Operasyon sa walang Permit to Transport, paiigtingin

Posted August 16, 2016

Ni Alan C. Palma Sr., YES FM Boracay

Nabahahala ngayon ang Boracay Tourist Assistance Center o BTAC sa dami ng mga sasakyan na  walang Permit to Transport sa isla lalo na ang mga motorsiklo.

Ito ang rebelasyon ni  BTAC Deputy Police Senior Inspector Mark Gesulga sa ginawang pulong ng Municipal Peace and Order Council sa bayan ng Malay.

Ayon kay Gesulga, maliban sa ginagamit ito sa pamamasada na ipinagbabawal sa isla ay nagagamit na rin ang mga motorsiklo ng mga riding in tandem sa pagsagawa ng krimen tulad ng snatching at pangho-hold up.

Bagamat kinatigan ni Malay Administrator Ed Sancho na dapat hulihin ang lahat ng illegal na sasakyan sa Boracay, problema naman ngayon ang kakulangan ng holding area na paglalagyan sa mga ito.

Isa sa rekomendasyon ni Executive Assistant IV Rowen Aguirre ay ang pagtawid sa mga ito kung lagpas 20 na ang nahuli habang nangangalap pa ng paglalagyan na area sa Boracay.

Ang mga bangka sa cargo area naman ang itinuturong may pakana di-umano kung bakit dumarami ang kulorom na sasakyan sa Boracay dahil sa pagkakarga ng mga ito lalo na tuwing gabi kung saan mahigpit din na ipinagbabawal ng Philippine Coast Guard.

Samantala, napagkasunduan ng council na itutuloy ang operasyon ng panghuhuli sa mga gagawing check point kung saan kasama rin sa mga susuriin ay ang mga 4-wheel na sasakyan ng mga resorts.