Saturday, March 14, 2015

Petrowind Energy magsasagawa ng testing ng power distribution bukas

Posted March 14, 2015
Ni Jay-ar M. Arante, YES FM Boracay
               
Bukas na umano ang gagawing test power distribution sa grid ng Petrowind Energy, Inc. sa bayan ng Nabas sa Aklan.

Ito ang sinabi ni Akelco Engr. Joel Martinez, kung saan ang nasabing umanong testing ay para masukat ang kapasidad ng wind power production ng nasabing kumpanya.

Nabatid na ang Petrowind wind farm sa Nabas ay naglalayong makapag-bigay ng 50 megawatts na power ng kuryente kung saan ito rin ang ikinukunsidira bilang pinakamalaking single investment sa probinsya ng Aklan ngayon.

Sinabi pa nito na ang test operation ay para matukoy na ang bagong tayong wind farm ay handa ng makapag-generate ng elektrisidad.

Samantala, ang Petrowind wind na itinayo sa paanan ng bundok sa bayan ng Nabas ay inaasahang bubukasan din sa publiko para maging isang tourist destination sa probinsya ng Aklan kung saan tanaw mula dito ang isla ng Boracay at Carabao, Island sa Romblon.

5 meters setback sa lahat ng mga ilog sa Malay ipapatupad

Posted March 14, 2015
Ni Jay-ar M. Arante, YES FM Boracay

Isang ordinansa ang nilagdaan ni Malay Mayor John Yap, upang ma-protektahan ang kalikasan lalo na ang mga ilog sa bayan ng Malay.

Ito ay ang Municipal Ordinance 198 kung saan mahigpit na ipinagbabawal ang pagtatayo ng ano mang structures o bahay limang metro mula sa ilog kasama na ang mga estero, lakes o lagoon sa huridikasyon ng Malay.

Sa ginanap na Symposium day of action river sa Boracay kahapon dito ibinahagi ng Task Force Bantay Kalikasan ng LGU Malay kasama ang Environmental Management Bureau (EMB) sa lahat ng mga dumalong Brgy. Officials ang kahalagahan ng ilog.

Ayon kay Mayor Yap dapat umanong ingatan at alagaan ng bawat isa ang ilog sa Malay para sa kinabukasan ng mga susunod na henerasyon.

Nabatid naman mahaharap sa ibat-ibang parusa ang sino mang lumabag sa nasabing setback katulad na lamang ng pagbayad ng penalidad na nagkakahalaga ng P2, 500, tatlong buwang pagkakulong o anim na buwan dependi sa desisyon ng hukuman o pag-demolish ng kanilang structures.

Kaugnay nito isang Tree planting activity ang ginagawa ngayong araw ng mga Brgy. Officials ng Malay bilang pakikiisa sa International Day of Actions for Rivers ngayon buwan ng Marso.

Malay Mayor John Yap, ipinag-utos ang paghuli sa mga sasakyang walang mayor’s permit at sticker

Posted March 13, 2015
Ni Bert Dalida, YES FM Boracay

Image result for traffic codeAprubado na ang Municipal Traffic Code ng Malay.

Kasabay nito, ipinag-utos na ni Malay Mayor John Yap ang paghuli sa mga sasakyang walang mayor’s permit at sticker sa pamamagitan ng Memorandum Order No. 2015-14.

Bahagi umano ito ng epektibong transport and traffic management sa territorial jurisdiction ng Malay.

Base sa memorandum na naging epektibo nitong March 1, 2015.

Mahaharap sa karampatang penalidad ang sinumang mahuli na walang kaukulang dokumento ang kanilang mga sasakyan.

Kaugnay nito, inatasan ng alkalde ang Malay PNP, Boracay PNP, LGU-Malay Transportation Regulation Office, Malay Municipal Auxiliary Police na ipatupad ang kautusan.

Samantala, kasunod  ng memorandum, ipinabatid naman ng Malay Transportation Office o MTO na mag-iisyu sila ng bagong Traffic Violation Ticket sa mga mahuhuling violators.

Ipinaalala din ng MTO ang pagpapatupad kaugnay sa paglalagay ng taripa, pagsuot ng uniporme at sitting capacity sa mga tricycle at pampublikong E-Trikes.

(Update) L300 van na nahulog sa palayan nitong Lunes, nasa kustodiya pa rin ng Numancia PNP

Posted March 13, 2015
Ni Gloria Villas, YES FM Boracay

Isang settlement ang namagitan sa dalawang driver na nag-agawan ng pasahero sa Tabangka, Numancia, Aklan.

Ito ang kinumpirma mismo ng imbestigador sa kaso na si PO3 Willie Akidado ng Numancia PNP Station.

Subalit sinabi din nito na nanatili parin sa kanilang kustodiya ang van na nahulog sa palayan na minamaneho ni Ernesto Wares.

