa mga botanteng may edad 18-25, subalit ikinukonsidera niya na malaking bagay pa rin ito.

Dagdag pa nito na mas malawak at may paninindigan ang mga kabataang botante na mas naghahangad ng reporma , taliwas sa tradisyonal at maruming  pulitikang nakagisnan ng lahat.

Ang komisyon anya ay humihimok sa mga kabataan na magparehistro at makilahok  sa halalan na naayon din sa Article 5 ng Philippine Constitution na kung saan nakasaad ang karapatanng pumili at bumoto.

Ang hakbangin na ito ayon kay Esto ay magdudulot ng malaking pagbabago sa sitemang pulitikal na matagal ng inaasam ng bawat Pilipino.

Regulasyon sa mga tattoo artist sa Boracay, wala pang linaw

Ni Edzel Mainit, YES FM Boracay

Accreditation mula sa lokal na pamahalaan na lamang ngayon ang hinihintay ng ALIMA Skin Art, Inc. para ma-regulate ang mga miyembro nila.

Sapagkat aminado ngayon ang kanilang founder na si Sonny Señeres na halos hindi pa nila magagawa ang pag-regulate sa kanilang mga miyembro dahil halos wala pa silang boses para ipa-abot ang kanilang mga concern at maglatag ng kanilang mga alituntunin sa lahat ng kanilang miyembro.

Ito ay maliban pa sa pagkakaroon nila ng pare-parehong taripa sa paniningil nila sa kanilang serbisyo, at maging ang lugar umano kung saan nila pwedeng gawin ang kanilang serbisyo ay hindi pa nila alam.

Kaya kapag na-accredit na ang mga ito, ay magkakaroon na rin sila ng regulasyon.

Pero ganun pa man, siniguro nito na maayos at maingat namang nagagawa ng mga miyembro nila ang pag-ta-tattoo na hindi makasira sa balat ng kostumer lalo na sa mga bata na may edad 15 ayos pababa dahil sila umano ay may alam din sa maaaring epekto sa kanilang customer sa bawat pagkakamaling magagawa nila.

Matatandaang ang ALIMA ay nanghingi na rin ng accreditation sa Sangguniang Bayan ng Malay pero hindi pa na-aprubahan dahil may ilang bagay pang aayusin para sa regulasyon ng mga tattoo artist sa Boracay.

Ang ALIMA o Artist Link to the Mass Art Club ay grupo ng mga tattoo artist sa Boracay, na gumagawa ng temporary henna tattoo at permanenteng tattoo.

DOLE Aklan, may opisina na sa Boracay

Ni Edzel Mainit, YES FM Boracay

Para mapa-bilis ang pag-aksyion sa problema ng mga empleyadong naririto sa isla ng Boracay, mismong ang Department of Labor and Employment o DOLE na ang lumapit sa mga ito.

Dahil dalawang araw sa isang buwan ay maaari nang lapitan ang mga ito ng mga empleyado o trabahador upang magtanong o kaya ay magpa-abot ng reklamo.

Sapagkat aminado si Bidiolo Salvacion, DOLE Director ng Aklan, na sa Boracay umano ang maraming trabahador sa probinsya na nangangailangan din ng tulong ng DOLE.

Kaya maging regular na aniya ang skedyul nila sa pagpunta sa Boracay sa araw ng Martes at Miyerkules sa tuwing ika-tatlong linggo ng buwan.

Nabatid mula kay Salvacion na nitong Marso lang din sila nagsimulang mag-opisina sa isla, na matatagpuan sa ika-tatlong palapag ng Action Center sa Boracay.

Ganyon pa man, ang mga hindi na umano makapag-hintay pa sa buwanang iskedyul na ito ay maaari nang magtungo sa kanilang opisina sa bayan ng Kalibo.

Mga tattoo artist sa Boracay, ipapakita ang galing sa malinis at ligtas na paraan

Ni Peach Ledesma, YES FM Boracay

Ligtas at malinis na pagta-tattoo.

Ito ang gustong itaguyod ng ALIMA Skin Arts Club Inc. sa kanilang pagpapatawag sa Department of Health Region 6 para sa isang seminar na isasagawa sa ika-dalawampu’t-anim ng Abril, taong kasalukuyan.

