Friday, February 03, 2012

Caticlan Elementary School, umaapela ng madaliang relokasyon

Ni Edzel Mainit, Senior Field Reporter, YES FM Boracay

Bagamat batid na ng mga taga Caticlan at Caticlan Elementary School na tatangalin na ang paaralang ito malapit sa paliparan batay sa paka huling pakikipag-ugnayan umano ng developer kay Antonio Cahilig Principal ng Caticlan Elementary School.

Subalit namomoblema ito dahil hindi pa malinaw ngayon kung kaylan sisimula ang relokasyon at paglilipat ang paaralang ito.

Ito ay sa kabila din ng napag-alaman nilang nagpahiwatig na rin ang pamunuan ng Caticlan Airport na sila na ang bahalang bumuli ng lupa para pagtirikan at sila na ring bahala sa pagpapatayo ng gusali.

Subalit sa kasalukuyan hindi pa umano nila alam kung kaylan talaga ito sisimulang gawin.

Kaya umapela na ang Principal ng tulong para sa madaling pagkakagawa dito gayong araw-araw umanong nararanasan ng mga estudyante ang ingay doon.

Samantala, nabatid din mula sa nasabing principal na ang relocation area ayon kay Cahilig ay sa tabi ng Caticlan Public Market, gayong balak na aniya ng developer na doon bumili ng lupang 9,000 sq. meter para sa paaralan.

Matatandaang, simula nang mapabalita na may expansion na gagawin sa Caticlan Airport, hindi parin nagkaroon ng linaw kung saan, kaylan o ililipat nga ba ang paaralang ito lalo pa at ramdam na ang subrang ingay kapag may lumapag o lumipad na eroplano sa runway na halos nasa tabi lang din ng eskwelahan. 

CENRO Boracay, may bagong Officer In-Charge

Ni Edzel Mainit, Senior Field Reporter, YES FM Boracay

May bagong Officer In-Charges nanaman ngayon ang Community Environmental Natural Resources Office (CENRO) sa Boracay, Nabas, Ibajay, Tangalan at Buruanga sa katauhan ni Merza Familiano, na siyang bagong Officer sa area na ito kapalit ni Merlita Ninang.

Kahapon isinagawa ang turn-over ceremony sa Boracay at Nabas para pormal nang manungkulan bilang OIC si Familiano sa kaniyang bagong posisyon.

Matatandaang nitong nagdaang taon ng 2011 palang pinalitan si CENRO Officer Merlyn Aborka at humalili dito si Ninang, subalit napalitan din agad ito ni Familiano ngayon.

Nabatid na pinalitan si Ninang dahil nilipat ito division sa area parin ng mga bayang ito. 

Registration Inventory ng mga resort/hotel sa Boracay ipinapasumite

Ni Edzel Mainit, Senior Field Reporter, YES FM Boracay

Para mabilang ng tama o accurate ang mga turistang pumapasok sa Boracay.

Isinulong ngayong sa Sangguniang Bayan ng Malay ni SB Member Welbec Gelito, na maisabatas at gawan ng ordinansa para hilingin o utosan  ang mga resort/hotel at iba pang establishemento na tumatangap ng bisita para may matuluyan sa isla, na isumite ang kanilang Registration Inventory, upang mabatid kung may ilang bisita na ang nakapasok sa Boracay.

Ito ay sa kabila nang mayroong tao ang Municipal Tourism Office MTO sa Caticlan Jetty Port para magtala at mabilang ang mga turista na papasok ng isla.

Subalit, dahil sa batid naman ayon sa konsehal na mayroong  “one entry one exit  policy“ na ipinapatupad sa Boracay.

Pero tila hindi naman ito nasusunod, sapagkat may mga hotel/resort sa isla na may pribado o sariling  pantalan na hindi na dumadaan sa Caticlan Jetty Port.

Kaya may mga pagkakataon na hindi nabibilang ng MTO ang mga ito.

Subalit, ang ordinansang ito ay hindi pa na-aprobaha sa konseho, at nakatakda palang pagdebatihan ng Committee on Law and Ordinances at Tourism.

Mga party sa Semana Santa, ipapa-regulate na

Ni Edzel Mainit, Senior Field Reporter, YES FM Boracay

Ilang buwan nalang at Abril na kung saan ipinagdiriwang ng simbahang Katoliko ang Mahal na Araw.

