Steward sa isang hotel sa Boracay, tinutukan ng baril

Posted June 10, 2016

Ni Inna Carol L. Zambrona, YES FM Boracay

Nanginginig pa na nag-sumbong ang lalaking Steward sa isang hotel sa Boracay PNP matapos itong tinutukan ng baril habang papauwi galing sa inuman sa Manoc-manoc, Boracay kaninang madaling araw.

Sumbong ng biktima na si Aike Panuncio, 23-anyos residente ng Brgy. Bulwang, Numancia, Aklan kasama niya umano ang kanyang mga kaibigan na umiinum sa lugar ng walang kadahi-dahilan ay lumapit sa kanila ang sinasabing apat na lalaking suspek at kinumpronta.

Dahil dito nagpasya umano ang biktima at mga kasamahan nito na umalis nalang sa lugar upang makaiwas sa gulo.

Ngunit hinabol umano sila ng mga suspek hanggang sa nagpang-abot na ang mga ito.

Ayon pa sa biktima isa umano sa mga hindi nakilalang suspek ang tumutok sa kanya ng baril ngunit agad umano siyang tumakbo papalayo hanggang sa nag-sumbong na ito sa mga pulis.

Samantala, napag-alaman na agad ding tumakas ang suspek kasama ang iba pang lalaki sakay ng motorsiklo.