Saturday, July 06, 2013

Labi ng pinaslang na dalaga sa bayan ng Makato inihatid na sa huling hantungan

Ni Jay-ar Arante, YES FM Boracay

Inihatid na sa kanyang huling hantungan ang 26-anyos na biktima ng pamamaslang na si Leah Lee Cipriano ng Brgy. Estancia, Kalibo, Aklan.

Ayon kay Aklan Police Provincial Office (APPO) Public Information Officer PO3 Nida Gregas, kanina umanong ala-1:00 ng hapon ay idinaos ang misa para sa labi ni Cipriano sa Cathedral sa bayan ng Kalibo.

Dinagsa ito ng mga nakiramay dahil na rin sa masaklap na sinapit nito sa kamay ng mga pumatay sa kanya.

Matatandaang ang biktimang si Leah Lee ay pinaslang nitong nakaraang buwan lang at natagpuan na lamang ang kanyang bangkay sa isang hukay sa masukal bahagi ng kakahuyan sa Brgy. Agbaeogo, Makato, Aklan na naka-silid na sa sako.

Sa ngayon ay patuloy pa rin ang imbestigasyon ng binuong Task Force Cipriano ng APPO, kung saan ilan na umano sa anim na mga suspek ang lumutang at inamin ang kasalanang nagawa.

DOT Boracay, patuloy na umaasa sa pagbabawal ng pag-gamit ng plastic sa isla

Ni Jay-ar Arante, YES FM Boracay

Patuloy pa ring umaasa ang Department of Tourism sa pagbabawal sa pag-gamit ng plastic sa isla ng Boracay.

Ayon kay DOT Officer in Charge Tim Ticar, pabor umano ang kanilang tanggapan na maisabatas ang pagbabawal sa pag-gamit ng mga plastic na nagiging sanhi ng pagdami ng basura at pagbabaha sa lugar dito sa isla ng Boracay.

Aniya, mas lalo itong dapat na sundin sa mga palengke dito sa isla at hindi lang sa mga department stores dahil ang palengke umano ang mas malimit na gumamit ng plastic araw-araw dahil sa mga namimili.

Dagdag pa ni Ticar, kung wala nang gagamit ng plastic sa isla ay maaaring mabigyan pa ng hanap-buhay ang mga mamamayan sa pag-gawa ng bayong o anumang uri ng lalagyan ng mga pinamili.

Kung matatandaan, pumabor din ang ilang mga lokal na residente sa Boracay tungkol dito kung maisasabatas na ng LGU Malay ang nasabing usapin.

Naipatupad na rin sa ibang bahagi ng bansa ang pagbabawal sa pag-gamit ng plastic, at plano na rin itong ipatupad sa bayan ng Kalibo.

Purisima, pinangunahan ang seremonya para sa itatayong Tourist Police Training School sa Boracay

Ni Jay-ar Arante, YES FM Boracay

Pinangunahan ni Philippine National Police (PNP) Director General Alan La Madrid Purisima ang isinagawang ceremonial groundbreaking para sa itatayong Boracay Tourist Police Training School sa isla.

Ang nasabing training school ay para umano sa mga pulis sa Boracay upang madagdagan pa ang kanilang kaalaman sa pagre-responde sa anumang pangyayari lalo na pagdating sa treatment ng mga turista.

Sinabi naman nito na dapat bawat pulis ay sumunod sa kautusan ng batas at irespeto ito.

Dapat din umanong iwasan ang mga maling Gawain, at kung nakikita umano nila ang komunidad na nakikipag-tulungan sa kanilan dapat na suklian din umano nila ito ng serbisyong maganda at makatotohanan.

Ang nasabing ceremonial groundbreaking ay ginanap kahapon ng hapon sa Sitio, Bantud, Manoc-Manoc dito sa isla ng Boracay, kasabay ng pagbibigay rin sa kanila ng 20 units ng mountain bikes na nagmula pa sa Public Safety Savings and Loan Association Inc.

Pakikipagtulungan ng pribadong sektor sa LGU Malay, ikinatuwa ni Mayor John Yap

Ni Malbert Dalida, YES FM Boracay

Ikinatuwa ni Mayor John ang pakikipagtulungan ng pribadong sektor sa LGU Malay.