Bagamat kapag mahal na araw ay maraming turista sa Boracay lalo pa at summer season, inaasahang din kaliwa’t kanan ang kasiyahan o party.

Bagay na ngayon palang ay pinaghahandaan na ang pagnanais na maisabatas ang pag-regulate sa pagkakaroon ng Party, ano mang aktibidad o kasiyahan sa loob ng bayan ng Malay partikular na sa Boracay pagsapit ng Good Friday o Biyernes Santo sa Mahal na Araw.

Ito ay upang bigyang daan ang pagninilay-nilay ng mga katoliko.

Dahil dito para lubusan nang maisabatas, isinulong ngayon ni Sangguniang Bayan Member Esel Flores sa konseho ang ordinansa kaugnay sa regulasyon ng mga kasiyahan o party pagsapit ng Biyernes Santo.

Subalit ang usaping ito ay hindi pa aprobado ng konseho at nakatakda palang pang-usapan at dinggin.

Matatandaang, nitong taon ng 2011 pa pinag-uusapan ang ukol dito subalit ngayon 2012 palang ito isinulong para gawing ordinansa. 

Sangkalikasan, handang ihayag ang pinag-gamitan sa P50M na bigay ni Legarda

Ni Edzel Mainit, Senior Field Reporter, YES FM Boracay

Dahil nangayari na nga, na minsan nang pinagdudahan ang Sangkalikasan Cooperative nang mabiktima ito ng di umano ay maling artikulo na nakalimbag sa isang magazine ng airline Company.

Ipinasiguro ngayon ni Jojo Rodriquez Pangulo ng Sangkalikasan Cooperative,  na para maiwasan ang katulad na pangyayari at hindi malagay sa kontrobersiya ang proyekto nilang artificial reef na binigyang pundo ni Senadora Loren Legarda na nagkakahalaga ng limangpung milyong piso para sa Boracay.

Inihayag ngayon ni Rodriquez sa konseho na gagawa ito ulat at ipipresenta sa kinauukulan para malaman din ng publiko kung saan napunta ang perang ibinigay ni Legarda at kung ano ang pinag-gastusan nito.

Kung saan sa ngayon umano at tatlongpung pursiyento pa lamang ng limangpung milyong piso ang natatanggap ng kooperatiba na siyang ginamit na nila para gawin ang mga natapos nila dome ngayon.

Bagamat hindi pa tapos gawin ang mga artificial reefs o dome na ito, nakapagsimula na rin umano silang maghulog nito sa baybayin ng Boracay para subukin kung epektibo nga ang proyekto.

Bagay na ikinatuwa sana umano nila dahil nakita ng balikan ang lugar na marami nang isda ang nabubuhay doon.

Subalit tila napawi ang kanilang kasiyahan at napalitan ito ng paghihinayang, sapagkat minsan na rin nilang nadatnan at nakita na may ilang Koreano na nangi-ngisda doon, sa kabila ng pagkakaalam aniya nila na mahigpit itong pinagbabawal.

Samantala, inihayag din ni Rodriquez na ngayong a-singko ng Pebrero isasagawa nila ang Launching ng Sangkalikasan sa proyektong ito. 

Bantay Dagat, nababahala sa sitwasyon ng korales dahil ginagalaw ng ilang divers

Ni Edzel Mainit, Senior Field Reporter, YES FM Boracay

Nababahala ngayon ang Bantay Dagat sa Boracay sa mga natatanggap nilang impormasyon na ilang divers sa isla ang naisumbong sa kanilang ginalaw at nililipat ng lugar ang mga korales, na malinaw na ipinagbabawal dahil hindi ito maganda at posibleng ikasira o ikamatay ng mga yamang dagat na ito.

Sa panayam kay Jhon Felix Balquin, Marine Biologist ng Malay Agricultures Office at isa sa mga Bantay Dagat, minsan na rin umanong nadatnan nila at naabutang may nakataob na korales, dahil sa pinapaniwalaang ginalaw at nilipat ang bato kung saan tumubo ang korales, kaya kapag ipagpatuloy ito ay posibleng maputol at mamamatay ang yamang dagat na ito.

Kung saan ginagawa aniya ang paglipat ng mga korales ng ilang divers, lamang nakakuha ng espasyo doon sa ilalim ng dagat habang nagtuturo sa mga baguhang divers, kaya inu-urong nila ito.

