Usapin sa 25+5 meter easement rule sa Boracay muling binuksan sa SB Malay

Posted January 21, 2016

Ni Jay-ar M. Arante, YES FM Boracay

Muling binuksan ang usapin sa ika-3^rd regular SB Session ng Malay nitong Martes ang 25+5 meter easement rule sa isla ng Boracay.

Ito’y matapos ang naging pahayag sa privilege speech ni SB Member Danilo Delos Santos kaugnay sa nasabing isyu, kung saan may mga napansin umano itong establisyemento sa beach area boat station 3 na tila lumalabag sa nasabing easement rule.

Iginiit pa ni Delos Santos na base sa ordinansa ng LGU Malay na kung hindi ka sumusunod sa setback ay hindi ka makakapag-renew ng Business at Mayor’s permit.

Dahil dito, nagdesisyon naman ang konseho na ipatawag sa susunod na session ang Boracay Redevelopment Task Force (BRTF) at ang Building Officials upang mabigyang linaw kung ano pa ang mga regulasyon sa kanilang ipinapatupad na easement rule.

Samantala, nakatakda namang magsagawa ng inspeksyon ang Sangguniang Bayan ng Malay sa building na tinutukoy ni Delos Santos.