Sa eksklusibong panayam ng himpilang ito kay Malay Mayor John Yap, sinabi nito na hindi magiging maayos ang Boracay kung hindi makikibahagi at magmamalaskit ang lahat para sa isla.

Partikular na tinukoy ng alkalde ang partisipasyong ibinahagi ng ilang stakeholders para sa mga taga-Boracay PNP.

Maliban kasi sa isang daan at limampung pares ng sapatos na ibinigay ng taga Taiwan Chamber of Commerce sa mga magbibisikletang pulis sa isla.

Kinumpirma din mismo ni Mayor Yap na si Commodore Leonard Tirol ng Boracay Action Group ay nagdonate ng lupang pagtatayuan ng Boracay Tourist Action Center sa Barangay Manoc-manoc.

Kaugnay parin sa nasabing balita, naniniwala naman umano ang nasabing alkalde na maa-upgrade o lalong magiging mahusay ang mga kapulisan sa isla.

Samantala ginanap ang Ceremonial Ground Breaking of Boracay Tourist Police Training Center at Turn-over of Bicycle Patrol to Boracay Tourist Assistance Center kahapon, na dinaluhan naman ng mga taga LGU at stakeholders.

Friday, July 05, 2013

Palawan at Boracay, kinilala bilang pinakamagandang isla sa buong mundo

Nina Jay-ar Arante at Malbert Dalida, YES FM Boracay

Kinilala bilang pinakamagandang isla sa buong mundo ang Palawan at Boracay.

Base sa naitalang record ng New York Travel and Leisure magazine mula December 2012 hanggang April 2013, nanguna ang Palawan habang pumangalawa ang isla ng Boracay, laban sa Maui ng bansang Hawaii, Santorini ng Greece, Prince Edward Island ng Canada, Bali ng Indonesia, Kauai ng Hawaii, Sicily ng Italy, Koh Samui ng Thailand at Galapagos ng bansang Ecuador.

Kaugnay nito, wala naman umanong dapat na ikadismaya ang sambayanang Pilipino tungkol dito dahil ang Palawan naman ang pumalit sa numero unong puwesto ng Boracay na ipagmamalaki pa rin ng bansang Pilipinas.

Samantala, hindi pa rin naman ng nagpapahuli sa ngayon ang isla ng Boracay kung pagiging tourist destination ang pag-uusapan.

Katunayan, pinaghahandaan na ngayon ng pamahalaang probinsya ng Aklan ang pagbisita ng mga cruise ships sa Boracay sa mga susunod na buwan bago matapos ang 2013 at maging sa 2014.

Dating Malay konsehal Dante Pagsuguiron, gustong maging observer sa SB Session ng Malay

Ni Jay-ar Arante, YES FM Boracay

Gusto umano ngayon ni dating Sangguniang Bayan Dante Pagsuguiron na maging observer sa tuwing magkakaroon ng session ang SB Malay tuwing Martes.

Sa naging pahayag nito sa isinagawang inaguration speech ng mga new set officials nitong nakaraang Martes sa Malay session hall, inamin nitong gusto niyang maging observer sa mga baguhan at sa mga dating kasamahan nito sa konseho sa tuwing isinasagawa nila ang lingguhang session.

Aniya, nais niyang kapag magkakaroon ng mga bagong ordinansa na gustong maipatupad ang mga konsehal ay siya ang magiging tulay o ang magpapa-abot kay Mayor John Yap ng mga napag-usapan sa nasabing session.

Pero sa ngayon, nais niya pang hilingin kay Mayor Yap kung papayagan siya nito sa nais niyang mangyari na kahit wala na ito sa pagiging konsehal ay buo pa rin umano ang kanyang loob na maglingkod sa nasabing bayan.

Matatandaang naglingkod ng halos siyam na taon si Pagsuguiron bilang konsehal sa bayan ng Malay at natapos nito ang kanyang termino nitong nakaraang buwan ng Hunyo.

20 mountain bikes para sa mga pulis sa Boracay, iti-turn over na ngayong araw

Ni Christy Dela Torre, YES FM Boracay

Ngayong araw ay nakatakdang i-turn over sa mga miyembro ng Boracay Tourist Assistance Center (BTAC) ang 20 units ng mountain bikes.

