Mga kawayang idinadaan sa main road ng Boracay, ire-regulate na

Ni Edzel Mainit, Senior Field Reporter, YES FM Boracay

Delikado at perwesyo sa daan.

Ganito ilarawan ng ilang local na mambabatas sa bayan ng Malay ang mga kawayan at iba pang construction materials na mahahaba kapag idinadaan na ito sa kalye lalo na sa main road.

Bunsod nito, nasa proseso na rin ng pagpasa ng ordinansa ang Sangguniang Bayan ng Malay, upang i-regulate ang pag-deliver, lalo na at masyadong makitid o maliit umano ang kalsada sa Boracay.

Kaya kung abala ang kalye o main road at idaan pa umano itong mga kawayan, tubo at iba pang mahahabang bakal na ginagamit sa konstraksiyon, maaaring makapagdala umano ito ng abala at sakuna ayon sa mga konsehal.

Dahil dito, bahagi narin ng kanilang panukala ngayon na gawing alas kwatro o alas singko ng umaga ang pag-deliver upang hindi makapagdala ng mabigat ng trapiko sa mga sasakyang dumadaan lalo na kapag abala na rin ang kalye sa Boracay.

Beach ng Boracay, binabantayan ng dalawang grupo ng Life Guard

Ni Edzel Mainit, Senior Field Reporter, YES FM Boracay

Dalawang grupo na ng Life Guard ang nagbabantay sa Beach ng Boracay.

Ito nilinaw ni Philippine National Red Cross Malay-Boracay Chapter Administrator Marlo Shoenenberger sa ginawang ulat nito sa Sangguniang Bayan ng Malay kahapon ng umaga.

Aniya, sa pagbabantay sa mga maliligo, lalo na sa Swimming area, hinati-hati na umano ang skedyul sa dalawang grupo ng Life Saver sa Boracay.

Ito ay sa Life Guard ng LGU Malay na pinapangunahan ni Miguel “Mike” Labatiao at Life Guard ng Red Cross.

Ayon kay Shoenenberger, simula alas-sais hanggang alas-9 ng umaga at alas-4 ng hapon hanggang alas-7 ng gabi, ay Life Guard ng Red Cross na umano ang naka-tukang magbantay.

At ang mga wala na umano sa iskeyul ng Red Cross ay LGU Savers naman ang magbabantay sa Beach.

Kaya 12-oras na umano ngayon na nababantayan ang Swimming area, para maging ligtas ang mga naliligo.

Pagpatay sa Ati Spokesperson, kinondena ng SB Malay

Ni Edzel Mainit, Senior Field Reporter, YES FM Boracay

Bagama’t nailibing na nitong Sabado, Marso a-dos taong kasalukuyan, kahapon ng umaga ay nagpahabol ng resolusyon ang Sangguniang Bayan ng Malay na nagkokondena sa pagpatay sa spokesperson ng Ati Community sa isla na si Dexter Condez.

Sa resolusyong ipinasa nitong umaga, walang gatol at pagtutol mula sa mga miyembro ng Konseho nang ipasa ng SB ang pagpapahayag nila ng simpatiya sa mga katutubong Ati dala ng pangyayari.

Ayon sa may akda ng resolusyon na si SB Member Rowen Aguirre, labis nilang ikinalulungkot ang pangyayari na kailangan pa umanong magbuwis ng buhay dahil lang sa lupa.

Kalakip din ng resolusyon, inaprubahan ng SB ang kanilang rekomendasyon sa Kapulisan na magkaroon ang otoridad ng masusing imbestigasyon upang mapanagot ang salarin.

Kung maalala, si Condez ay binaril nitong nagdaang Pebrero a bente-dos, na ikinamatay ng biktima kung saan ang tinututukang motibo ay ang agawan di-umano sa lupa sa Boracay.

Pag-renew ng mga Business Permit sa Boracay, extended muli hanggang a-uno ng Marso!

Ni Edzel Mainit, Senior Field Reporter, YES FM Boracay

Extended na hanggang Marso a-uno ang deadline sa pagre-renew ng business permit sa buong bayan ng Malay.

Ito ang nilinaw ni Malay Administrator Godofredo Sadiasa, gayong kahapon ang deadline sa pagrerenew ng  mga business permit sa bayan.