Bagamat ang ilang sa mga diving instructor at diving shop ay alam umanong ipinagbabawal ito pero tila kinakaligtaan na.

Lalo na ang pangu-nguha ayon kay Balquin ng mga seas shell, katulad ng Gem Clams, trumpet, budyong at iba pang seashells at korales kahit pa sabihing patay na ito ipinagbabawal ding kunin.

Higit naman ikinalulungkot aniya ng mga taga Bantay Dagat ang nakikitang sitwasyon na iniiwan lang ang mga seas shells  na ito makaraang kunan ng laman.

Dahil sa hindi kagandahang obserabsyon na ito, para hindi na maulit pa.

Hiling ngayon ni Balquin na kung maarii ang mga diving instructor habang nagtuturo  sa mga baguhan o estudyante nila, gawin ito sa mabuhagin bahagi ng dagat at hindi sa may mga korales para hindi masagi at masira, gayon din wag sana aniya masyadong dumikit sa mga korales lalo na ang mga baguhang divers.

Samantala, inihayag naman ni Balquin na sa oras na mahuli ang mga ito na sinisira o kinukuha ang mga nabangit na yamang dagat, maaari umanong maparusahan ang mga ito at pagbayarin ng penalidad o mas malala ay i-kansela ang kanilang mga permit.

Kung ibabatay naman ito sa batas ng bansa maaari umanong makulong ang sino mang mahuli. 

Ninakaw na kuryente ng isang estalishemento sa Boracay,ibabalik sa konsumidor

Ni Edzel Mainit, Senior Field Reporter, YES FM Boracay

Klinaro ng Aklan Electric Cooperative o Akelco na ibabalik nila sa konsumidor ang ninakaw na halaga ng kuryente ng isang malaking establishemento sa Boracay dahil naideklara na ito sa system loss ng kooperatiba at nabayaran na rin ng mga konsumidor.

Ito ang nilinaw ni Atty. Mathew Rodson Mayor, Executive Secretary ng General Manager ng Akelco, na siyang ipinadala ng kooperatiba para magbigay linaw sa Sangguniang Bayan ng Malay ukol sa usaping ito.

Matapos madiskobre at mahuli di umano n g Akelco si James Molina taga pamahala ng isang Water Company sa Boracay na nangdaya at nagnakaw ng kuryente nitong Enero.

Kung pinapaniwalaan matagal na rin di umano itong ginagawa ng nasabing kumpaniya ng tubig pero kamakailan lamang na huli.

Dahil dito, umabot na ayon kay Mayor ng 1.5 milyon kilowatt hour ang nakuhang kuryente sa Akelco na sinigil sa mga konsemedor ng i-deklara itong system loss.

Kung saan nag-usapan na di umano si Molina at ang management ng Akelco na labing limang milyong piso ang babayaran nila sa kooperatiba dala na ang penalidad.

Subalit sa P15milyong ito, P12.3 milyon ang ibabalik sa mga kunsumidor sa paraan ng pagtapyas sa kanilang bayarin.

Pero kung kaylan ito ibabalik,  hindi pa umano nila masiguro kung kaylan, dahil hindi pa nabayaran ng buo ang labin limang milyong piso.

Katunayan sa ngayon, P2.5 milyon palang umano ang nababayaran ni Molina.

Ang paglilinaw na ito ni Mayor ay ginawa nang ipatawag ng konseho ang Akelco para linawin kung ano ang mangyayari sa perang binayad ni Molina gayong naideklara na itong systems loss na binayaran ng komsumidor nitong mga nagdaang buwan at napaloob sa kanilang kunsumo. 

Tuesday, January 31, 2012

Boracay hindi kinulang sa promosyon, ayon sa DOT

Ni Edzel Mainit, Senior Field Reporter, YES FM Boracay

Hindi naniniwala ang Department of Tourism Region 6 na kinukulang at kukulangin ang Boracay kung promosyon ang pag-uusapan.

Ito ay kahit hindi man naabot ang isang milyong tourist arrival nitong nagdaang taon ng 2011, hindi naman masama ito para sa Boracay ayon kay Atty.  Helen Catablas OIC Regional Director ng Department of Tourism Region 6.

Katunayan, maganda aniya ang naging pagpasok ng turista sa isla nitong nagdaang taon dahil ilang libo na lang sana ay maabot na ang target na bilang na ito.

