YES THE BEST 911 BORACAY

Friday, October 12, 2012

Boracay Island Hopping Association, iginiit na dapat nang sumali sa Boracay Action Group

Malbert Dalida, News Director, YES! FM Boracay

Dapat nang sumali sa Boracay Action Group ang BIHA o Boracay Island Hopping Association.

Kailangan na umano kasing i-upgrade at i-ayon sa standard ng turismo ang lahat ng mga sea sports activities sa isla ng Boracay.

Ito ang sinabi kanina ni Boracay Island Administrator Glenn Sacapaño kaugnay sa mga regulasyong pinag-usapan kahapon sa pulong ng LGU Malay at mga taga Boracay Island Hopping Association.

Maliban sa sinabi nito kanina na papi-pinturahan ng bughaw at puti ang mga pump boat ng BIHA, ikinatuwa umano ni Sacapaño na nagkasundo ang lahat sa mga inilatag ng alkalde at ng konseho doon.

Ilan sa mga ito ay ang pagkakaroon na ng 200 meter setback para sa anchoring ng mga bangka saan mang bahagi ng isla, upang hindi maapektuhan ang rehabilitasyon ng mga korales.

Dapat ay ipatupad na rin umano ng BIHA ang pag-‘display’ng taripang inilatag ng MARINA o Maritime Industry Authority, upang maiwasang malito at mabiktima ng mga nananamantalang komisyoner ang mga turista.

Naniniwala umano si Sacapaño na hindi na sana umabot sa puntong pinag-uusapan ang tungkol sa mga komisyoner kung wala silang natanggap na reklamo ng pang-aabuso.

Kung kaya’t sinabi nitong dapat ang mismong mga taga BIHA na ang magsilbing pulis para sa kanilang mga quest o turista, at tumulong sa mga programa ng BAG, sa pamamagitan ng pagsali dito.

Pare-parehong kulay para sa mga bangka ng BIHA, isinulong ng LGU Malay

Malbert Dalida, News Director, YES! FM Boracay

Bughaw sa ilalim at puti naman ang sa itaas.

Ito na ang inaasahang magiging kulay ng mga bangka ng BIHA o Boracay Island Hopping Association sa isla sa susunod na mga araw.

Isinulong kasi kahapon ng LGU Malay ang pagkakaroon ng pare-parehong pintura sa mga nasabing pump boat bilang dagdag atraksyon sa mga turista.

Maliban sa pagpapa-pintura ng bughaw at puti, ilalagay din sa mga bangka ang logo ng “Sali Ako Diyan” ng BBMP o Boracay Beach Management Program.

Sa panayam ng himpilang ito kay Boracay Island Administrator Glenn Sacapaño, sinabi nitong maliban sa pagiging atraksyon ay matutukoy din ang mga colorum na mga bangkang nag-o-operate sa isla.

Sisimulan umano ang paglulunsad ng nasabing plano sa araw ng Huwebes, ikalabing lima ng Nobyembre ng taong kasalukuyan, kung saan sampu muna mula sa mahigit dalawang daang bangka ng BIHA ang pipinturahan.

Ayon pa kay Sacapaño, para hindi mabigat para sa mga operator ay si mismong Mayor John Yap na ang maghahanap ng mga sponsor para dito, na sinang-ayunan naman umano ng mga taga BIHA.

Ang nasabing plano ay ilan lamang umano sa mga pinag-usapan kahapon, sa ipinatawag na pagpupulong ng LGU sa mga taga Boracay Island Hopping Association.

Island Administrator ng Boracay, hindi takot makasuhan

Nanindigan ngayon si Island Administrator Glenn Sacapaño na itutuloy talaga nila ang demolisyon sa Boracay West Cove Resort, lalo na at kapag hindi gumalaw ang may-ari na sila na mismo ang magpatanggal sa di umano ay illegal na straktura doon.

Ayon kay Sacapaño, noong una pumayag sila na ang resort na ang magtatanggal, pero kung maghintay pa umano sila, tila walang nangyayari at ang tanong ay kung kaylan pa umano gagawin iyon.

Kaya binalikan na umano ng lokal na pamahalaan ng Malay ang area na ito upang ituloy ang demolisyon.