Kasunod ito ng aksiyong ginawa ng konseho na kahit wala pa umanong hiling ang Punong Ehekutibo na i-extend.

Ginawa umano ito ng konseho dahil sa nakita nila na marami paring empleyado sa Boracay ang hindi nakakompleto ng requirements na hinihingi ng LGU.

Kaya hindi na masasayang ang resolusyon na ipinasa ng Sangguniang Bayan ng Malay na muling nagpa-papalawig sa araw ng deadline na ibinigay sa mga establishemento lalo na sa Boracay, gaya ng pangamba ng mga konsehal na baka hindi ipatupad  ng Alkalde ang kanilang resolusyon.

Sa panayam kay Sadiasa, sinabi nitong sa oras na hindi pa makapagpa-asses sa babayarang business tax o buwis ang isang establishment bago ang deadline, aasahang papatawan na umano ng penalidad ang mga ito.

Pero nilinaw naman nito ngayon, na mahalaga ang pagpapa-assess muna at kahit isunod naman umano ang mga requirement na hiningi sa mga employer at empleyado ng establishmento upang maka-iwas sa penalty.

Ganoon pa man bagamat OK lang na wala muna ang mga requirements na ito sa pagpapa-assess.

Nilinaw naman ni Sadiasa na hindi nila ipo-proseso ang mga Mayor’s Permit ng establishemento kung hindi makokompleto ang mga requirements.

Kung maaalala, una nang nagbigay ng isang buwang extension ang konseho nitong Enero, na kahapon nagtapos ika-20 ng Pebrero.

Subalit nitong Martes ay muling nagpasa ng resulosyon ang SB para ma-extent ng hanggang a-uno ng Marso ang deadline.

Ito na umano ang huling extension na ibibigay nila para sa taong ito, bilang tugon naman sa mabagal na proseso sa pagkuha palang mga requirement ng libo-libong empleyado sa Boracay. #022013

Pagpapakabit ng CCTV camera, requirement na sa business permit sa susunod na taon

Ni Edzel Mainit, Senior Field Reporter, YES FM Boracay

Magiging requirement na ang pagkakaroon ng CCTV camera sa mga malalaking establishemiyento komersiyal sa Boracay sa susunod na taon.

Sapagkat kahapon, sa ika-anim na sesyon ng Sangguniang Bayan ng Malay, pinuna ng konseho ang umano ay hindi pagpapatupad sa ordinansa hinggil dito.

Ito ay ang pag-require na dapat ay mayroong kinakabit na closed-circuit television camera o CCTV camera ang mga establishemiyento sa Boracay.

Tinutukoy ng SB ay kung bakit sa pag-renew ng mga business permit ngayon ay hindi ito ipinatupad sa mga aplikante para sa permit.

Matatandaang nitong nagdaang taon ay nagpasa ng ordinansa hinggil dito ang mga mambabatas ng bayan, ito ay bilang tugon sa madalas na nakawan na nangyayari sa isla at upang mabigyang seguridad ang mga establishemiyento at bisita.

Mga vendors nagreklamo dahil sa pagbabawal sa kanila sa Brgy. Balabag

Reklamo na ipinagbabawal di umano ang mga vendors sa Brgy. Balabag.

Kaya naman nagkukumahog ang Sangguniang Bayan ng Malay ngayon, kung anong aksiyon ang gagawin nila sa reklamo na ipina-abot ng asosasyon ng mga vendors dahil sa tinataboy na umano ang mga ito sa nasabing Barangay.

Ito isa sa mga inilatag sa sesyon ng konseho kahapon ni Vice Mayor at Presiding Officer Ceceron Cawaling, kung saan ay nagtataka pa nga ang mga ito.

Dahil sa pagkaka-alam umano nila, hindi kailan man ipinagbabawal ang maglako sa front beach, basta huwag lang sa baybayin talaga.

Maliban dito, ang alam umano nila na naa-ayon sa ordinansa sa Boracay ay nireregulate lamang ang mga vendors na ito at kailan man ay hindi ipinagbabawal.

Sa panig kasi ni SB Member Dante Pagsugiron, ang mga vendors ay bahagi na rin ng turismo sa Boracay kaya hindi dapat ipagbawal, sa halip ay hanapan lang umano ng lugar para maging maaayos naman.

