YES THE BEST 911 BORACAY

Friday, March 09, 2018

Illegal Pipe Connections nadiskubre sa ginawang Clearing Operation ng LGU-Malay

Posted March 9, 2018

Image may contain: 4 people, people standing and outdoorSa kasagsagan ng clearing operation ng LGU Malay sa vegetation area nitong umaga ay tumambad sa kanila ang samu’t-saring illegal pipe connections na naglalabas ng waste water sa long beach ng Boracay.

Sa pagbungkal ng ilang pipes sa Station 1 area, bumulaga ang mga linya ng pipes na naglalabas ng kitchen waste na pa-simpleng inilibing sa buhangin para hindi matanaw ng mga dumaraan.

Ganito rin ang nadiskubre sa harap ng isang Chinese Restaurant sa Station 2 na maliban sa paglabag sa waste water management o Municipal Ordinance No. 307 ay napag-alaman na hindi rin nakapag-renew ng business permit ng dalawang taon ang nasabing establisyemento.

Sa magkaparehong kaso, halatang galing kusina ang wastewater dahil na rin sa kalidad at kulay na may halo pang mantika, indikasyon na hindi gumamit ng grease trap ang mga violators.

Ayon sa mga Sanitary Inspectors, nahaharap sa closure ang mga lumabag na restaurants at iri-rekomenda nila ito sa Municipal Health Office para sa karampatang penalidad.

Ito na ang pangalawang bugso ng demolition operation ng LGU pagkatapos nilang winalis ang lahat ng illegal structure sa Puka Beach Yapak nitong nakalipas na araw.

Image may contain: shoes and outdoorKasama ang Engineering Office, Licensing Office, MPDO ng Malay at ilang enforcers ay sinuyod nila ang kahabaan ng long beach para hikayatin ang mga occupants sa vegetation area na mag self-demolish.
Pinatatanggal din ang lahat ng mga tents at outdoor installations kagaya ng mini-bar at mga nakasabit sa mga niyog na signages.

Sa paglilinaw ng LGU, papayagan pa rin ang paglatag ng mga mesa at upuan sa vegetation area sa limitadong oras na “sunset to sunrise” kung saan dapat maligpit ito kinaumagahan para maging maaliwalas at malinis tingnan at mai-enjoy ng turista ang ganda ng Boracay Beach.

PCCI-Boracay pabor sakaling isailalaim ang Boracay sa “State of Calamity”

Posted March 9, 2018
Ni Inna Carol L. Zambrona, YES THE BEST Boracay

Isang wake-up call sa lahat ang nakatakdang pagsailalim ng Boracay sa State of Calamity ni Pangulong Rodrigo Duterte ayon ng Philippine Chamber of Commerce & Industry- Boracay President Elena Brugger.

Ani Brugger, tanggapin sa positibong paraan ang hakbang na gagawin ng pangulo dahil naniniwala siya na para ito sa ikabubuti ng Boracay.

Ito na umano ang tamang oras na ang bawat isa lalo na ang mga negosyante na makipag-pagtulungan para maisalba ang isla sa usaping kalikasan.

May legal din na basehan sakaling mangyari ito dahil partikular na pinunto ng pangulo sa kanyang talumpati sa oath taking ng mga opisyal ng Presidential Anti-Corruption Commission (PACC) sa Malacanang na isinaalang-alang nito ang isyung pangkalusugan at kaligtasan ng publiko.

Ani Brugger, huwag nang magsisihan at ang tanging gawin ay suportahan ito upang ma-preserve ang natitirang likas na yaman at kagandahan ng isla para may masisilayan pa ang mga turistang piniling magbakasyon sa white beach na Boracay.

Kaugnay nito, pabor din ang lokal na Pamahalaan ng Malay sa kagustuhan ng pangulo sa oras na isailalim sa state of calamity ang Boracay.

Sa ngayon ay wala pang petsa kung kailan ito ipapatupad ng pangulo.

Nabatid, una nang nagbabala si President Duterte na ipasasara ang Boracay kung hindi mareresolba ang isyung pang-kalikasan sa loob ng anim na buwan.

Wednesday, March 07, 2018

Puka Beach Boracay, unang nag-self demolish

Posted March 7, 2018
Ni Inna Carol L. Zambrona, YES THE BEST Boracay

Image may contain: one or more people, tree, plant, sky and outdoorSinimulan na kaninang umaga ng Lokal na Pamahalaan ng Malay ang demolisyon sa mga iligal na istraktura sa kahabaan ng Puka Beach sa Yapak Boracay.

Pinangunahan ni Mayor Ceciron Cawaling kasama sina Executive Assistant IV - Rowen Aguirre, Municipal Planning and Development Coordinator Alma Belejerdo, Municipal Engineer Elizer Casidsid, Executive Assistant for Environmental Concerns - Engr. Jan Michael Tayo, at DENR Region 6 ang pakikipag-usap sa mga nagbebentang vendors doon na nag self-demolish na dahil sa paglabag ng 25+5 easement rule.

Una rito, pinaalam na umano ni Yapak Punong Barangay Hector Casidsid sa mga may-ari ng mga establisyemento doon na gibain na ng kusa ang kanilang mga stalls upang sa oras na magsagawa ang LGU Malay demolition operation ay wala na silang problema.