Lalo pa at may pinanghahawakan naman silang dokumento at tapos na ang Habagat Season na siyang nagpapahirap sa grupo nila para ituloy ang pag-titibag doon.

Nilinaw din ng Island Administrator na kahit sakaling ibigay pa ng West Cove sa LGU ang pamamahala sa mga straktura na ito kaysa ipa-giba pa.

Sinabi nitong hindi talaga puwede dahil pag-aari ang propidad na ito ng National Government.

Dagdag pa nito, sa ginawa nila ngayon, hindi na kailangan pa ng Court Order dahil wala naman kasong isinampa, hanggang pati ang Temporary Restraining Order o TRO na hiniling ng Resort para ipagpaliban ang demolisyon ay nabasura din umano.

Samantala, hindi naman mababahala si Sacapaño na masampahan ito ng kaso ng kampo ng may-ari ng Resort, dahil may mga legal naman umano silang basehan. ecm102012

West Cove, umaasa pa sa maayos na pag-uusap

Hindi naman na naka-imik ang kampo ng West Cove ng ituloy ng lokal na pamahalaan ng Malay ang demolisyon sa iba pang bahagi ng straktura doon na hindi na sakop FLAg-T na pinanghahawakan ni Mr. Crisostomo Aquino ang may-ari ng resort.

Bagamat sinabi nito sa press conference kahapon na naghahanda na sila magsampa ng kaso laban sa di umano ay illegal na pag-demolish sa istraktura doon.

Sa panayam kay Atty. Acxel Gonzales, isa sa abogado ni Aquino nitong tanghali, pinag-iisipan pa umano nila ang mga bagay na ito sa ngayon, dahil tila nakita nila na wala naman problema na ipatupad ang LGU ang demolisyon.

Pero mariing kinuwestiyon pa rin nito kung bakit walang Court Order, ngunit batid naman umano nila na sa ganitong usapin ang korte parin ang makakasagot kaya tititingnan nila ang mga posibilidad muna bago magkaso.

Lalo na aniya at sinasabi ng LGU Malay na ang ipinapatupad nila ay ang utos nagmula sa DILG at DENR, gayong umaasa sila na magkakaroon parin ng magandang resulta ang negosasyong nangyayari sa bahagi ng bawat panig at umaasang madadaan pa ito sa maaayos na usapan. ecm102012

Petsa ng Ati-atihan sa Boracay, nais baguhin

Plano ngayon ng lokal na pamahalaan na ilipat ang petsa ng pagdiriwang ng Ati-atihan sa Boracay at hintaying matapos ang Ati-atihan sa bayan ng Kalibo.

Ito ang inihayag ni Felix delos Santos, Chief Tourism Officer ng Malay, kung saan balak na aniya ngayon ng Alkalde na hinilingin sa simbahan sa isla na gawin na lamang na huling Linggo o Sabado idaos ang Ati-ati dito, upang mapaghandaan pa ng mahabang panahon ar dahil halos ang selebrasyon umano ng Ati-atihan dito ay nakadikit na rin sa pagdirawang ng araw ng Pasko at Bagong Taon.

Aminado ang Chief Tourism Officer na inutusan na nga ito ng Punong Ehekutibo na kausapin ang simbahan kaugnay dito kung saan may ideya na rin umano ang Holy Rosary tungkol dito, subalit wala pa silang desisyon.

Umaasa naman ang LGU na sasang-ayon ang simbahan at mapapatupad na ito ngayon 2013.

Pero nilinaw ni delos Santos na ang desisyon ay nasa simbahan pa rin dahil aktibidad nila ito.

Dagdag pa nito, layunin lamang ng Punong Ehikutibo para dito ay upang ang mananalo sa sa Kalibo ay iimbitahn din dito sa Boracay para makibahagi para sa promosyon ng turismo.

Matatandaang ang Ati-atihan sa Kalibo ay pinadiriwang tuwing ikatlo ng Sabado at Linggo ng Enero, samantala sa Boracay ay unang Linggo naman ng Enero. ecm102012

Vice Mayor Ceceron Cawaling, pansamantala lang ang pamamahinga sa pulitika

Tila masaya naman si Malay Vice Mayor Ceceron Cawaling sa desisyon nitong hindi na muna tumakbo o magpapili sa isang posisyon sa bayan ngayong 2013 Midterm Elections.