Ayon kay Boracay Tourist Assistance Center Chief Police S/Insp. Joeffer Cabural, ang naturang turn-over ceremony ay pangungunahan ni Philippine National Police (PNP) Director General Alan Purisima.

Inaasahang dadaluhan din ito nina Provincial Governor Joeben Miraflores, Mayor John Yap, Department of Tourism (DOT) Regional Director Atty. Helen Catalbas, (Department of Interior and Local Government (DILG) Regional Director for Region 6 Evelyn Trompeta, at ilang mga inimbitahang stakeholders sa isla.

Ang seremonya ay kasabay din ng ground breaking ceremony para sa ipapatayong PNP Tourist Training School sa Sitio Bantud, Brgy. Manoc-Manoc.

Ayon pa kay Cabural, ang kahalagahan ng naturang mga bisikleta ay hindi para makipag-kumpetensya sa mga motorsiklo, kundi upang mas mapadali ang agarang pag-responde sa anumang krimen sa isla.

Layunin din umano nito na mas mapalawak pa ang area of responsibility ng mga pulis lalo na sa oras ng pagpapatrolya ng mga ito.

Matatandaang 20 miyembro na ng BTAC ang sumailalim sa “bicycle training” dalawang linggo na ang nakakalipas sa Camp Delgado, Iloilo City.

Ito ang pinaka-unang batch ng training para sa bagong programang ito ng PNP, at ang unang pokus nito ay ang Western Visayas, partikular na sa tourist destination sa isla ng Boracay.

Thursday, July 04, 2013

Isla ng Boracay, muling bibisitahin ng cruise ships

Ni Peach Ledesma, YES FM Boracay

Dalawang cruise ship ang inaasahang muling bibisita dito sa isla ng Boracay ngayong taon.

Sa panayam ng himpilang ito Caticlan Jetty Port Administrator Nieven Maquirang, sinabi nito na ang unang barko ay nakatakdang dumating sa Oktubre 17, na susundan ng isa pang cruise ship sa Nobyembre 3, na pawang nasa ilalim ng international cruise line na Star Cruises.

Kaugnay nito, nakatakdang magpulong ang mga taga Department of Tourism, LGU Malay, stakeholders at iba pang mga ahensya para mapaghandaan ang pagdating ng mga nasabing barko.

Ani Maquirang, minimal na lang naman ang mga gagawing dagdag sa preparasyon dahil hindi na rin naman bago para sa kanila ang pag-daong dito ng mga cruise ships.

Matatandaang noong 2012 at unang bahagi ng 2013 ay may mga cruise ships na ring nag-stop over dito para bumisita sa isla.

Samantala, isang cruise ship pa ang inila-lobby na dumaong din dito sa Boracay sa Disyembre 2013 upang masaksihan naman ang sikat na fireworks display ng isla sa pag-salubong sa Bagong Taon.

"Hindi p’wedeng mag-fogging kahit may dengue." --- Malay Municipal Health Office

Ni Jay-ar Arante, YES FM Boracay

Hindi puwede mag-fogging kahit may kaso na ng dengue.

Ito ang iginiit ngayon ni Municipal Health Officer Dr. Adrian Salaver, kaugnay sa kaso ng dengue sa Boracay, partikular sa sitio Din-iwid, Barangay Balabag.

Sa panayam ng himpilang ito kay Salaver, sinabi nito na kung gagamitan ng fogging ang lugar na may kaso ng dengue ay balewala lang umano ito, dahil hindi din naman nito masyadong mapupuksa ang mga lamok.

Sa halip, maitataboy lang ng fogging ang mga lamok pupunta sa ibang lugar at makaka-biktima pa ito ng iba.

Ayon pa kay Salaver, ang pagpapa-fogging ay kinakailangan lamang kung sadyang marami nang biktima sa iisang lugar lamang.

Kaugnay nito, minarapat na lamang na ipaalala ni Salaver na sundin ang apat na “S” na inilunsad ng Department of Health (DOH) para makaiwas sa dengue.

Ang unang “S” ay “seek and destroy” na nagsasabing dapat linisin ang mga lugar na posibleng pamugaran ng mga lamok.

Ang pangalawang “S” naman ay “seek early consultation” na nagpapaalalang huwag nang hintayin pa ang paglala ng lagnat at magpa-konsulta agad sa doktor.

