Isyu ng hindi pagkakaintindihan sa pagitan nina SP Mayor at Vice Gov. Quimpo, isinantabi muna

Posted July 14, 2014

Ni Gloria Villas, YES FM Boracay

Isinantabi muna ang isyu ng hindi pagkakaintindihan sa pagitan nina SP Member Rodson Mayor at Aklan Vice Governor Billie Calizo – Quimpo.

Ito’y upang bigyang daan ang mga iba’t-ibang proyekto at programa para sa probinsya, kung saan isa na rito ang tungkol sa pagsasaayos ng mga pampublikong kalsada at construction ng Boracay Hospital.

Matatandaan na inakusahan ni SP Mayor ang Bise Gobernador na nagkaroon ng “betrayal of public trust” at nilabag ang 30 days period na hindi dapat ma-interrupt ng anumang aksyon ang mga referrals ng committee meetings/hearings, public hearings, period of debates, amendments at iba pang mga dokumento na sakop ng batas ng DILG.

Dahil dito, nais ni Mayor na paalisin sa pwesto si Quimpo bilang bise gobernador.

Subalit, pinabulaanan naman ng bise gobernador ang mga akusasyon ni Mayor, at sinagot ito ng mga dokumentong hawak bilang patunay na wala umano itong nilalabag na batas.