Dahil dito, nagpasya ang SB na imbitahan ang opisyales ng Brgy. Balabag sa SB ng sa ganoon ay matanong sila hinggil dito.

Nagsuhestiyon din si SB Member Wilbec Gelito na kung maaari ay pati ang opisyales ng dalawa pang barangay sa Boracay ay ipatawag din kaugnay dito. #ecm012013

Umano’y mabagal na pagproseso ng mga business permit, idinepensa ni Island Administrator Glenn Sacapaño

Nagpalabas ngayon ng transmittal letter ang opisina ni Administrator Glenn Sacapaño, bilang pagdepensa tungkol sa pagproseso ng mga business permit.

Ito’y may kaugnay sa komento ng SB Malay na umano’y mabagal na pagproseso ng mga business permits, maliban pa sa paghingi ng mga umano’y walang basehang requirements.

Nakasaad sa sulat na ipinadala ni Sacapaño sa YES FM Boracay News Center, na ang mga puna sa sistema at pagproseso sa pagkuha ng mga business permits ay bukas para sa pagpapabilis nito.

Ang mga requirements umano kasing ito ay malaking paraan upang mapangalagaan ang isla ng Boracay, maliban pa sa ang mga ito ay nag-ugat sa mga ordinansang pinag-iisipan, ipinasa at isinabatas ng mismong Sangguniang Bayan mismo.

Kung may mga hindi pagtalima o pagsunod sa mga batas regulasyon at ordinansa na nakakasira sa isla.

Ang mga requirements din umanong ito ay maaaring gamitin upang maiwasto ang anumang paglabag sa mga ito.

Naniniwala pa si Sacapaño na ang mga kakulangan sa mga requirements marahil ang nagiging sanhi ng pagtagal o pagbagal ng proseso.

Kaugnay nito, nananawagan din ang nasabing administrador na magtulungan ang lahat kasama na ang nagkomentong SB upang mapabuti ang mga naturang pagproseso.

Matatandaang pinuna ng SB Malay ang umano’y mabagal na serbisyo at pagrelease ng mga pampublikong mga dokumento sa mismong sesyon ng Malay kamakailan lang. #bd012013

TRO para mapigilan ang pagtaas sa singil ng tubig ng BIWC, pinagpaplanuhan na

Temporary Restraining Oder o TRO lamang ang makakapigil sa pagmahal ng singgil sa serbisyo ng tubig ng Boracay Island Water Company o BIWC.

Kaya naman balak ngayon ng mga miyembro ng Sangguniang Bayan ng Malay na humiling ng TRO sa Korte upang hindi muna maipatupad ang dagdag singil sa tubig ng BIWC.

Kung saan batay sa mga binitiwang mga pahayag ng konsehal sa isinagawang Privilege Speech sa sesyon ng SB kahapon, ito lamang ang nakikita nilang paraan para protektahan ang interes ng mga konsumidor.

Nagtulak sa konseho para sa panukalang paghingi ng TRO ay ang pagduda nila sa proseso o pamamaraan ng Tourism Infrastructure and Enterprise Zone Authority o TIEZA na siyang Regulatory Body ng BIWC sa pag-apruba ng bagong taripa ng nasabing kampaniya ng tubig.

Bunsod nito, bago paman umano gumawa ng hakbang ang SB, nais muna nila itong ikonsulta sa abogado para sa legalidad ng binabalak nilang gawin.

Kung maaalala, una nang hinyag ng BIWC na sa susunod ng buwan ay sisimulan na nila ang pagpapatupad sa bagong taripa na inaprobahan ng TIEZA. #ecm012013

Deadline sa pagre-new ng business permit sa Boracay, balak palawigin

Kinunsidera ngayon ng Sangguniang Bayan ng Malay na bigyan na lamang ng extension ang mga stakeholders sa Boracay at Malay sa pag-renew ng business permit.

Ito ay dahil sa mabagal na proseso sa pagkuha ng mga require palang ng isang empleyado para pag-renew ng business permit ng employer.

Isang buwang palugit ang panukalang idagdag sa araw ng pagre-renew, gayong sa Ika-21 sana ng Enero ang deadline na siyang na-aayon sa batas.

Subalit dahil sa nakita ng Sangguniang Bayan ng Malay na may nai-ambag namang problema ang mga departemento ng lokal na pamahalaan ng Malay at mga barangay sa Boracay para maantala ang proseso.

