Thursday, October 01, 2015

Ilang area sa Yapak Boracay binaha dulot ng Low Pressure Area

Posted October 1, 2015
Ni Jay-ar M. Arante, YES FM Boracay

Pinasok ng hanggang bewang na tubig baha ang ilang kabahayan sa Yapak Boracay kaninang madaling araw partikular sa Sitio Ilawod dulot ng Low Pressure Area (LPA).

Base sa mga may-ari ng apektadong bahay ito umano ang kauna-unahang pagbaha sa kanilang lugar kahit na mababa ang kanilang area.

Nabatid na wala umanong drainage system sa apektadong lugar dahilan para walang madaluyan ang tubig papalabas ng dagat.

Samantala, pinaniniwalaan naman ng mga ito na galing sa mga ginagawang development sa taas ng bundok ang tubig na dumadaloy papunta sa kanilang mga tahanan.

Samantala, hiniling naman ng mga apektadong pamilya sa Local Officials ng Malay at sa mga kinauukulan na sana ay mabigyang ng pansin ang kanilang problema.

Napag-alaman na maging ang mga paaralan sa Yapak ay pinasok din kagabi ng rumaragasang tubig mula sa bundok dahilan para maantala ang klase ng mga mag-aaral.

Reklamo ng mga residente laban sa Caticlan Airport binusisi sa SP Aklan

Posted October 1, 2015
Ni Jay-ar M. Arante, YES FM Boracay

Image result for caticlan AirportTinalakay sa Sangguniang Panlalawigan (SP) Aklan kahapon ang tungkol sa nangyayaring problema ngayon sa pagitan ng ilang residente laban sa Caticlan Airport.

Dito napag-usapan ang tungkol sa sulat ng tinatayang dalawang daang residente ng Brgy. Caticlan sa bayan ng Malay na apektado ng ipinatupad na 300 meters widening sa Caticlan Airport.

Nabatid na nag-ugat ang problema sa hindi pagkakaintidihan sa presyo ng lupa kung saan sinasabi ng mga apektadong residente na bumaba ang halaga ng pagbili ng kanilang lupa taliwas sa naunang napag-usapan.

Kaugnay nito patuloy namang pinag-aaralan ng Committee on Laws at Committee on Budget and Finance kasama ang Committee on Waste and Means ang naturang problema matapos itong isumite sa kanila.

Matatandaang nitong mga nakaraang linggo ay nagkaroon ng pagtitipon ang mga residente na apektado umano ng widening project para sa isang rally kontra sa pamunuan ng nasabing paliparan.

Ang ongoing project ng Caticlan Airport ay para sa paghahandang gawin itong International Airport na magbubukas sa taong 2018.

Biometrics registration sa Oktobre 12 hanggang 16 pansamantalang isasarado

Posted October 1, 2015
Ni Jay-ar M. Arante, YES FM Boracay

Image result for COMELEC REGISTRATIONNagbigay ngayon ng paalala si Malay COMELEC Officer Elma Cahilig sa mga Malaynon na pansamatala muna silang magsasarado para sa Biometrics registration sa Oktobre 12-16, 2015.

Ito umano ay para bigyang daan ang mga tatakbong kandito para sa National and Local Elections sa Mayo 9, 2016 para sa kanilang Filing for Certificate of Candidacy (COC).

Ngunit sinabi nito na magbabalik ang kanilang operasyon sa Oktobre 17 hanggang sa katapusan ng buwan ng Oktobre para sa huling araw ng biometrics registration.

Kaugnay nito nasa limang porsyento na lamang umano ngayon ang mga botante sa Malay ang hindi pa sumailalim sa biometrics registration kung kayat muli nitong paalala sa lahat na maghabol na sa pagpapatala para makaboto sa halalan.

Nabatid na ang bayan ng Malay ang pangalawa sa may pinakamaraming botante sa probinsya ng Aklan na sumunod sa bayan ng Kalibo.

"Bahay-Pag-asa", planong ipatayo ng SP Aklan para sa mga kabataan

Posted October 1, 2015
Ni Jay-ar M. Arante, YES FM Boracay

Marami na ngayong kabataan sa probinsya ng Aklan ang tila nawawala sa kanilang landas dahil sa umano’y kapabayaan ng kanilang mga magulang.

Dahil dito ang Sangguniang Panlalawigan ng Aklan katuwang ang Philippine National Police, Provincial Social Welfare Development Office at MSWDO ay planong magtayo ng "Bahay-Pag- asa para sa mga nalilihis ng landas.

Nabatid na nitong nakaraang linggo ay nagsagawa ng committee hearing ang Sangguniang Panlalawigan (SP) Aklan para pag-usapan ang mga pulisiya para sa mga kabataang sumusuway sa batas.

