P86-M transmission line ng Boracay Water sinimulan na

Posted February 10, 2015

Ni Gloria Villas, YES FM Boracay

Sinimulan na ng Boracay Water ang construction ng P86-M transmission line sa Nabaoy, Malay, Aklan.

Base sa kalatas na ipinadala ng Boracay Island Water Company (BIWC), nitong pagpasok ng buwan ng Pebrero sinimulan ang construction, kung saan inaasahang magbibigay ng mas maraming supply ng tubig sa isla mula 14.5 milyong litro kada araw sa 20 milyong litro kada araw.

Bahagi ng nasabing proyekto ang paglalatag ng 5.5 kilometrong 400-milimeter diameter ductile iron pipe, na magdudugtong sa pangunahing pinagkukunan ng tubig- ang Ilog ng Nabaoy patungo sa Caticlan Water Treatment Plant.

Ayon sa BIWC, bahagi umano ito ng paghahanda ng Boracay Water upang tugunan ang patuloy na tumataas na pangangailangan sa tubig ng isla bunsod ng pagdagsa ng mga turista.

Nabatid kasi sa Department of Tourism (DOT) na inaasahang aabot sa 1.7 milyon ang mga turista sa Boracay sa taong ito.

Inaasahan naman ang pagtapos ng nasabing proyekto na nagkakahalagang P86 milyon sa kalagitnaan ng taon.

Samantala, ang Ang Boracay Island Water Company, Inc. ay isang sangay ng Manila Water na itinatag noong 2009 sa isang kasunduan kasama ang Tourism Infrastructure Authority and Enterprise Zone Authority na naglalayong pangasiwaan ang serbisyo sa tubig at nagamit na tubig ng Boracay.