Ito’y dahil sa hindi pa umano natatapos ang imbestigasyon tungkol dito.

Kaugnay nito, nilinaw din ni Akidado na nasa parehong kooperatiba ng CBTMPC ang dalawa.

Magugunita na nagalit ang driver na si Ernesto Wares sa driver na si Abraham Tabasa, matapos na pinik-up umano ng huli ang isang pasahero sa Pob. Numancia Aklan na papasakayin din sana ni “Ernesto”.

Dahil sa galit, dinikitan ni “Ernesto” si “Abraham” at sinunggaban, subalit nawalan ito ng kontrol at dumausdos ang kanyang sasakyan sa palayan, dahilan upang magkaroon ng ilang minor injuries ang apat nitong pasahero.

Friday, March 13, 2015

Boracay tinanghal bilang favorite beach destination ng Malaysia tourism fair

Posted March 13, 2015
Ni Jay-ar M. Arante, YES FM Boracay

Isa na namang karangalan ang nakuha ngayon ng isla ng Boracay.

Itinanghal kasi ito bilang Favorite Beach Destination 2015 ng Malaysian Association of Tour & Travel Agents (MATTA).

Nabatid na ito’y inanunsyo ng MATTA sa isang press conference nitong Marso 9 kaugnay sa kanilang taunang fair ngayong araw hanggang bukas sa Putra World Trade Center sa Kuala Lumpur.

Ayon naman kay Philippine Embassy MATTA organizing committee chairman S. Jayakumar, ang Boracay white sand beach umano at ang Pilipinas ay mayaman sa natural resources at biodiversity.

Pinasalamatan naman ni Ambassador J. Eduardo Malaya ang Malaysians para sa rekognisyong ito kung saan ang Malaysia umano ay ang ika-siyam na pinakamalaking tourist market nitong 2014 na may 27.24-percent increase sa tourist arrivals ng Pilipinas.

Dagdag pa nito na malaki umanong karangalan sa bansa na madiskubre ang Boracay dahil sa pristine white sand nito at nakakamanghang baybayin na nakakapukaw atensyon sa mga bisita para sa kanilang nature-tripping.

Samantala, ito ang ika-apat na pagkilala sa Boracay ngayong taon kung saan nakuha nito ang mga parangal ngayong lamang Pebrero bilang 2015 best beach in Asia, number 7 best beach in the World at 2015 World's 2nd Best Beach for Partying.

Pagsugpo sa mga illegal commissioners sa Boracay, nagpapatuloy

Posted March 13, 2015
Ni Bert Dalida, YES FM Boracay

Image result for commissioner in boracayMas “feeling safe”na ngayon ang mga turista habang namamasyal sa beach front ng Boracay.

Dahil ito sa mas pinaigting na police visibility sa umaga at gabi lalo na’t inaasahan ang pagdagsa ng mga turista ngayong summer season.

Subali’t maliban sa police visibility, kapansin-pansin ang patuloy na clearing operation ng mga kapulisan at Task Force Boracay Philippine Army laban sa mga ilegal na komisyoner sa Boracay.

Nabatid na daan-daang activity brochures na rin ang nakumpiska ng grupo sa halos mag-iisang buwan na rin nilang operasyon.

Samantala, kasabay nito, ikinatuwa ng mga turista lalo na ng mga foreign tourists ang pagpapatrolya ng mga kapulisan at Philippine Army sa beach at vegetation area dahil mistulang nabawasan na ang mga makukulit na komisyoner.

Magugunitang ilang ulit nang nakatanggap ng reklamo ang mga taga Department of  Tourism at maging ang mga taga Boracay PNP mula sa mga turista dahil sa panloloko at pang-i-estafa umano ng mga tinagurian ding pasaway sa isla.

Pagtaas ng kaso ng aksidente sa kalsada dahil sa mga aso, pinag-usapan sa SP Aklan

Posted March 12, 2015
Ni Gloria Villas, YES FM Boracay

Image result for SP Aklan yes fm boracayNaka-iskedyul ngayon sa isang committee hearing ng Ad Hoc Committee sa SP Aklan ang pagtaas ng kaso ng aksidente sa kalsada, kung saan sangkot ang mga aso.

Sa ginanap na 16th Regular Session ng Sangguniang Panlalawigan, napag-usapan ang patuloy na pagtaas ng ganitong kaso.

Ayon sa SP Aklan, mahalagang mapagtuunan ng pansin ang mga asong palaboy-laboy lamang sa kalye o highway na syang isa sa mga naging dahilan ng pagkakaaksidente ng mga motorista.

Magugunita na matagal na ring problema ang mga aso sa kalsada dahil bukod sa naging sanhi ito ng aksidente, nagdudumi din ito at minsa’y nangangagat sa mga taong dumadaan.

Kaugnay nito, hinihikayat naman ng Compassion and Responsibility for Animals (CARA) ang lahat na e-report ang gumagalang aso sa otoridad.