Construction worker sinaksak, suspek kulong

Posted September 25, 2015

Ni Inna Carol L. Zambrona, YES FM Boracay

Sugatan ang isang construction worker matapos na saksakin ng kanyang katrabaho sa Sitio Diniwid Brgy. Balabag, Malay, Aklan kagabi.

Nagtamo ng sugat sa katawan ang biktimang si Ronnie Doronio 26- anyos ng Sitio Agutay Brgy. Aquino Ibajay, Aklan at temporaryong nakatira sa Sitio Diniwid.

Nabatid sa report ng Boracay PNP, nag-iinuman ang biktima at suspek kasama ang ilan pa nilang katrabaho ng magkaroon ng mainit na argumento sa pagitan ng biktima at ng suspek na si Alvin Tividad 33-anyos ng Brgy. Lunoy, Guibungan, Sapian Capiz

Dito nagtungo ang suspek sa kusina at sa pagbalik nito ay may dala na siyang kutsilyo na agad niyang inunday sa katawan ng biktima habang nakatayo sa labas ng kanyang kwarto.

Matapos ang insidente mabilis namang nakatakas ang suspek sa pamamagitan ng pagtalon sa bakod ng barracks.

Agad namang naisugod ang biktima ng kanyang kapatid at katrabaho sa isang pribadong klinika para mabigyan ng agarang pagpapagamot ngunit nagdesisyon ang doktor na dalhin nalang ito sa ospital sa bayan Kalibo.

Samantala, agad namang nahuli ng mga pulis ang suspek matapos ang kanilang pagrespondi sa insidente na ngayon ay pansamantalang ikinustodiya sa Boracay PNP habang patuloy na ginagawa ang imbestigasyon.