Sa halip na magtapos na ngayong ika-21 ng buawang ito, balak ngayon ng konseho na palawigin ito hanggang sa ika-20 ng Pebrero ng taong kasalukuyan ang deadline sa pagrenew ng business permit. #ecm012013

Mabagal na pagpoproseso ng business permit, pinuproblema ng SB Malay

Mabagal na serbisyo at pag-release ng pampublikong dokumento.

Ito ngayon ang pinuproblema ng Sangguniang Bayan ng Malay dahil sa matagal at nakakairitang pagproseso sa mga dukomento para sa pagrenew ng business permit sa Boracay at Malay.

Sapagkat marami umanong hinihinging requirements sa mga empleyado ang mga departamento ng LGU at Barangay dagdagan pa ng mabagal na serbisyo, rason para maantala ang pag-release mga dokumento.

Kung iisipin umano dapat ang LGU ang humingi ng requirements na ito, kaya dapat maging mabilis din ang serbisyo para hindi maaantala ang kawawang mga empleyado, lalo na sa Boracay.

Unang pinuna ni SB Member Rowen Aguirre na sinang-ayunan naman ng lahat ng konsehal, ang umano ay inaabot ng halos dalawang linggo bago mabigay ang Barangay Clearance sa dami din requirements na hinihingi na wala namang basehan.

Dagdag pa dito ang requirement sa medical ng mga empleyado na minsan ay nagpapalala din umano sa bagal ng pagproseso sa business permit.

Gayong kung titingnan aniya, ang mga empleyado at negosyanteng ito ay lumapit sa sa kanila upang magbayad ng kanilang obligasyon o buwis, pero bakit pinapahirapan pa.

At minsan ay nakakatikim pa ng hindi magandang karansan.

Bunsod nito, nangmunkahi ang konseho na oras na rin umano para rebisahin o siliping muli ang requirements na ito na hinihingi ng LGU Malay para sa pagrenew ng permit, dahil ang iba dito ay tila hindi na rin naman kailangan.

Para hindi naman maaksaya ang panahon ng mga empleyado ay maging ng mga stakeholder sa pagproseso at paghihintay sa dokumento na kailangan para sa business permit, hindi man ngayon kundi para sa susunod na mga taon. #ecm012013

SB Malay, walang kamalay-malay kung anong establishsmento ang nasa listahan ng DENR na aalisin sa front beach ng Boracay

Nagbabadyang nang simulan ang demolisyon sa mga illegal na istraktura sa front beach ng Boracay.

Pero nanatiling nangangapa pa rin ang Sangguniang Bayan ng Malay kung anong mga resort o establishemento ang apektado.

Gayong nababahala umano si SB Member Rowen Aguirre na kapag mag-isyu ng statement ang Department of Environment and Natural Resources o DENR na aalis na ang mga illegal structure ay lalo pang dumarami o nadodoble ang nadadagdag sa nga istraktura doon.

Bagamat may ideya na aniya ito na ang mga tent at iba pang temporary structure ang aalisin dahil sa nakapasok ito sa 25+5 easement na nakasaad sa batas na ipinataupad ng DENR kaya ikinonsiderang illegal, nais naman ngayong mangyari ng konsehal na sana ay magkaroon din sila ng kopya ng listahan ng DENR ng mga tatangaling istraktura.

Ito ay dahil tila ang labas aniya ay wala nang nagawa ang LGU Malay para akasiyunan ang mga illegal structure na ito.

Kaya hihilingin umano ng SB ngayon sa DENR na bigyan sila ng listahan nga halos tatlong daang establishementong apektado. #ecm2013

Underwater tunnel na magkukonekta sa Boracay at Caticlan, unang salbo ng sesyon ng SB Malay sa 2013

Maaari kayang sa susunod ay mayroon nang underwater tunnel ang bayan ng Malay tulad nito?

(photo from Flickrhivemind.net)

Hindi pa nga naitatayo ang tulay na una nang binalak na magdudugtong sa Boracay at Caticlan, panibagong proposisyon na naman ngayon ang nagbabadya at nailatag sa lokal na pamahalaan ng Malay.

Ito ay dahil ang pagkakaroon ng underwater tunnel na magkukonekta sa Caticlan at Boracay ang isa sa mga pambungad na topikong inilatag sa unang araw ng sesyon ng Sangguniang Bayan ng Malay ngayon taong 2013 kahapon ng umaga.