Sunod naman nito ay “self protection” kung saan kailangang magsuot ng mga damit na may mahahabang manggas lalo na sa mga bata at maglagay ng kulambo sa oras ng pagtulog.

At ang pang-huling “S” naman ay “say no to fogging” dahil dapat na gamitin lamang ito kung may dengue outbreak na sa lugar.

Ang nasabing reaksyon ay may kaugnayan sa “concern” na ipinaabot ng isang nagngangalang Randy Ronquillo sa Facebook account ng himpilang ito.

Dito ay nanawagan si Ronquillo na kung maaari sana ay mapausukan ang kanilang lugar.

Ito’y matapos umanong mabiktima ng dengue ang kanyang buong pamilya nitong nagdaang Sabado.

Sa katunayan, nag-post din ito ng kanyang sariling litrato kasama ang kanyang pamilya sa isang ospital habang ginagamot.

Ayon pa kay Randy, may iba pang pasyente mula sa Boracay ang dinala doon na umano’y nabiktima din ng dengue.

Wednesday, July 03, 2013

Sinasabing pangmamaltrato sa K-9 unit sa Jetty Port, ipapa-alam sa kinauukulan kapag napatunayan --- Admin. Maquirang

Ni Peach Ledesma, YES FM Boracay

Ipagbibigay-alam umano sa kinauukulan kung mayroon mang pangmamaltratong nangyayari sa mga asong nasa K-9 unit sa jetty port.

Ito ang naging reaksyon ni Caticlan Jetty Port Administrator Nieven Maquirang tungkol sa isang litrato na isinangguni ng isang concerned citizen sa himpilang ito.

Sa larawan na naka-post sa isang social networking site, makikita ang isang lalake na naka-suot ng itim na pang-itaas na makikita ang mga katagang "K-9 UNIT" at pinaniniwalaang handler ng aso.

Kasama sa larawan ang isang golden retriever labrador, isang uri ng aso, at ayon sa caption ay minamaltrato umano ito ng lalaking nabanggit.

Ang nasabing larawan ay ipinost noong ika-dalawampu't apat ng nakaraang buwan, 2013.

Ayon kay Maquirang, dalawa lang naman ang mayroong K-9 unit sa Caticlan Jetty Port.

Ang isa ay ang Philippine Coast Guard (PCG) na siyang nangangasiwa sa seguridad ng buong pantalan, kasama na ang mga sasakay sa RORO, ayon na din sa ipinatutupad ng Philippine Ports Authority (PPA).

Ang isa naman ay hawak ng isang pribadong shipping company, bilang bahagi ng kanilang security.

Anya, iimbestigahan umano nila ang bagay na ito.

At kung totoo mang may pangmamaltrato sa mga K-9 ay agad nila itong irereport sa grupong in charge sa mapapabalitang inaabusong aso.

Dagdag pa ni Maquirang, kung naka-suot ng itim na pang-itaas ang nabanggit na lalake, malamang ay hindi ito miyembro ng PCG dahil orange ang uniporme ng mga ito.

Una nang umani ng pambabatikos ang litratong ito mula nang i-post sa social networking site kung saan ito ngayon makikita.

Mayor John Yap, pinangunahan ang inaguration speech ng mga new set of officials ng Malay

Ni Jay-ar Arante, YES FM Boracay

Pinangunahan ni Mayor John Yap ang inauguration speech ng mga bagong opisyales ng konseho sa bayan ng Malay.

Ginanap ito kahapon ng umaga sa Malay session hall na dinaluhan din ng ibat-ibang departments heads ng LGU Malay gayon din ng mga miyembro ng private sectors sa nasabing bayan.

Dito isa-isang nagbigay ng mensahe ang mga konsehal na kapwa nagpasalamat sa mga tumulong sa kanila upang makamit ang tagumpay.

Nangako din ang mga ito na gagawin nila ang kanilang trabaho sa abot ng kanilang makakaya para sa lalo pang pag-buti ng bayan ng Malay.

Malugod naman silang tinanggap ni Mayor Yap at newly elect Vice Mayor Wilbec Gelito, na nagsilbing presiding officer sa nasabing inugarasyon.

Inaasahan din umano nila ang mga bagong ordinansang ipapatupad ng mga SB officials.