Napapangiti na lamang ito sa kaniyang desisyon nang makatanggap ng pagbati mula sa mga meyimbro ng Sangguniang Bayan sa katatapos lang na sesyon kaugnay sa kaniyang pagreretiro sa politika dahil naging maganda  umano ang kanyang serbisyo sa kaniyang mga nakalipas na termino.

Subalit bagamat natatawa ito, makahulugan naman ang naging sagot ni Cawaling sa mga konsehal na naroroon sa Session Hall, dahil pansamantala lamang umano ito.

Samanatala, maging si SB Member Wilbec Gelito na kumakandidato para sa posisyong Vice Mayor at Mayor John Yap na magpapapili ulit sa pagka-Alkalde ay binati na rin SB.

Ito ay dahil malinaw na umano na panalo ang dalawa sa eleksiyon dahil walang mga katungali. ecm102012

Wednesday, October 10, 2012

Pag-demolish ng LGU Malay sa istraktura ng West Cove, iligal! --- Crisostomo Aquino

Nakahanda na ang mga abogado ni Crisostomo Aquino, may ari ng Boracay West Cove Resort sa Brgy. Yapak, na magsampa ng kaso laban sa lokal na pamahalaan ng Malay, partikular na kay Mayor John Yap.

Ito ay kapag natuloy ang demolisyon sa deck na nasa harap ng nasabing resort, ayon sa mga abugado ni Aquino.

Sa pahayag na ginawa ni Atty. Dan Florante Roxas, bagamat palagay nila ay maaaring huli na ang lahat dahil nasira na ang ilang istraktura, at kapag matuloy man bukas ang demolisyon, ngunit nanindigan pa rin sila na hindi dumaan sa tamang proseso ang lahat.

Dagdag pa dito, isang malaking pagkakamali umano sa bahagi ng LGU na nagpa-demolish sila nang walang court order at walang nangyayaring opisyal na cadastral survey sa area bago ang aksiyon.

Sa halip ay isang sulat lamang ang ipinrisenta sa kanila noong ika-dalawampu’t-siyam ng Hunyo taong kasalukuyan na naglalaman ng rekomendasyon mula sa Department of Environment and Natural Resources sa LGU na aksyunan na ang problema sa West Cove.

Ngunit hindi ito dumaan sa korte at walang court order.

Kaya naniniwala si Aquino na illegal ang demolisyon na ginawa ng LGU.

Sa official statement ni Aquino na binasa ni Atty. Roxas kahapon, huli na umano nang na-realize ng kanyang kliyente ang pagpapakumbaba nila sa unang demolisyon dahil sa pag-aakalang matapos ang pangyayaring iyon ay makikinig na ang LGU sa kanilang mga apela at ipinaglalaban pero hindi ito nangyari.

Samantala, hanggang sa ngayon ay naninindigan pa rin si Aquino na nakahanda pa rin sila na ibigay sa pamahalaan ang area na lumagpas sa 998 sq. m. na hindi sakop ng FLAg-T kaysa sa i-demolish pa umano at maaaring makasira pa ang mga debris sa dagat. ecm102012

Mga prodyuser at suplayer mula sa iba’t-ibang rehiyon sa bansa, maghaharap sa isang “speed matching” event sa Boracay

Masarap ‘ika nga ang puto na ipartner sa dinuguan, at ang suman naman ay sa mangga.

Subali’t ang pagpapares o pagpapartner pala ay hindi lamang sa mga pagkain.

Maging sa mga produktong pang-turismo ay pwedeng-pwede rin pala ito.

Sa darating na araw kasi ng Biyernes ay magtitipun-tipon ang mga prodyuser at suplayer ng mga hotel at resort mula sa region 3, 4, at 6 na kinabibilangan ng Bohol, Cebu, Palawan, Davao, at Cagayan de Oro, kasama na ang Aklan.

Hinikayat ang mga ito na magdala ng kanilang mga “sample”at mga “promotional materials” upang iharap o i-“match” sa mga produkto naman ng iba pang mga delegado.

