YES THE BEST 911 BORACAY

Friday, February 10, 2012

DPWH-Aklan, may solusyon na para sa landslide sa Nabas


Ni Edzel Mainit, Senior Field Reporter, YES FM Boracay

“Coco Net Bio-Engineering Solution” ang nakitang sagot sa problema kaugnay sa soil erosion na nangyari sa Sitio Tulingon Brgy. Libertad sa Nabas na tumabon sa National High way kamakailan lamang, ayon kay Engr. Rory Laserna, Chief Engineer for maintenance ng DPWH-Aklan.

Ayon kay Laserna, ang Coco Net Bio-Engineering Solution ay siya umanong tutulong para ma-protektahan ang bundok mula sa pagkatibag at pagkahulog ng lupa at mga bato sa kalsadang ito na lubhang mapanganib sa mga dumadaan sa nasabing lugar.

Ang Coco Net Bio-Engineering Solution na ito ay tinatawag na “Slope Protection Program” ng DPWH.

Sinabi ni Laserna na kasalukuyan na umanong pina-plantsa ang “program of works” para sa proyektong ito, upang pormal na ring maisumite sa Central Office at mabigyan ng pondo.

Nabatid din mula kay Laserna na ang proyektong ito ay inaasahang aabot sa P2M para lamang sa area ng Tulingon.

Subalit ng matanong ang enhinyero kung kaylan ipapatupad ang nasabing proyekto, sinabi nitong hiling sana nilang magawa na ito sa loob ng taong ito ng 2012, ngunit naka-depende pa rin aniya kung kaylan sila bibigyan ng pondo.

Ang “Coco Net Bio-Engineering Solution” ay isang pangmatagalang solusyon at programa para protektahan ang bundok sa paraan ng paggamit ng coir o coco fiber, na inilalagay para takpan ang bahagi ng bundok na pinangangambahang bibigay, dahil sa kawalan ng vegetation.

Dahil sa ang coco fiber ay organic, inaasahang mas mabilis ang tubo o paglago ng mga pananim dito, na siyang makakatulong para maiwasan ang land slide.

Ang programang ito ng DPWH, ay siyang nakita nilang tugon upang hindi na maulit pa ang nangyaring pag-guho ng lupa ng tumabon sa National High Way rason para ma stranded ang mga biyahero. 

Landslide sa Nabas, hindi imposibleng maulit


Ni Edzel Mainit, Senior Field Reporter, YES FM Boracay

Aminado ang municipal engineer ng Nabas na hindi imposibleng mangyari ulit ang land slide sa Sitio Tulingon Brgy. Libertad, katulad sa nangyaring pagguho kamakailan lamang at natabunan ang National High Way sa lugar na ito.

Ayon kay Engr. Rodgedy de Castro, Municipal Engineer ng Nabas, hindi sila kampanate hanggang sa ngayon sa sitwasyon ng bundok na ito sa Sitio Tulingon, lalo pa at nabatid nilang may bitak na at nalambot ang lupa kaya pinanga-ngambahan itong bumigay kapag umulan.

Kaugnay nito, gumawa na aniya sila ng report sa Department of Public Works and Highway-Aklan (DPWH-Aklan), ukol sa sitwasyon ng bundok na ito at nagsumite na rin aniya sila ng rekomendasyon doon.

Samantala, nilinaw naman ngayon ni de Castro na maliban sa Sitio Tulingon sa Libertad at Brgy. Habana sa Nabas, wala na silang nakitang bundok na malapit sa High Way na mapanganib sa posibilidad na pag-guho.

Matatandaang kamakailan lamang, na stranded ang mga pasahero lalo na ang mga turista sa nasabing Barangay ng magkaroon ng land slide, gayong tanging ang kalsadang ito ang nag-iisang daan papasok at palabas ng Caticlan at papuntang Kalibo.

