Kaso ng dengue sa Aklan, patuloy na bumababa

Posted December 8, 2015

Ni Jay-ar M. Arante, YES FM Boracay

Bumaba ng 35.3 percent ang naitalang kaso ng dengue ngayon sa probinsya kumpara noong nakaraang taon sa parehong period simula Enero 1 hanggang Nobyembre 16, 2015.

Base sa datos ng PHO sa pangunguna ni Provincial Health Officer I Dr. Cornelio Cuachon, Jr., naitala umano nila ngayong taon ng 1,009 na kaso ng dengue sa lalawigan.

Sa bagong surveillance report ay wala din umanong naitala ang PHO na namatay na tinamaan ng dengue base sa mga dinala sa ospital at napasama sa report.

Kaugnay nito nanatali din umanong ang bayan ng Kalibo ang nakapagtala ng mataas na kaso ng dengue na umabot sa 267 simula Enero 1 hanggang Nobyembre 16 sinundan ng Numancia na may 110 na kaso, Malay na may 94 kaso, New Washington na may 83 at Banga na may 59.

Samantala, mahigpit parin ang paalala ni Cuachon sa publiko na kung sakaling magkaroon ng sintomas ng dengue ay kailangan magpakunsulta agad sa mga pagamutan para agad itong maagapan kabilang na ang paglilinis sa paligid na posibleng tirahan ng mga lamok.