Ayon pa sa DTI o Department of Trade of Industry Aklan, ang nasabing matching event ay pagkakataon din para sa mga producers at suppliers na magkaroon ng patuloy na ugnayan o business agreement tungo sa matatag na industriya ng turismo.

Gaganapin naman ang Speed Matching na ito sa isang resort sa station 3, Boracay, alas onse hanggang alas singko ng hapon, sa ilalim ng Leveraging Industries for Supply Chain (LINCs) program ng DTI. md102012

Isang milyong tourist arrival ng Boracay, maaabot na sa loob ng isang buwan

Inaasahang sa pagtatapos ng buwan ng Oktubre ay maaabot na rin ang isang milyong target na tourist arrival ng Boracay.

Ito ay dahil simula noong Enero hanggang nitong katapusan ng Setyembre ay nakapagtala na ang Municipal Tourism Office ng Malay ng 932, 648 tourist arrivals.

Nasa 67,000 tourist arrivals na lang ang kulang sa ngayon o katumbas ng isang buwang record ng tourist arrival para maabot na ang target.

At sa bawat buwan, hindi bumababa sa 70,000 turista ang dumarating sa Boracay.

Kaya kapag matapos ang buwang ito na mapanatili ang record at trend ng statistic ng Tourist Arrival, siguradong maaabot na ito.

Samantala, nanatiling mga Koreans pa rin ang nanguna sa may pinakamaraming bilang ng turista sa isla, na sinundan naman ng mga Chinese at Taiwanese.  ecm102012

Isyu sa landfill ng Malay, nalinawan na

Nasermunan tuloy si Engr. Arnold Solano, Special Project Officer ng Malay ng Sangguniang Bayan.

Ito ay makaraang malamang wala namang nakitang pagkukulang ang kontraktor na RA Builders sa P38-million na landfill ng Malay bago i-implementa ang proyekto.

Sa paraan ng presentasyon si Engr. Edmund Sese, Authorized Managing Officer ng R2 Builders sa isinagawang sisyon ng konseho kaugnay sa di umano ay kuwestiyunableng proyektong ito.

Subalit sa mga pahayag ni Sese, kumbisido naman ang SB sa naging sagot nito at nalamang taliwas pala sa mga na unang pahayag ni Solano na umano ay iniba ang desinyo ng proyekto at niliitan ang area.

Nilinaw din ng kontraktor na aprubado aniya ng alkalde ang design ng landfill gayong ang R2 Builders naman ay pinahintulutang siyang lumikha ng disenyo at gumawa proyekto.

Dagdag pa ni Sese, ang P38-million na pundo na na-bidding ay pang-phase 1 lang ng proyekto.

Kung saan, hindi lamang talaga para sa paglalagyan ng basura mula sa Boracay, napunta ang pundo kundi pati ang gusali at kalsadang bulubundukin sa loob ng landfill papunta sa imbakan mula sa main road.

Naroroon din naman at dumalo si Solano sa sesyon at siya ang nagsiwalat kaugnay sa sitwasyon ng land fill, tuloy napagsabihan pa ito ng konseho, lalo na at nakapagdala ito ng pag-alala sa SB.

Bunsod nito, nalinawan na rin ang konseho kung bakit lumiit ang area ng paglalagyan ng residual na basura mula sa Boracay, kaya mabilis itong napuno at hindi na umabot sa taong target na mapupuno ito. ecm102012

Aklan, nahahanay na sa “billionaire province” pagdating sa buwis

Buwan pa lang ng Setyembre ay nalampasan na ng Bureau of Internal Revenue (BIR) Aklan ang target collection ng buong distrito.

Bagay na labis na ikinatutuwa naman ni Revenue District Officer (RDO) Ricardo Osorio dahil sa tatlong buwan pa bago magtapos ang taon ay nalampasan na ang P914 million target para sa taong 2012.

Katunayan, ayon kay Osorio, may surplus nang mahigit dalawangpung milyon ngayon ang Kawanihan sapagkat ang koleksiyon nila sa kasalukuyan ay umabot na sa P935 million.