Para sa kaligtasan ng mga kliyente, BIHA, naghihigpit na sa bangka at tripulante


Ni Edzel Mainit, Senior Field Reporter, YES FM Boracay

Para masiguro ang kaligtasan ng mga turistang naglalayag sa dagat habang nagsasagawa ng kanilang aktibidad katulad ng Island Hopping sa Boracay, gaghigpit na ngayong ang pamunuan ng Boracay Island Hopping Association Multi Purpose Cooperative (BIHA-MPC) sa kanilang mga bangka gayon din sa mga tripulanteng miyembro nila para masigurong hindi na maulit ang nangyaring sakuna sa Sitio Ilig-iligan sa Yapak kung saan sampung turista ang napasama sa tumaob na bangka, bagamat na ligtas ang mga ito hindi naman pinalad ang kapitan ng bangka.

Sa panayam kay Rey Fernando Operation Manager ng BIHA, ginawa nila ang paghihigpit na ito alinsunod na rin sa kautusan ng MARINA, na lahat ng bangka ng kooperatibang ito ay magkaroon kahit isang unit ng radio, upang madaling ma-contact mga tripulanteng miyembrong ng asosasyong ito habang nasa laot  at makaiwas sa oras ng hindi inaasahang pangyayari gayon din ma-monitor ang mga ito.

Sapagkat ayon kay Fernando, bagamat uso na ang cellphone ngayon, tiwala parin sila sa radio, lalo pa at may ilang bahagi ng isla na walang signal unamo.

Dagdag pa nito, kailangang nakasuot na ng uniporme ang kanilang tripulanteng miyembrong ng BIHA, upang madaling malaman kung kabilang nga ito sa asosasyon nila.

Matatandaang dumanas ng sakuna ang isang bangka ng BIHA kamakaylan lang, kung saan ang coordinator/tour guide na nakasampa doon ay hindi rehistrado sa BIHA ayon kay Fernando. 

Aklan Gov. Carlito Marquez, nanghihinayang sa reklamasyon sa Caticlan


Ni Edzel Mainit, Senior Field Reporter, YES FM Boracay

Isa sa naging laman ng State of the Province Address (SOPA) ni Aklan Governor Carlito Marquez noong ika-walo ng Pebrero, ang ukol sa gumaganda pang industriya ng Turismo ng Aklan lalo na ang pag-lago ng turismo ng Boracay.

Sa ulat ng gobernador, ikinatuwa umano nito ang pagtaas ng bilang ng mga turista sa Boracay nitong nagdaang taon ng 2011, gayong din tumaas ang kita ng Caticlan Jetty Port kasabay ng pagdami ng mga turistang ito.

Dahil dito, kumpiyansa ang nasabing gobernador na ngayong 2012 ay kakayanin nang maabot ang isang milyong tourist arrival para sa Boracay.

Subalit sa SOPA nito, ipinaabot ni Marquez ang labis niyang pinanghihinayangan sa pagpapatigil ng reklamasyon sa Caticlan, kung saan ito na sana aniya ang sulosyon sa problemang kinakaharap ng mga turista,  dahil sa kulang pa sa pasilidad at hindi mabigyan ng maayos na serbisyo dahil sa li-lima lamang ang pantalan para sa mga bangka.

Inihayag din ng nasabing gobernador, na ang turismo ang isa sa malaking pinagkukunan ng kita ng probinsiya.

Samantala, nabatid na ngayong taon ng 2011 kumita ang pantalan ng RORO sa Caticlan Jetty Port ng mahigit dalawangput apat na milyong piso kumpara noong nagdaang taon ng 2010 na kumita lamang ng mahigit dalawangput dalawang milyong piso. 

Sunday, February 05, 2012

Imbestigasyon sa pagpatay sa babaeng watersport staff, sinubaybayan ni PD Defensor


Ni Edzel Mainit, Senior Field Reporter, YES FM Boracay

Personal na sinadya ni Police Senior Supt. Conello Defensor Provincial Director ng Aklan Police Provincial Office ang isla partikular ang Boracay Police para masigurong maayos at mapabilis ang gagawing imbestigasyon sa pagbaril at makapatay kay Crisanta Vicente, empleyado ng isang water sports establishment sa Boracay kamakalawa sa Sitio Lapus-lapus, Barangay Balabag.