Ayon kay ALIMA founder Sanny Señeres, layunin nilang isailalim sa seminar ang kanilang mga kapwa tattoo artists dito sa isla ng Boracay upang sila ay magkaroon ng tamang kaalaman sa mga panuntunang dapat na sinusunod ng mga skin artists para sa ligtas at malinis na pagta-tattoo.

Anya, “plus factor” na rin para sa mga  ito na sila ay maging accredited at certified ng DOH na sumusunod sa mga standards ng nasabing health agency, lalung-lalo na pagdating sa kalinisan at kaligtasan ng kalusugan ng kanilang mga kustomer.

Kaya, dagdag pa nito, mas maganda kung kukunin ng mga tattoo artist dito sa isla ang pagkakataon na makapag-seminar sa DOH, lalo na at minsan lang naman ang pagkakataong ito.

Ang nasabing seminar ay may kaugnayan sa aktibidad ng ALIMA na 3rd Boracay Tattoo Wars kung saan ipapakita ng mga tattoo artists ang kanilang galing sa skin art, na gaganapin sa ika-dalawampu’t-anim hanggang ika-dalawampu’t-pito ng Abril taong kasalukuyan.

PCOS machines na gagamitin sa Aklan, handa na

Ni Edzel Mainit, YES FM Boracay

Handa na ang mga PCOS machine na gagamitin sa Aklan para sa May 2013 elections.

Katunayan, 95-98% nang handa ang mga PCOS machine na ito.

Sapagkat na-i-deliver na at naririto na rin sa Aklan na siyang binabantayan naman na ngayon ng mga awtoridad at sinisiguro nasa ligtas na lugar bago paman sumapit ang halalan, ayon kay Aklan Comelec Supervisor Atty. Robert Salazar.

Aniya, sa kabuuan, may 504 na precinct count optical scanner (PCOS) machine ang gagamitin sa probinsiya, na katumabas ng bilang na mga presinto para sa mga buboto dito.

Kung saan, sa ngayon ay dalawang bayan na lang umano sa Aklan ang hindi pa dumarating sa kanilang PCOS na gagamitin.

Ayon sa Comelec Supervisor, ang bayan ng Makato at Malinao na lamang ang wala pang PCOS pero inaasahang darating na rin aniya.

Wednesday, April 24, 2013

KKK Drive, inilunsad ng Simbahang Katolika

Ni Kate Panaligan, YES FM/Easy Rock Boracay

Inilunsad na ng Simbahang Katolika ang KKK o “Kilatisin ang Karapat-dapat na Kandidato” Drive.

Ito’y para matulungan ang mga tao sa pagpili ng mabuting kandito sa nalalapit na May 13, 2013 elections.

Ayon sa report, magpapalabas ang simbahan ng video presentation pagkatapos ng misa tuwing Linggo kaugnay sa tamang pagpili ng kandidato.

Samantala, sa panayam ng himpilang ito kay Father Arnold Crisostomo ng Boracay Holy Rosary Parish Church, sinabi nitong wala pa siyang ideya tungkol dito.

Ang naturang hakbang ay makakabuti rin umano sa pagbibigay ng guidelines sa pagpili ng kandidato.

Dagdag pa ni Crisostomo, kahit hindi pa umano inilunsad ang KKK drive ay nagbabahagi na siya ng guidelines sa mga nagsisimba dito.

Dapat din umanong  pumili ng kandidatong may magandang pangarap sa kanyang pinamumunuan.

Tuesday, April 23, 2013

“Absentee voting” sa Aklan, pina-plantsa pa lang

Ni Edzel Mainit, YES FM Boracay

Apat na araw simula ngayon ay itinakda ang absentee voting, pero, hindi pa alam ng Comelec Aklan kung saan ang venue para doon makapagbuto ang nag-apply para dito.

Sapagkat ayon kay Atty. Robert Salazar, Comelec Supervisor ng probinsiya, hindi pa nagbibigay ng abiso kung saan talaga ang magiging venue ng absentee voting.

Gayong nasa mga pinuno na umano ng ahensiya at departamento ng pamahalaan na pinahintulutan ng Comelec ang paghahanap ng lugar kung saan nila gagawin ito.

Kaya sila sa kumisyon ay naghihintay pa ng pa-abiso mula sa mga ito upang maagang maka-boto ang kanilang mga tauhan.

Aniya, ang pinuno ng kapulisan at Philippine Army sa Aklan ang siyang magdedesiyon kung saan nila ito gagawin.