Pinagtulungang gibain ng Malay Auxiliary Police o MAP ang mga establisyemento kung saan napag-alaman na ang ilan ay doon na rin natutulog.

Image may contain: one or more people, sky, tree, basketball court, child, outdoor and natureSamantala, inamin ng ilang maliit na negosyante na inabisuhan na sila subalit nagbakasakali lang sila na magbenta pa upang maubos ang lahat ng kanilang paninda.

Dagdag pa ng ilan sa mga nagiba na wala na umano silang magagawa kundi sundin nalang ang ipinapatupad na patakaran subalit ang problema nila ngayon ay kung saan sila magbebenta na pagkukunan ng kanilang pang-araw-araw na gastusin.

Kaugnay nito, sinabi ni Executive Assistant IV - Rowen Aguirre uunahin nilang i-demolish ang mga nasa front beach bago ang ibang area na kanilang target na linisin.

Panawagan ni Aguirre sa establisyemento, kung alam naman nilang sila ay may violation sa ipinapatupad na ordinansa ay mas maiging magself-demolish na sila at huwag ng hintayin ang LGU na puntahan sila.

Maliliit na vendors umapela na dapat isabay ang malalaking Violators sa pag-demolish

Posted March 7, 2018
Ni Inna Carol L. Zambrona, YES THE BEST Boracay

Image may contain: one or more people, outdoor, nature and waterUmapela ngayon ang mga maliliit na vendors na dapat isabay ang malalaking violators sa kanila sa isasagawang self demolition alinsunod sa apela ni Mayor Ceciron Cawaling upang ma-resolba at maayos na ang problema sa Boracay.

Labis ang pagkadismaya at pagtatanong ng mga maliliit na negosyante kung bakit sila ang inuuna na i-demolish.

Pagtatanong ng mga ito, paano na ang kanilang pamilya, anak na pinag-aaral, pagkain sa araw-araw at gastusin kung wala na silang mapagkukunan ng income.

Ganito rin ang sintemyento ng ilang netizens sa social media habang pinapanood ang live video ng self-demolition ng DENR Region-6.

Umapela rin ang mga apektadong negosyante na kung maaari ay may area silang malilipatan na mapupuntahan ng turista ng sa gayon ay hindi mawala ang kanilang pangkabuhayan.

Ngayon araw nagsimula ang LGU Malay sa pag-demolish ng mga iligal na istraktura sa mga road right of ways, sidewalks, at baybayin alinsunod sa utos ni Malay Mayor Ceciron Cawaling.

Traffic sa Boracay, pina-susulusyonan ni SB Gallenero

Posted March 7, 2018
Ni Inna Carol L. Zambrona, YES THE BEST Boracay

Image may contain: one or more people, people sitting, table and indoor“Problema talaga ang traffic sa Boracay”.

Ito ang puna ni Sangguniang Bayan Member Jupiter Gallenero sa ginanap na SB Session kahapon sa bayan ng Malay.

Nais ng konsehal na mag-request sa transport office na pinamumunuan ni Malay Transportation Officer Cesar Oczon ng kabuuang bilang ng mga sasakyan sa loob ng Boracay.

Partikular na binanggit ni SB Gallenero ang mga sasakyan ng hotel, Haulers, Private Vehicle, at Club Car maliban pa sa mga single motorbikes at public transport.

Paalala ni Gallenero na dapat ay regulated, halimbawa nito ay mga hotel service kung saan dapat nakadepende ito sa kung ilang kwarto mayroon ang kanilang hotel.

Samantala, sa panayam naman kay Oczon, patuloy umano ang kanilang monitoring sa mga sasakyan ng mga hotel dahil hindi nila ito pinahihintulutan na bumyahe kung wala silang parking area.

Sa mga mag katanungan bukas ang kanilang opisina sa mga reklamo, maaari umanong tumawag sa numerong 288-8767.

Tuesday, March 06, 2018

Mayor Cawaling hinikayat ang mga Violators na mag self-demolish


Posted March 6, 2018
Ni Inna Carol L. Zambrona, YES THE BEST Boracay

Hinihikayat ngayon ni Malay Mayor Ceciron Cawaling ang publiko lalo na ang mga nakitaan ng paglabag na magsasagawa na ng self-demolition.

Sa isang video statement, binanggit ng  na pupunteryahin ng LGU Malay ang mga establisyementong nasa side walk, road right of ways, mga illegal structures sa mga dalampasigan ng Puka Beach, Tulubhan Beach, Tambisaan Beach, Balinghai Beach, Malabunot at ManocManoc Proper.

Nakatakda ang demolition operation ng LGU Malay sa Miyerkules, ika-pito ng Marso na layuning malinis at maibalik ang natatanging ganda ng isla ng Boracay alinsunod narin sa kautusan ng Presidente Duterte na ayusin ito sa loob ng anim na buwan.

Bago nito, may ilang establisyemento na ang nag-sara pagkatapos silbihan ng DENR ng “Notice to Vacate” at “Demolition Notice” dahil sa paglabag ng ilang environmental laws.