Kasabay nito, nabatid na sa ngayon ay dumating rin na ang ni-request na tao mula sa Regional Office para magawa na ang cartographic sketch ng itinuturong suspek at responsable sa pagpatay sa biktima sa tulong na rin ng witness.

Hanggang sa ngayon ay hindi pa matukoy ng awtoridad kung sino ang salarin at kung ano ang motibo sa krimen.

Dahil dito, puspusan na ang pagsasagawa ng imbestigasyon ng Boracay Special Tourist Police Office o BSTPO para makilala at matugis na ang bumaril nakapatay at tumangay sa perang dala ng biktimang si Vicente nang mangyari ang krimen, na pinapaniwalang nagkakahalaga ng mahigit P100,00.00

Boracay, sisikip sa pagdating 500 e-trikes


Ni Edzel Mainit, Senior Field Reporter, YES FM Boracay

Umaasa ang BLTMPC o Boracay Land Transportation Multi-Purpose Cooperative na hindi hahayaan ng lokal na pamahalaan ng Malay partikular ng Sangguniang Bayan na maipasok ng sabay-sabay ang limang daang unit ng e-trike sa isla.

Ito ay kasunod ng pahayag ni SB Member Dante Pagsugiron na balak na ngayon taon ng 2012 ng Department of Energy (DoE) na ipasok ang ipanangako at nilaang e-trike para sa Boracay.

Subalit ayon kay Ryan Tubi ng BLTMPC, umaasa sila na hindi ito bibiglain na LGU, gayong alam naman umano ng lahat na marami na ang sasakyan sa isla at baka lalo pang sumikip ang kalsada sa Boracay.

Dahil dito, kung matuloy man ang 500 unit ng e-trike, hiling ni Tubi na sana ay isipin muna ng kinauukulan kung ano ang gagawin sa mga tricycle mayroon ngayon sa Boracay, bago ipasok ang mga electric tricycle na ito.

Samantala, kaugnay sa usaping ito, batid naman umano ng kooperatiba ang balak na ito ng DoE, lalo na magbibigay dalawangpung unit para sa Boracay, kung saan sampu dito ay para sa BLTMPC at sampu ay para sa SB at ngayong taon ng 2012 ang launching.

Ngunit dahil sa tila hindi na aniya makapaghintay ang LGU, tinanggap na ang samgpung unit ng e-trike na naririto ngayon sa isla, pero hindi umano ito ang ipinangako ng DoE, sa halip ay mula ito sa ibang supplier.

Mga tricycle driver sa Malay at Boracay, pinapakuha na ng ID sa PESO


Ni Edzel Mainit, Senior Field Reporter, YES FM Boracay

Aminado ang Municipal Transportation Officer ng Malay na si Cezar Oczon, na may karagdagan na ngayong isang daang piso ang bayarin ng mga driver operator at driver ng triclycle sa Boracay kapag magrenew ang mga ito ng kanilang prangkisa.

Ayon kay Oczon, kailangan ng ngayon kumuha ng Identification Card ang lahat ng mga driver ng tricycle sa Boracay at mainlang Malay sa PESO o Public Employment Service Office ng bayang ito, at ang babayran sa pagkuha ng ID na ito ng isang daang piso.

Ito ay dahil maliban umano sa ID ng mga driver ngayon sa isla na ibinigay at kinuha sa BLTMPC o Boracay Land Transportation Multi-Purpose Cooperative, nais na rin ngayon ng lokal na pamahalaan ng Malay na mabilang kung may ilang tricycle driver na sa isla ng Boracay at sa mainland Malay.

Layunin din, ayon kay Oczon, ng LGU sa pagpakuha ng ID na ito, ay upang magkaroon din ng rekord ang lokal na pamahalaan ng Malay, sa pagka-kilanlan ng mga driver na ito.