Ang absentee voting ay ikinasa ng Comelec para mabigyan ng pagkakataon na maka-boto ang mga abalang empleyado ng gobyerno sa darating na halalan, gaya ng pulis, army at maging mga Pinoy sa labas ng bansa.

Paglilinaw pa ni Salazar, mga nasa nasyonal level lamang ang pwedeng iboto sa absentee voting na ito sa darating na ika-28 hanggang 30 ng April.

PDEA, nagpaliwanag; RE: “Bakit ‘small time drug pushers lang ang nahuhuli?”

Ni Edzel Mainit, YES FM Boracay

Dahil sa nagpapagamit sa malalaking sindikato, kaya ang mga “small time” na tulak-droga lamang ang kalimitang nahuhuli.

Ito ang sagot ng Philippine Drug Enforcement Agency (PDEA) Region 6 sa tanong ng ilang mga drug pushers na nahuhuli sa mga buy-bust operasyon na ginagawa ng otoridad sa Boracay.

Pero ang katulad na tanong ay minsan na rin naging tanong ng ilang mga stakeholder sa isla at iba pang nagmamalasakit sa Boracay.

Ayon sa mga ito, may mga malalaki at kilalang indibidwal na nasa likod at sangkot din sa “market” ng illegal na drogang ito sa Boracay ngunit hindi man lang nahuhuli at nakukulong.

Bagay na aminado naman si Atty. Ronnie Delicana, PDEA Regional Director, kaugnay dito.

Subalit paliwanag nito, pipitsuging mga “pusher” lamang umano ang nahuhuli, dahil ang mga “big time” ay umiiwas nang humawak ng droga at pera, at hindi na rin lumalabas para magbenta pa.

Kaya itong mga maliliit na pusher lamang ang natitiklo sa mga operasyon dahil sila ang nagagamit sa transaksiyon.

Ganoon pa man, may mga aksiyon umano silang ginagawa, at ipapatupad nila ang batas kahit malaki o kilalang tao ang mga ito.

Pero kailangan pa rin talaga aniya ang sapat na ebidensiya.

Naniniwala naman ang PDEA 6 director na dahil sa walang panustos sa bisyo at wala na rin sa katinuan kaya may mga indibidwal na nagagamit lamang para magbenta ng droga, maliban pa umano sa madalas na alibi na dahil sa kahirapan ay nagagawa nila ito.

Pero kung tatanggapin umano ang ganitong rason at gagawing legal ang illegal, siguradong wala aniyang pupuntahang maganda ang sitwasyon ng isla dahil makakaepekto ito sa turismo ng Boracay.

Mga establishemento sa Boracay hindi pa nag-apply ng liquior ban sa Comelec

Ni Edzel Mainit, YES FM Boracay

Tatlong linggo na lang bago ang May 2013 midterm elections, pero hindi pa rin nakakapag-apply ang mga establishment sa Boracay para sa Comelec exemption kaugnay sa ipapatupad na liquor ban.

Bagay na tila dismayado umano ang kumisyon dahil hanggang sa noong ika-22 ng Mayo, dalawa pa lamang mula sa daan-daang mga restaurants at resorts na may mga bar dito sa isla, maliban pa sa mga disco bar ang nakakapagsumite ng kanilang aplikasyon sa Comelec.

Dahil dito, ayon kay Aklan Comelec Supervisor Atty. Robert Salazar, mapipilitan na talaga itong sadyain ang Boracay para ipatupad ang naaayon sa batas sakaling ayaw pang tumalima ng mga estabshemiyentong ito.

Bagamat walang deadline sa aplikasyon, umaaasa sana ito na masigasig ang tugon ng mga negosyante sa isla kaugnay sa paghiling ng exemption gayong iisang republika lang ang Boracay at Pilipinas.

Kaya dapat din umanong sumunod ang Boracay sa mga ipinapatupad na batas.

Sisimulan aniya ang pagpatupad ng liquor ban na ito sa ika-9 ng Mayo hanggang sa ika-13 ng hating gabi bilang bahagi parin ng mapayapang halalan.

Batay ito sa Comelec Minute Resolution 13-0322, kung saan nagbabawal sa pag-inom, pagbili at pagbinta ng alak lalo na sa mga pampublikong lugar, maliban na lamang sa mga establishemiyentong na-accredit sa Department of Tourism, kung saan ang sinuman umanong mahuli na lumabag dito ay makukulong.