Pagdating naman sa promosyon na isinasagawa ng DOT sa rehiyong ito, ang Boracay umano ang nagdadala ng bandila para mahikayat ang mga turismo ng rehiyong ito at maging ng bansa, kaya sa anumang uri ng promosyon ng departamentong ito ay dinadala talaga ang Broacay.

Kaugnay nito, humiling si Catablas ng suporta mula sa publiko sa Boracay para mapanatili ang seguridad, kaayusan at pagpapahalaga sa kapaligirang ng isla nang sa gayon maging kanais-nais ang Boracay sa mga dayuhang bumibisita sa isla.

Samantala, para lalong mai-angat ang serbisyong ibinibigay sa turista, nakikipag-ugnayan na rin ang departamento nila sa kinauukulan katulad sa pagpapaunlad ng paliparan dahil maituturing na front liner ang mga airport.

Naniniwala  kasi ang DOT na ang ”first and last impression” at nasa paliparan lalo pa at hindi umano ganon kadaling isawalang-bahala ang mga reklamo ng mga turista sa mga nakikita nila sa frontline.

Gayundin tunututukan nila ang mga nagbibigay serbisyo sa mga turistang ito katulad ng driver, boatman, at pulis sa isla sa paraan ng pagbibigay ng sapat na training upang mai-angat ang turismo.

Boracay, gagawing “party place” ng Pilipinas

Ni Edzel Mainit, Senior Field Reporter, YES FM Boracay

Nilinaw ni Atty.  Helen Catablas OIC Regional Director ng Department of Tourism Region 6 na wala pang pormal na deklarasyon na nagsasabi at kinikilala na ang isla ng Boracay bilang “Party Place” ng Pilipinas dahil sa kaliwat kanang party at maraming establishementong nakakapag-bigay aliw sa mga turista, gaya ng disco bar at kung ano pa.

Ito ay sa kabila ng isinusulong ng mga stakeholders sa isla na maging “family oriented tourist destination” ang Boracay.

Subalit ayon kay Atty. Catalban, sa ngayon ay wala pang pormal diklarasyon at tila hindi naman aniya siguro ito kukontratahin ng publiko at stakeholders sa isla sapagkat nakita naman at isang katangian na kasama sa pag Market o pagbebenta sa turismo ng Boracay sa mga dayuhan ang pagiging party place ng isla.

Pero magkaganon man napanatili pa ring at may ibang bahagi umano  ng isla ay “family oriented tourist destination” pa rin.

Ang pahayag na ito ni Catalblan ay inihayag kahapon sa panayam ng himpilang ito, ukol sa lumabas ngayong balita na di umano ay binigyan ng panibagong bansag ang Boracay mula sa isinusulong na Family Oriented Tourist Destination ay naging Party  Place na ito g Pilipinas sa ngayon.  

Lugar na pinangyarihan ng land slide, pag-aaralan ng CENRO

Ni Edzel Mainit, Senior Field Reporter, YES FM Boracay

Dahil sa nangyaring pag-guho ng bundok kahapon sa Sitio Tulingon Barangay Libertad sa bayan ng Nabas na nagresulta sa pagka stranded ng libo-libong pasahero at pagka-delay ng mga turista lalo na sa pauwi na sa Maynila mula sa Boracay at naghahabol sa kani-kanilang flights.

Inaasahang bubuo ng rekomendasyon mula sa pangyayaring ito ang Department of Environment and Natural Resources o DENR at CENRO office ng Nabas.

Bagay na pag-aaralan di umano nila ayon kay Merlita Ninang CENRO Officer ng Nabas at Boracay ang mapa ng GEO Hazard Area sa land slide partikular sa nasabing bayan.

Bagamat kinumpirma nito na mayroon talaga silang nakita area sa nasabing bayan na hindi ligtas sa land slide.

Pero sa pagkaka-alam aniya nito ay hindi sa area ng Tulingon, ganon paman, pag-aaralan aniya nila ang mapa saka sila gumawa ng rekomendasyon.

Sakali naman maideklarang delikado para sa land slide ang nabangit na lugar ayon kay Ninang, ang magagawa aniya nila ay magrekomenda na ilikas ang mga naninirahan sa lugar na iyon.