Samantala, isa-isa ding nag-paabot ng kanilang mensahe ang mga department heads at ipinaabot din ang kanilang pagbati sa mga bagong miyembro ng konseho.

Tuesday, July 02, 2013

Ilang residente ng Boracay, sang-ayon sa pagbabawal ng paggamit ng mga plastic, sakaling ipatupad din ng LGU Malay

Ni Mark Anthony Pajarillo, YES FM Boracay

“Okay lang sa amin at mas maganda nga ‘yun eh!”

Ito ang naging pahayag ng ilan sa mga lokal na residente sa isla ng Boracay, sakaling ipatupad din ng LGU Malay ang katulad na iminungkahing ordinansa sa bayan ng Kalibo.

Ang ordinansang ito ay kaugnay sa pagbabawal sa paggamit ng mga plastik bag at styrofoam bilang check-out bag o pambalot sa mga pagkain dito sa isla ng Boracay.

Hindi maikakaila sa madla na itong mga supot ng plastik at styrofoam ang isa sa mga dahilan kung bakit bumabaha ang ilang bahagi ng Boracay.

Ito kasi ang bumabara sa mga drainage na siya sanang daluyan ng mga baha.

Ayon sa mga lokal na residente na nakapanayam ng himpilang ito, malaking bagay na ipagbawal ang paggamit ng mga plastik dahil malaki ang maibabawas nito sa bilang ng mga basura na syang numero uno nating problema dito sa isla ng Boracay.

Ngunit sa kanilang pagtatantiya malamang kung ipatutupad na agad-agad ang kautusang ito.

Hindi pa umano handa ang ibang lokal na residente dito sa isla, sapagka’t nasanay na nga ang ilan sa paggamit ng mga plastik at styrofoam at mahihirapan ang ilan sa pag-a-adjust.

Ngunit kung uumpisahan na umano natin ng mas maaga, ito’y malaking bagay din naman sa para sa pagbibigay lunas sa suliranin sa basura sa isla.

Pahayag pa nila na sa una lang tayo mahihirapan ngunit kung tayo ay magtutulungan para sa iisang layunin na mapanatiling malinis ang islang ito.

Suspek na umano’y hindi nakabayad sa tinutuluyang resort sa Boracay, aminadong humihingi ng donasyon para sa UNICEF

Ni Malbert Dalida, YES FM Boracay

Inamin ngayon ni David Kohl, suspek sa kasong estafa at swindling sa Boracay, ang panghihingi nito ng donasyon para sa UNICEF o United Nations International Children's Emergency Fund.

Sa eksklusibong panayam ng himpilang ito kay Kohl, sinabi nito na sila ang taga-marketing department ng UNICEF at may permit din umano silang pinanghahawakan mula sa Kalibo at Malay.

Magkaganoon pa man, nasa Maynila na ang iba niyang kasama at siya ang naiwan dito sa Boracay.

Ang siste, mag-isa ito ngayong nasa kostodiya ng Boracay PNP matapos ireklamo ng dalawang resort ng estafa dahil sa umao’y hindi ito nakabayad sa kanyang mga obligasyon.

Iginiit pa ni Kohl na ang kanyang bayarin sa unang nagreklamong resort na mahigit animnapung libo ay naayos na.

Aminido naman itong binigyan siya ng pagkakataong makabayad ng ikalawang nagrereklamong resort.

Sinabi pa ng suspek na hindi lang ang mga ito nakapaghintay kung kaya’t nauwi sa kanyang pagkaka-detine sa Boracay PNP ang pangyayari.

Samantala, ayon naman sa Officer on case na si PO1 Jessie Lauz, sesidido umano ang isa sa dalawang resort na sampahan ng kasong estafa at swindling ang nasabing suspek na taga Batangas street, Manila.


Nabatid na tumuloy ito sa isang resort sa Boracay nitong nagdaang Pebrero 20 hanggang ikalawa ng Marso taong kasalukuyan at hindi umano nito nabayaran pati ang kanyang restaurant bills at cell phone loads doon.

Kooperasyon ng komunidad kaugnay sa pagdiriwang ng National Disaster Consciousness Month, hiniling ng Boracay Action Group

Ni Malbert Dalida, YES FM Boracay

Kooperasyon ng komunidad para sa ligtas na isla.

Ito ang hiniling ng mga taga Boracay Action Group kaugnay sa pagdiriwang ng National Disaster Consciousness Month.

