Suporta para sa K to 12 program hiniling ng DepEd Malay sa Sangguniang Bayan

Posted June 9, 2016

Ni Jay-ar M. Arante, YES FM Boracay

Bagamat handang-handa na ang Department of Education (DepEd) Malay sa K to 12 program, hiniling naman ng District Office ang suporta ng Sangguniang Bayan.

Ito ang ipinaabot ni Jesse Flores Public School District Supervisor ng District Malay sa pagdalo nito sa ginanap na SB Session nitong Martes kasama si Victor Supetran School Head OIC ng Boracay National High School at Democrito Barrientos II OIC, Principal Manocmanoc Extension.

Nabatid na ipinatawag sa konseho ang DepEd para alamin ang kahandaan ng mga ito sa pagsisimula ng implementasyon ng nasabing programa ngayong pasukan kabilang na ang mga kursong pinili ng mga paaralan sa Malay.

Napag-alaman na ang Boracay National High School ay nakapili ng kursong General Academic Strength (GAS),  Technological Vocational Livelihood Education (TVL) kung saan meron itong Combination 1 na may specialization na Home economics at Hairdressing habang sa Combination 2 naman ay Bread and Pastry Production, Food and Beverage Services, Local Tour Guiding at Tourism Production na akma sa isla ng Boracay.

Samantala, tiniyak naman ng SB Malay ang suporta sa bagong programang ito ng DepEd na siyang sinasabing paghahanda sa mga kabataan sa kolehiyo at sa kanilang kinabukasan.