Napag-alaman na tumataas ngayon ang kaso ng nakawan sa lalawigan lalo na sa bayan ng Kalibo kung saan imbolbado rito ang mga menor de-edad na kabataan.

Samantala, ang programang ito ay nakatakda pag-usapan muli ngayon araw sa SP Session ng Aklan sa bayan ng Kalibo.

Babaeng nagbebenta ng illegal na droga sa Boracay, arestado sa buy-bust operation

Posted October 1, 2015
Ni Jay-ar M. Arante, YES FM Boracay

Image result for illegal drugsArestado sa isinagawang buy-bust operation ang isang 43-anyos na babae sa Sitio Bantud, Brgy. Manoc-Manoc Boracay kahapon ng hapon.

Sa pinagsamang pwersa ng Provincial Anti-Illegal Drugs Special Operation (PAIDSTG) sa pangunguna ni PCI Bernard Ufano, Regional Special Operation 6 (RSOG-6) at ng Boracay PNP sa pangunguna naman ni PSI Fidel Gentallan ay naaresto ang suspek na si Solenia Villafria-Malayang ng Bo. Obrero, Lapuz, Lapaz, Iloilo City at presenteng nakatira sa Manoc-manoc Boracay.

Nakuha sa posisyon ng suspek ang dalawang sachet ng shabu, buy-bust money na dalawangpung piraso ng tig-isang libong peso at isang unit ng cellphone.

Ang suspek ay agad na ikinustudiya sa Boracay PNP para sa proper disposition at nakatakdang sampahan ng kasong paglabag sa Violation of Section 5, Article II of RA 9165.

Wednesday, September 30, 2015

Dalawang British national ninakawan habang naliligo sa Boracay

Posted September 30, 201
Ni Inna Carol L. Zambrona, YES FM Boracay

Image result for ninakawan sa beach sa Boracay
Dalawang British national ang ninakawan sa isla ng Boracay habang naliligo ang mga ito sa dagat kahapon.

Sa report ng Boracay PNP, kinilala ang mga biktimang sina Hannah Elizabeth Cadic Sack at Katherine Jane Lillywhite na pansamantalang naka-tira sa isang hotel sa Manoc-manoc Boracay.

Nabatid na iniwan ng dalawang biktima ang kanilang bag sa buhangin para maligo sa station 1 ngunit makalipas umano ang ilang minuto ay sinabihan sila ng mga tao sa lugar na may tumangay ng kanilang bag na mabilis namang nakatakas.

Ang nasabing bag ay naglalaman ng ibat-ibang cards, perang nagkakahalaga ng mahigit dalawang libong peso, dalawang cellphone, passport at sunglasses.

Samantala, agad namang nahuli ang suspek na kinilalang si Babbie Taleon ng Roxas City, Capiz ng mga otoridad at agad na ikinustuduya sa Boracay PNP para sa karampatang disposisyon. 

Karagdagang bite centers planong itayo sa apat na bayan sa Aklan

Posted September 30, 2015
Ni Jay-ar M. Arante, YES FM Boracay

Image result for bite centersPlano ngayon ng Provincial Health Office (PHO) Aklan na magtayo ng karagdagang bite centers sa apat na bayan sa probinsya ng Aklan.

Ito’y matapos mapag-alaman sa ginawang survey ng PHO na apat na bayan sa lalawigan ang may pinakaraming bite cases na kinabibilangan ng bayan ng Banga, Numancia, New Washington at Malay.

Ayon sa PHO Aklan, ito ay nakatakdang ipatayo sa susunod na taon kung saan inaasahang sasailalim pa ito sa ilang deliberasyon bago simulan ang proyekto.

Nabatid na ilan lamang ito sa mga proyektong inihahanda ng Provincial Health Office ng Aklan para sa taong 2016.

Samantala, karamihan naman sa mga bite cases ay ang kagat ng aso at mga insikto na nagdudulot ng piligro sa mga tao katulad ng dengue.

PESO Aklan may muling paalala sa mga Aklanon kontra illegal recruiters

Posted September 30, 2015
Ni Jay-ar M. Arante, YES FM Boracay

Image result for illegal recruiterNagbigay muli ng paalala ang Provincial Public Employment Office (PESO) sa mga Aklanon na mag-ingat kontra sa illegal recruiters.

Ayon kay PESO-Aklan manager Vivian Solano, nagkalat umano ngayon ang mga patalastas para sa overseas jobs sa pamamagitan ng social media, email o direct hiring.

Sinabi din nito na wala umanong job orders mula sa Hongkong at Macao taliwas sa mga lumalabas sa commercial sa internet.