“Boracay Holiday”, raratsada na sa a-uno ng Mayo!

Ni Bert Dalida, News Director, YES FM Boracay

Mga bata, matatanda, taga-Boracay, mga dayo, volunteers, at maging ang mga turista.

Ito ang mga inaasahang lalahok sa kasaysayang magaganap sa tinaguriang number one tourist destination sa Pilipinas.

Raratsada na kasi ang aktibidad sa isla na tatawaging “Boracay Holiday”, sa darating na unang araw ng Mayo.

Ito ang kinumpirma ni Boracay Island Administrator Glenn Sacapaño, sa panayam ng himpilang ito.

Kung saan, ang mga taga-mismong LGU Malay, business sector, Department of Education (DepEd) at mga taga-barangay, ay lalahok sa paglilinis sa Boracay, sa loob ng 18 araw na aktibidad.

Ang mga sektor umanong makikiisa dito ay may kanya-kanyang petsa at itinakdang lugar ng paglilinis.

Layunin umano ng nasabing aktibidad ay ang sama-samang pagpapanatili sa pagiging numero uno ng Boracay at mapangalagaan ito para sa susunod na henerasyon.

Ang mga taga-mainland Malay ay makikilahok din umano, kahit sabihing “Boracay Holiday” ang tawag sa nasabing gawain.

Kinumpirma din ni Sacapaño na ang “Boracay Holiday” ay bahagi ng Boracay Beach Management Program o BBMP na sumikat dahil sa mga slogan na “Sali Ako D’yan” at “Para Sa Boracay Ako, For Boracay I Will”.

Maliban pa sa ang nasabing aktibidad ay idineklara na ng Sangguniang Bayan ng Malay bilang holiday para sa isla, umaasa naman si Sacapaño na aaprubahan din ito ng kongreso.

Samantala, ipinaabot naman ng naturang administrador ang kanyang paanyaya sa lahat na sumali at makiisa sa darating na Mayo 1.

“Drug-free work place”, hihilingin sa mga stakeholders sa Boracay

Ni Edzel Mainit, YES FM Boracay

Sa pag-amin ng PDEA na may market ng illegal na droga sa Boracay at kung hindi na drug free ang buong isla, hihimukin na umano ng otoridad na maging ligtas laban sa ipinagbabawal na droga ang mga establishments dito.

Aapela aniya ang PDEA sa mga stakeholders sa isla na ipatupad at gawin ang polisiyang “drug-free work place” sa kani-kanilang mga establishment.

Kung saan, magyayari umano ito sa paraan ng pagmonitor din nila sa kanilang mga empleyado, dahil ang pag-gamit at pagtutulak ng droga ay hindi umano makakatulong sa negosyo ayon kay PDEA Regional Director Atty. Ronnie Delicana.

Bunsod nito, plano na rin umano nila sa ngayon ang pagpunta sa isla at makipag-usap sa mga stakeholder dito.

Dagdag pa ng opisyal, ayaw din umano nilang makaladkad ang pangalan ng Boracay na posibleng humantong sa pagkamatay din ng kabuhayan ng mga empleyado at negosyante dito.

Aminado din si Atty. Delicana na hindi kakayanin ng pamahalaan ang pagsugpo sa illegal na droga kung walang tulong at kooperasyon mula sa mga tao gaya ng mga stakeholders na ito.

Iligal na droga sa Boracay, hindi pa naman gano’n ka-talamak --- PDEA

Ni Edzel Mainit, YES FM Boracay

Hindi na maituturing na drug free ang buong Boracay.

Sapagkat mismong ang Philippine Drug Enforcement Agency (PDEA) na ang nagkumpirma na may mga nagpipilit pa rin talagang mag-market sa islang ito ng mga ipinagbabawal na gamot kahit sabihin pang mahigpit na ipinapatupad ang batas laban sa mga mahuhuli.

Pero paglilinaw ni PDEA Regional Director Atty. Ronnie Delicana, hindi pa naman ganoon ka-talamak ang iligal na droga sa Boracay, ngunit hindi naman umano masasabi na wala dahil ang totoo ay meron naman.

Ito ang inamin mismo ng nasabing opisyal kaugnay sa estado ng Boracay kung pagtutulak o pagbibenta at pag-gamit ng ipinagbabawal na gamot ang pinag-uusapan.