Kaugnay nito, ang Aklan, ayon kay Osorio, ay mahahanay na sa mga “billionaire province” pagdating sa nakokolektang buwis, gayong inaasahaang maaabot hanggang Disyembre ang bilyong koleksiyon na ito.

Bagamat nitong nagdaang buwan ng Agusto simula noong Enero ay umabot lamang sa P804 million ang collection ng BIR at buwan pa ng Nobyembre inaasahang maaabot ang target.

Subalit dahil sa isang transaksiyon ng real estate sa Boracay na nagbayad ng P76 million, biglang nalampasaan agad ang target.

Samantala, laking pasalamat naman ng RDO sa kooperasyon ng mga tax payer at mamamahayag sa Aklan sa tulong na naibigay sa Kawanihan para makamit ang magandang performance ng BIR kahit pa kulang umano sila sa tao. ecm102012

Karagdagang mga polling precincts, target ng Comelec sa Aklan

Matagumpay at walang naging problema ang eleksiyon noong 2010 gamit ang mga PCOS machines.

Kaya nakikita umano ni Provincial Commission on Election (Comelec) Supervisor Atty. Ian Lee Ananoria na walang anumang problema kaugnay dito sa darating na 2013 na halalan.

Gayon pa man, napansin aniya nito ang sitwasyon noong nagdaang eleksiyon na may ilang polling percents na mahaba talaga ang pila.

Bagay na ngayon pa lang ay ikinukunsidera na nila ang pagkakaroon ng mga karagdagang presinto para mapabilis ang pagboto ng publiko sa daratating na May 2013 elections.

Ito aniya ang nakita nilang solusyon lalo pa at nadagdagan ngayon ang mga botante.

Kung matatandaan, noong 2010, ilang suliranin ang dinanas ng ipatupad ang pag-gamit sa Precinct Count Optical Scan (PCOS) machines, kabilang na ang kawalan ng signal sa ilang area sa Aklan kaya kailangan pang ilipat ng lugar upang makapag-transmit ng datos ang machine, dagdagan pa ng ilang indibidwal na nnahihirapang gumamit ng aparato sapagkat iyon ang kauna-unahang eleksiyon na ginamit ang machine.

Samantala, ngayong tapos na ang Filling of Certificate of Candidacy (CoCs) noong ika-5 ng buwang ito, agad naman binuksan ng Comelec ang tanggapan nila para sa mga nais magparehistro, transfer, at magpa re-activate upang maging kwalipikadong botante para sa 2013 midterm elections. ecm102012

Monday, October 08, 2012

Mahigpit na pagbabawal sa paliligo kapag nakataas ang Red Flag sa Front Beach, nais ipatupad


Dahil sa sunod-sunod na insidente ng pagkalunod na naitala sa Boracay sa loob lamang ng isang araw, nitong nagdaang Miyerkules, ika-3 sa buwan ng Oktubre, napag-usapan na umano sa Emergency Meeting na ipinatawag na Malay Mayor John Yap noong ika- apat ng Oktubre.

Ito ay ayon kay Philippine Coast Guard OIC Station Commander ng Caticlan Chief Petty Officer Ronnie Hiponia, kasabay ng pagpapahayag na hihigpitan na talaga nila ang pagpapatupad sa pagbabawal nang paliligo sa front beach kapag masama ang panahon.

Maliban dito dahil sa hindi pa umano alam ng mga turista kung ano ang kahalagahan ng Red Flag na siyang itinataas na nagsasabing bawal na ang paliligo.

Plano umano ng Punong Ehikutibo na palaparin ang kaalaman ng Publiko kaugnay sa Red Flag na ito at pipilitin nilang magkaroon ng taong mag-iikot sa front beach na ang trabaho ay pagbawalan at bigyang babala ang mga nais maligo at mga maliligo sa dagat.

Maliban dito, upang madaling makita ang Red Flag ay lalakihan na ito.

Aniya, ang mga bagay na ito ay pagtutulungang gawin ng mga miyembro ng Boracay Action Group.