Ayon kay BAG o Boracay Action Group Adviser/Consultant Leonard Tirol, hindi lamang para sa mga turista kundi maging sa mga lokal na residente ng Boracay ang kanilang paghahanda para sa anumang sakuna sa isla, lalo pa’t panahon ngayon ng habagat.

Kahapon ng umaga kasi ay nagparada sa mainroad ng Boracay ang mga taga BAG upang ipaalam sa publiko na sila ay nakahanda kaugnay sa nasabing pagdiriwang.

Kaugnay nito, maging ang mga establisemyento sa beach front ng Boracay ay hinimok din ni Tirol na makiisa sa kanilang adhikain lalo na sa mga rescue operations.

Kayang-kaya lang umano sakaling may mga sakuna na dala ng habagat basta’t ipaalam lang sa kanila.

Ayon pa kay Tirol, ito rin ang kauna-unahang pagkakataon na ang BAG ay nakiisa para sa National Disaster Consciousness Month.

Samantala, nabatid na maliban pa sa ibang volunteers’ group, ang BAG na mahigit tatlong taon na sa isla ay binubuo din ng mga taga Boracay PNP, Coast Guard, Life Guard, Bureau of Fire-Boracay, Kabayan at Kabalikat-Civicom.

Kaya naman kampanti umano ito na malalampasan ng Boracay ang anumang pagsubok at disaster na maaaring kaharapin ng isla.

Mga bagong opisyales sa bayan ng Malay, sumabak agad sa kanilang unang trabaho

Ni Jay-ar Arante, YES FM Boracay

Sa unang araw ngayon ng buwan Hulyo ay sumabak agad sa kanilang unang trabaho ang mga mga nanalong opisyales sa bayan ng Malay para gampanan ang kanilang magiging papel sa konseho.

Sa naging pahayag ni Sangguniang Bayan Malay Secretary Concordia Alcantara, sinabi nitong nag-umpisa na sa kanilang trabaho kahapon ang mga bagong opisyales kasama ang mga re-elected official members at sa pangunguna narin ni Mayor John Yap at newly elect Vice Mayor Wilbec Gelito.

Aniya, ngayong araw naman ang magiging kauna-unahang regular session ng mga bagong konsehal kung saan ginagawa ito isang beses sa isang linggo para pag-usapan ang mga isusulong nilang ordinansa at mga proyekto na kanilang gagawin para sa bayan ng Malay lalo na sa isla ng Boracay.

Dagdag pa ni Alcantara, sa mga nakaraang session na hindi natapos maitalakay ang mga ordinansa ay hindi na ito itutuloy kundi ibabalik sa simula para buong matalakay ulit at papasok sa magiging incoming referrals.

Samantala, mamaya umano ay inaasahang magkakaroon sila ng botohan para sa new set official members sa mga magiging bagong mamumuno sa bawat committee.

DepEd, may bagong programa para sa mga Indigenous People na mag-aaral sa Aklan

Ni Jay-ar Arante, YES FM Boracay

May bagong programa ngayon ang Department of Education (DepEd) Aklan para sa mga batang mag-aaral na Indigenous People (IP).

Ayon kay DepEd Aklan Guidance Coordinator III Rita Rey, ito ay base sa ordinansa ng DepEd Order No. 62 series of 2011.

Layunin umano nito na maturuan ang mga mahihirap na mag-aaral na hindi nakakapasok sa paaralan dahil sa kahirapan, at bilang karapatan na rin nila bilang mga batang Filipino.

Meron namang napili ang DepEd na apat na bayan sa probinsya ng Aklan kung saan kinabibilangan ito ng mga munisipalidad ng Libacao, Madalag, Numancia at Malay.

Dito din umano, bibigyan ng sapat na pagtuturo ang mga batang nabibilang sa indigenous groups, kung saan kabilang din ang mga katutubong Ati lalo na sa bayan ng Malay at sa isla ng Boracay.

Ituturo naman sa kanila ang kultura ng Pilipino, kahalintulad sa mga itinuturo sa ngayon sa mga paaralan.

Samantala, pinag-uusapan na ito ngayon ng DepEd - Aklan kung kailan magiging ganap na implementasyon ang nasabing programa para sa mga IP sa probinsya ng Aklan.