YES THE BEST 911 BORACAY

Tuesday, July 08, 2014

Probinsya ng Aklan, “zero” sa kaso ng leptospirosis - PHO

Posted July 7, 2014
Ni Gloria Villas, YES FM Boracay

Walang naitalang kaso ang Provincial Health Office (PHO) Aklan hinggil sa leptospirosis sa probinsya.

Ito ang sinabi ni Provincial Health Officer II, Dr. Victor Sta. Maria, ng PHO Aklan, kaugnay sa umano’y nabiktima ng leptospirosis sa Boracay kamakailan lang.

Gayunpaman, hinimok ng opisyal ang publiko na mag-ingat sa mga pagbaha at ugaliing magsuot ng bota.

Ayon kay Sta. Maria, kung naghihinala ang isang tao na tinamaan siya ng leptospirosis matapos na lumusong sa baha na kontaminado ng ihi ng daga, mas makabubuting kumonsulta kaagad sa doktor o magtungo sa pagamutan.

Iginiit rin nito na kahit wala nang baha ay dapat pa ring mag-ingat dahil maaari ring makakuha ng leptospirosis bacteria mula sa mga putik na naiwan ng baha.

Anya, karaniwan ay mga lalaking nasa edad 15 pataas ang nagkakaroon ng leptospirosis.

Ngunit di maiiwasan na maging ang mga maliliit na bata ay magkakaroon din kung ang mga ito’y nagbababad o lumalangoy sa tubig baha o kung makakainom ng kontaminadong tubig.

Samantala, nagpapatuloy naman ang isinagawang monitoring ng DOH tungkol dito lalo na’t panahon na naman ng tag-ulan.

No comments:

Post a Comment