Sa panayam ng himpilang ito kay Delicana, tahasang sinabi nito na dahil sa panturismong lugar ang Boracay ay mayroon talagang gumagamit at nagbibenta dito.

Pero may mga aksiyon na rin umano silang balak na gawin sa ngayon.

Kaya ito na rin mismo ang nagsabi na hindi dapat maging “seasonal” lang ang kanilang gagawing operasyon sa Boracay.

At ang sinumang nahuhuli nila ay siguradong kakasuhan umano ng PDEA.

Anya, kapag hindi umano maaaksiyunan ang katulad na problema ito, ang presensiya ng mga ipinagbabawal gamot at ng mga gumagamit nito ay siya ding gumagatong para mapalaki ang market ng ipinagbabawal na droga sa isla

Comelec Malay, aminadong mahirap kontrolin ang pakalat-kalat na mga poster ng mga pulitiko

Ni Edzel Mainit, YES FM Boracay

Aminado ang Comelec Malay na nahihirapan sila sa implementasyon kaugnay sa pagbabawal sa pagdikit ng mga poster ng kandidato sa mga hindi common poster areas.

Sa panayam kay Malay Comelec Officer Feliciano Barrios, sinabi nito na ang nagpapahirap sa kanila para makontrol ang pagkalat ng mga election poster ay itong walang katapusang mga alibi o rason ng mga kandidato kapag ipinapatawag at pinagpapaliwanag.

Aniya, kalimitang rason ng mga ito ay hindi naman umano sila ang may gawa o nagdikit ng mga poster na ito sa puno.

Sa halip ay itinuturo ang kanilang mga volunteers o supporters na siyang nangangampaniya para sa kanila lalo na umano yaong mga poster ng mga nagpapapili para sa national level.

Gayong may mga puno dito sa Malay at Boracay na halos ginagawang poste na ng poster ng kandidato.

Naghihintay na lamang umano sila ngayon ng kautusan mula sa higher office nila para sa kanilang magiging hakbang.

Pero paglilinaw nito, dito sa Malay ay wala naman silang natatanggap na reklamo mula sa mga kandidato na nagre-report kaugnay sa illegal na pagkakabit ng mga poster ng kanilang mga katunggali.

Samantala, sinabi din ni Feliciano na sa ngayon ay masasabi din nitong mapayapa pa naman ang seguridad ng buong bayan para sa nalalapit na May 2013 elections at wala siyang nakikitang magiging problema sa nalalapit na halalan.

Naniniwala din ito na dahil sa wala namang katungali ang kasalukuyang administrasyon sa pagka-alkalde, hindi ganoon kainit ang takbo ng karera ng mga kandidato sa bayang ito.

Decriminalization sa “vagrancy” naging suliranin sa Boracay!

Ni Edzel Mainit, YES FM Boracay

Dahil sa sunod-sunod na kaso ng mga pangyayari sa Boracay na may kinalaman ang mga bading, tila ramdam na rin ngayon ng otoridad sa islang ito ang bigat kaugnay sa mga aktibidad ng tinaguriang mga “lady boy” sa Boracay.

Ayon kay Police Inspector Kennan Ruiz ng Boracay Tourist Assistance Center o BTAC, maliban sa nakaka-contribute ang mga ito sa prostitusyon dito, nasasangkot din ang mga ito sa ilang kaso ng pangloloko sa mga turista.

Kaya simula umano ng bawiin ng kasalukuyang pangulo ng bansa ang batas may kaugnay sa mga pagala-gala o “vagrancy”, ay tila hirap na rin ang otoridad ngayon sa pagsupil sa mga katulad na gawain, hindi lamang sa mga ladyboy na ito kundi pati din sa ibang indibidwal.

Bunsod nito, umaaksiyon na lamang umano ang pulis sa Boracay kapag may nagawang labag sa batas ang mga pagala-galang indibidwal na ito.

Sapagkat wala na rin silang legal na basehan kung huhulihin pa nila ang mga pagala-gala sa isla.

Maliban na lamang sa mga minor de edad dahil may ipinapatupad naman curfew para sa mga kabataan.

Kung maaalala, halos laman ng record ng BTAC na kalimitang inirereklamo at nagrereklamo ay ang mga lady boy na ito, kung saan kamakailan lang ay nanuntok ng dalawang pulis sa isla.