Gayon pa man, sa bahagi umano ng Coast Guard, ginagawa naman nila ang lahat ng paraan para masiguro ang kaligtasan ng publiko sa Boracay. | ecm102012

Imbestigasyon sa tumaob na bangkang sinakyan ng mga Taiwanese National, hindi pa tapos


Hindi pa naiisasara ng Philippine Coastguard sa Caticlan ang kanilang imbestigasyon kaugnay sa tumaob na bangkang pang-island Hopping nitong nagdaang Miyekules, kung saan lulan ang 31 katao na kinabibilangan ng mga turista, tour guide at tripulante.

Noong Sabado, sinabi ni Chief Petty Officer Ronie Hiponia, OIC Station Commander ng PCG-Caticlan, hindi pa nila nakukunan ng statement ang tour guide ng mga Taiwanese national na kasama sa tumaob na bangka kung ano talaga ang nangyari.

Gayon pa man, nangako ito na sa oras na matapos ang kanilang imbestigayon at kung ano man ang resulta, nasa kamay na umano ng Regional Office ng Coast Guard ang pagpataw ng karampatang penalidad sa operator ng bangka.

Sa ngayon, tila wala pa naman umanong natatanggap na reklamo ang PCG mula sa mga biktima na pinabayaan sila ng may-ari ng nasabing sasakyang pandagat dahil sa pagkakaalam aniya nito ay binalikat naman ng operator ang gastos ng mga biktima.

Samantala, dahil sa nakumpirmang tatlong insidente agad ang naitala sa loob lamang ng 24 oras sa araw mismong iyon, kabilang na ang paglubog ng bangka sa Tabon Port ng madaling araw na iyon, pagkalunod ng mga estudyante sa front beach, tatlo ang binawian ng buhay at insidente ng pagtaob ng bangkang sinasakyan ng Taiwanesse National pagkahapon, agad naman umanong nagpatawag ng Emergency Meeting ang Punong Ehekutibo para maaksiyunan at mapagplanuhan ang mga bagay, upang hindi na maulit pa ang pangayayari. | ecm102012

Mayor John Yap at SB Member Wilbec Gelito, walang makakalaban sa 2013 Midterm elections:17 kandidato sa pagka- SB Member

Ano na? Sino ang makakalaban niya? Kakandidato ba siya? O di kaya’y kakandidato ba siyang muli?

Ilan lamang ito sa mga bulong-bulungan at lumaganap na mga katanungan tungkol sa mga kakandidato sa 2013 Midterm Elections sa bayan ng Malay nitong nagdaang mga araw.

Ang mga nabanggit namang mga katanungan ay mabilis na nasagot, pagpatak ng alas singko kahapon ng hapon, matapos ilabas sa media ni Malay Election Officer Elma Cahilig ang pangalan ng mga kakandidato.

Maging ang ilang mga taga munisipyo ay nagkaroon ng iba’t-ibang reaksyon nang makumpirma mula sa COMELEC na walang makakalaban sa pagka-alkalde si Mayor John Yap.

Panatag din ang ilan sa mga taga suporta ni SB Member Wilbec Gelito, nang mabatid na wala rin itong makakatunggali sa pagka-bise alkalde.

Samantala, inaasahang magka-kanya namang diskarte sa pangangampanya ang nasa labimpitong kakandidato bilang miyembro ng Sangguniang Bayan.

Tatlo rito ang sa ilalim ng political party na UNA o United Nationalist Alliance na si dating vice mayor Frolibar “Fromy” Bautista, Edwin Martin, at Ralf Tolosa.

Pinili naman nina Rowen Aguirre, Antonio Cahilig Jr., Manuel Delos Reyes, Danilo Delos Santos, Jupiter Gallenero, Leal Borreros Gelito, at Paterno Sacapaño na sumilong sa ilalim ng Liberal Party.

Sa kabilang daku, minarapat namang maging independente o walang partido nina Jonathan Cabrera, Roldan Casidsid, Felicito Lumbo Jr.,Edwin Pelayo, Robert Tumaob, at Dionisio Tupas Jr.

Tanging si Natalie “Nat-nat” Cawaling-Paderes naman na tatakbo din sa pagka SB Member ang solong sumailalim sa Nationalista Party.

Kumpirmado ring si John Yap ay sa partidong liberal, habang si Wilbec Gelito ay sa sala ng Nationalista Party. | ap102012