Hydropower plant, balak itayo sa Aklan

Posted February 10, 2015

Ni Gloria Villas, YES FM Boracay

Maliban sa Wind Energy Project sa Nabas at Malay.

May balak na rin umano ngayon sa pagpapapatayo ng isang Hydropower Plant sa probinsya ng Aklan.

Ayon kay Engr. Roger Esto ng Provincial Planning and Development Office (PPDO), may isang pribadong kompanya ang nakikipag-koordinasyon sa probinsya, kung saan balak umano itong magtayo ng Hdyropower plant sa bayan ng Libacao at Madalag.

Anya, bagamat pinaplano pa lamang ito, aasahang makakadagdag sa enerhiya na kakailanganin ng probinsya ang nasabing proyekto.

Malaking tulong din umano ang pagkakaroon ng hydropower energy upang maibsan ang kakulangan ng kuryente sa Visayas kung matutuloy ito.

Samantala, nagpahayag naman si Esto na suportado umano ng pamahalaang probinsyal ang mga ganitong proyekto lalo na’t kung malaki ang maitutulong sa mga mamamayan.

Kaugnay nito, nagpaabot din ng pasasalamat si Esto sa kompanya ng PETROENERGY sa pagsasaayos din ng mga ito ng ilang kalsada sa Nabas Aklan na naging malaking tulong umano sa komunidad.