Pulis Boracay, dapat limitahan ang trabaho! --- Guisihan

Ni Mackie Pajarillo, YES FM Boracay

Hindi na kailangan pang pag-aralan ng mga kapulisan dito sa Boracay ang magsalita ng ibang foreign language.

“I-limit na lang natin sa peace and order ang ating mga pulis”.

Ito ang iginiit ni Police Senior Supt. Alan Guisihan, kaugnay sa suhestiyon ng isang miyembro ng BFI o Boracay Foundation Incorporated na isailalim sa training ang mga pulis sa Boracay sa iba’t-ibang lengguwahe.

Ang trabaho umano kasi ng mga pulis ay para lamang sa peace and order at hindi ang pagiging interpreter.

Kung saan, sinabi nito na limitahan na lang dapat ang trabaho ng mga pulis, nang sa ganoon ay magampanan nila ng maayos ang kanilang trabaho base sa ibinigay sa kanilang mandato.

Magkaganoon pa man, iminungkahi pabalik ni Guisihan sa taga-BFI na dahil may BAG o Boracay Action Group na, ay sila na lamang ang sanayin para dito.

Ito’y sakaling ang mga pulis ang mangailangan ng interpreter, kung halimbawang may mga turistang Chinese o Russian na makausap ay ang mga taga-BAG na lamang ang tatawagan.

Ang nasabing suhestiyon para sa mga taga-Boracay Police ay ipinaabot kamakailan lang sa ipinatawag na consultative meeting ng mga taga PNP Regional Office 6 sa mga stakeholders ng Boracay.  

Monday, April 22, 2013

15 kaso ng pagkalunod na ikinamatay ng mga biktima, naitala sa Boracay sa taong 2012

Ni Edzel Mainit, YES FM Boracay

Nakapagtala ng 15 biktima ng pagkalunod na nagresulta sa pakamatay ng mga ito ang Coast Guard Caticlan nitong nagdaang taon ng 2012.

Kung saan, 7 dito ay mga dayuhang turista, at 8 naman ang lokal, ayon kay Coast Guard Caticlan Assistant Commander Senior Chief Petty Officer Ronnie Hiponia.

Sa mga naitala nilang nalunod na mga turista, kasama na umano dito ang biktimang mga Chinese National na sakay ng tumaob na bangkang pang-island hopping nitong huling bahagi ng 2012, at ang iba naman ay nalunod sa beach ng islang ito.

Ang pangyayaring iyon umano ang rason sa biglang paglobo ng bilang ng mga biktima sa nakalipas na taon.

Ganoon pa man, kung may nalunod, malaking bilang naman ang naitala nilang naligtas sa taong iyon.

Sapagkat sa record nila, 78 dayuhang turista ang naligtas nila mula sa pagkalunod, kabilang na dito ang mga biktima ng iba’t ibang aksidente o insidente sa dagat sa Boracay, gaya ng mga sea sports activity.

Habang 55 naman umano ang naligtas nilang mga lokal, mapa-turista man at boatman.

Kalimitan umano sa mga sakunang ito ay nangyari sa panahon ng Habagat.

Entry at Exit point ng Boracay, hinihigpitan na

Ni Edzel Mainit, YES FM Boracay

Naghihigpit na ngayon ang Coast Guard sa Caticlan at Boracay sa pagbabantay sa mga entry at exit points ng isla.

Ayon kay Coast Guard Caticlan Assistant Senior Chief Petty Officer Ronnie Hiponia, lahat ng mga entry points papuntang Boracay pati ang cargo area at bago pa man pumalaot ang barkong pang-RORO ay sinisiguro nilang may mga K9 na nakadeploy para walang nakakalusot na mga illegal na makakapagdala ng problema.

Ito ay kasunod na rin ng mga napapaulat na mga pambobomba sa mga pampublikong lugar ibang bansa.

Nabatid din mula kay Hiponia na bagamat may tatlong K9 ang Coast Guard sa Caticlan na para na sa buong probinsiya, aminado ang Assistant Commander na kulang sila sa handler ng K9 sa ngayon kaya’t dalawang aso lamang ang nagagamit nila.

Ganoon pa man, sinisiguro umano nila na lahat ng pumapasok sa isla at sumasakay sa barkong pang-RORO ay dumadaan sa masusing inspeksiyon para sa kaligtasan ng lahat.