Mga itinalagang Comelec officer sa ibat-ibang lugar, pinalawig

Posted June 10, 2016

Ni Jay-ar M. Arante, YES FM Boracay

Limang araw pang mananatili ang mga election officer na natalaga sa ibat-ibang bayan sa Aklan matapos itong palawigin ni Comelec Chairman Andres Bautista hanggang sa Hunyo 15.

Ito ang sinabi ni Chrispin Raymund Gerardo na natalaga sa bayan ng Malay bilang Comelec Officer II at kasalukuyang Provincial Information Officer.

Nabatid na dapat nitong Miyerkules pa Hunyo 8 ang kanilang huling araw sa kanilang naitalagang lugar ngunit naantala ito dahil sa dami pang kailangang iproseso kagaya na lamang ng pag-sumite ng Statement of Contributions and Expenses (SOCE) ng mga tumakbong kandidato nitong eleksyon.

Matatandaang ilang linggo bago ang halalan ay inilipat na sa ibat-ibang Comelec Office sa probinsya ang mga Officer base sa kauutusan ng Comelec para rito.

Samantala, nitong Hunyo 8 rin nagtapos ang Comelec Gun Ban sa buong bansa na nagsimula noong Enero 10, 2016.