Maliban dito pinaalalahanan din nito ang mga Aklanon na huwag magtrabaho sa ibang bansa na ang gamit ay tourist visa.
  
Nabatid na nagkalat ngayon ang mga illegal recruiter sa ibat-ibang lugar sa bansa na ang nais ay mangikil ng pera sa mga taong nais makapag-abroad at makahanap ng magandang trabaho bilang isang OFW.

Tuesday, September 29, 2015

COMELEC walang “extension” sa biometrics registration

Posted September 29, 2015
Ni Jay-ar M. Arante, YES FM Boracay

Image result for comelecWala umano ngayong balak ang Commission on Elections (COMELEC) na palawigin pa ang registration ng Biometrics para sa Election 2016.

Ayon kay COMELEC-Aklan Information Officer Chrispin Raymund Gerardo, hanggang Oktobre 31 na lamang ngayong taon ang registration ng biometrics para sa mga hindi pa nakapag parehistro.
Sinabi nito na wala ng extension sa mga hindi na makakahabol sa itinakdang petsa na kung saan hindi sila maaaring makaboto sa lokal at nasyonal eleksyon sa Mayo 9, 2015.

Dagdag ni Gerardo, kung matapos na umano ang biometrics registration ay pag-tutuunan na nila ng pansin ang paghahanda sa mga listahan ng botante.

Kaugnay nito temporaryo munang ititigil ang pagkuha ng biometrics, pag-paparehistro at iba pang gawain sa Oktubre 12 hanggang 16 para bigyang daan ang pagpasa ng mga mga Certificates of Candidacies (COCs) ng mga tatakbo sa 2016 election.

Isa sa miyembro ng Payumo Brothers Gang, na-aresto ng Boracay PNP

Posted September 29, 2015
Ni Jay-ar M. Arante, YES FM Boracay

Image result for kulunganNaaresto nitong Linggo ng Boracay PNP ang isa sa miyembero ng Payumo Brothers Gang matapos na mahuling nagnanakaw sa isang resort sa isla.

Sa report ng Boracay PNP nakilala ang naarestong suspek na si James Tesnado Payumo, 26 mula sa San Jose, Romblon at temporaryong nakatira sa Sitio Laguna, Brgy Balabag, Boracay.

Nabatid sa report na isang empleyado ng hotel ang nakakita sa suspek palabas ng isang kwarto na inuukapahan ng dalawang turista bitbit ang isang wallet kung saan agad niya itong kinompronta ngunit mabilis na tumakas papalayo.

Dito agad namang na-corner ng mga otoridad si Payumo sa beach area matapos na humingi ng tulong ang naturang empleyado kung saan nakaagaw atensyon sa mga tao sa lugar ang pagsisigaw nito ng magnanakaw.

Agad namang dinala sa himpilan ng pulisya ang suspek kung saan dito nare-cover sa kanyang posisyon ang perang nagkakahalaga ng mahigit sa 15 libong peso, dalawang cellphone, drivers license, ATM card, relo, camera, at ibat-ibang identification card ng mga biktima.

Ayon naman kay Senior Police Officer 1 Christopher Del Rosario Mendoza ng Boracay PNP, ang Payumo Brothers umano ay sangkot sa ibat-ibang serye ng nakawan sa isla simula pa noong mga nakaraang taon.

Ang suspek ay naka-kustodiya na ngayon sa Aklan Rehabilitation Center sa bayan ng Kalibo, Aklan matapos sampahan ng kasong theft.

Kalibo, nangunguna parin sa pinakamaraming walang biometrics sa Aklan

Posted September 29, 2015
Ni Jay-ar M. Arante, YES FM Boracay

Image result for comelecNangunguna parin ngayon ang bayan ng Kalibo sa Aklan sa may pinakamaraming walang biometrics para makaboto sa 2016 local and national election.

Ayon kay COMELEC-Aklan Information Officer Chrispin Raymund Gerardo, nasa 3,800 pa ang walang biometrics na mga residente ng nasabing bayan.

Ito umano ay base sa pinakahuling Consolidated Progress Report ng COMELEC-Aklan sa isinagawang ERB Hearing noong Hulyo 20, 2015, kung saan ang Aklan ay may 320,843 na mga botante at 5% dito ay hindi pa nakapag-biometrics.

Ang COMELEC-Kalibo ay pinamumunuan ni Atty. Rommel Benliro habang ang COMELEC Provincial Office ay pinamumunuan naman ni Provincial Election Supervisor Atty. Ian Lee Ananoria.

Nabatid na ang pagpapalabas ng Consolidated Progress Report ay ginagawa bawat tatlong buwan base sa Commission on Elections (COMELEC).