Subalit dahil sa tabing kalsada at National Highway pa ang area na ito, masuri umano nilang pag-aaralan ang bagay na ito kung ano ang nakakabuti.

Libo libong pasahero at turista, stranded dahil sa Land Slide sa Nabas

Ni Edzel Mainit, Senior Field Reporter, YES FM Boracay

Stranded ang libo-libong pasahero lalo na ang mga turista pabalik ng Maynila at papuntang Boracay dahil sa land slide o pag-guho ng lupa at bato mula sa bundok sa Sitio Tulingon Barangay Libertad sa bayan ng Nabas.

Dahil dito, natabunan ang high way na tanging daan papunta sa bayan ng Kalibo mula sa Caticlan, rason para mag-alburuto ang mga pasahero.

Ayon kay SP04 Crispin Calzado ng Nabas Pulis, halos sampung metro o kasin taas ng isang bus ang ang kapal lupang tumabon sa kalsada mula sa bumigay ng bundok sa tabi ng daang ito.

Mahigit kumulang dalawangput lima hanggang tatlongpung metro ang haba ng kalsadang natabunan ng lupa kaya hindi maka-diritso ang mga sasakyan.

Dagdag pa dito, pahirapan din ang pagtanggal sa mga lupang tumabon sapagkat maging pati mga punong kahoy ay nadala din sa pag guho ng lupa.

Dahil dito, para makahabol lamang sa mga flights ang mga turista mula sa Boracay, kahit maputik at mahirap ang sitwasyon, kaniya-kaniyang akyat sa gumuhon lupa ang mga turistang ito, lamang makatawid sa kabilang bahagi ng kalsada at makasampa sa ibang sasakyan papunta sa bayan ng Kalibo.

Samantala kung ang mga turistang ito ay nag-aalburuto sa naranasang sitwasyon, tila nakita naman ng opurtunidad ang ilang residente sa nasabing lugar sapagkat nag-mistulang porter at napagkakakitaan ito ng mga taga doon, na siyang nagbubuhat ng mga bagahe ng mga turistang ito.

Tulong-tulong naman ang Baranggay at lokal na pamahalaan ng Nabas sa pagtanggal sa lupang gumuho, samantala ang mga  Pulis mula sa bayan ng Nabas, Public Safety Company at High Way Patrol ay naroon din para alalayan ang mga pasahero.

Pero kinulang parin ang bilang ng mga ito para mailipat lahat ng mga pasahero sa kabilang bahagi ng kalsada.

Wala namang nai-ulat na nasugatan o nasawi dala ng pangyayari, maliban sa epektong hatid nito sa mga pasahero.

Pinapaniwalaang bumigay ang bundok dahil sa ulan na naranasan hanggang nitong umaga kaya lumabot ang lupa at bumigay ang bundok nitong tangahali.

Bandang alas singko na ng hapos natapos ang pagtanggal sa tumabong lupa at bato mula sa bundok at naka-usad ang mga na stranded na sasakyan dito.

Pagpapa-New Born Screening sa mga sanggol sa Malay, ginawang ordinansa

Ni Edzel Mainit, Senior Field Reporter, YES FM Boracay

Suportado at nais ipatupad ngayon ng lokal na pamahalaan ng Malay partikulan ng Sangguniang Bayan ang pagsailalim sa New Born Screening ng mga bagong panganak na sanggolsa bayan ng Malay at isla ng Boracay.

Ito ay sa kabila na mayroon nang batas at nakasaad na ito sa Republic Act No. 9288 sa nasyonal na dapat talaga ay idaan sa eksaminasyon ang katawan ng bagong panganak na sanggol kahit pa sabihing may kamahalan ang magagastos para dito.

Pero naniniwala ang konseho na malaki din aniya ang magagawa nito at sulit dahil mapanatiling malusog at ligtas sa ano man sakit na maaaring mamana ng sanggol mula sa mga magulang nito.

Dahil dito, hiniling ni Sangguniang Bayan Member Natalie Cawaling-Paderes na nagpasa ng ordinansa para pagtibayin ang RA 9288 at masigurong maipapatupad sa bayan ito.

Subalit ang ordinansa ukol dito ay patuloy pa ring dinidinig sa konseho, na naglalayong mabigyan ng malinaw na kinabukasan ang sanggol sa paraan ng pagpanatili ditong ligtas sa sakit mula pagkabata.