Kasunod ito ng pagpahayag ng isang investor sa paraan ng e-mail kay SB Member Dante Pagsugiron na sila ay intresadong mamuhunan para sa paglalagay ng underwater tunnel.

Subalit ang usaping ito ay mariing pinag-iisipan ngayon ng konseho, kung ikukonsidera ba ang proposisyong ito.

Magkaganon pa man, sinabi ng halos mayorya sa mga miyembro ng konseho na kapag magkaroon ng pormal na komunikasyon sa Alkalde at Sanggunian ang sinasabing investor ay nakahanda naman umano ang SB na imbitahan ang sinasabing si “Mr. Tapay” na siyang may direktang komunikasyon kay Pagsugiron.

Ito ay upang makita ang kabuuan ng kanilang proposisyon at kung ano ang maidudulot nito para sa Boracay. #ecm012013

P310-milyon annual budget ng Malay, aprubado na

Aprubado na sa Sangguniang Bayan ng Malay ang P310-milyon na 2013 Annual Budget ng bayang ito.

Bago nag-adjourn ang SB sesyon nitong ika-18 ng Disyembre na siyang huling sesyon nila sa taong ito ay nagawa nilang tapusin ang pagre-rebyu sa mga alokasyong pondo ng bawat Department ng LGU Malay sa pamamagitan ng Budget Hearing.

Kung maaalala, ang halaga ng annual budget na ito ng Malay na P305-milyon ay ginawang P310-milyon nitong huli.

Ito ay upang matustusan ang pangangailan ng Municipal Economic Enterprise Development o MEED Department at iba pang programa.

Napapa-wow at nalulula naman ang ibang miyembro ng Sanggunian sa milyon-milyong pundo ng Malay para sa susunod na taon, na nagpapakita lamang umano na mayaman na ang Malay. #ecm122012 

Malay, kinulang sa P305-M na pondo para sa 2013

Kinulang ang lokal na pamahalaan ng Malay sa pondong P305 milyon para sa taong 2013, kaya ginawa ito ngayong P310 milyon.

Sapagkat sa kalagitnaan ng Budget Hearing ay nakitang kulang pa rin ang halagang ito dahil may mga gastusan pa ang LGU sa para sa mga programang pangkapaligiran at sa  Municipal Economic Enterprise Development o MEED.

Kung maaalala ang dalawang ito ay  malaki din ang kontribusyon sa koleksiyon ng LGU dahil ang ilang pasilidad ng LGU sa ilalim ng MEED ay kumikita din mas lalo na ang sa paniningil ng environmental fee sa Cagban at Caticlan Port sa mga turista.

Ito ay kasunod sa ginagawang pagrebyu ng konseho bago aprobahan at ipasa ang pundo at alokasyon ng Malay para sa buong taong ng 2013 ng Sangguniang Bayan.

Kaya kanilang itong binusisi para masigurong tama ang alokasyon sa bawat proyekto na naka-programa para sa susunod na taon.

Katunayan, mismong ang mga Department Head ng bawat departemento ay personal pinatawag sa ginawang Budget hearing ng sa ganon ay sila na ang magpaliwanag kung ano ang nilalaman ng kanilang mga programa.

Kung saan, nitong nakalipas na lingo ay napresenta na sa SB ang pondo para sa 2013 ng bayang ito na 305 milyon.

Ngunit nakita napansing bitin ang halagang ito kaya dinagdagan ngayong ng limang milyong piso pa, upang maging P310 milyon na. #ecm122012

MDRRMC ng Malay, naka-alerto na; RE: bagyong Pablo

Inako ni Vice Mayor Ceceron Cawaling ang responsibilidad bilang Chairman ng Municipal Disaster Risk Reduction Management Council o MDRRMC kapalit ni Malay Mayor John Yap.

Sapagkat ngayong naghahanda ang buong bayan sa posibleng pananalasa ng bagyong Pablo, nagkataon din na nake-leave si Yap.

Kaya bilang Bise Alkalde ay si Cawaling na muna ang umakto sa posisyon ni Yap na Chairman ng MDRRMC gayong si Cawaling ang acting mayor sa ngayon ng bayan hanggang sa makabalik mula sa biyahe si Yap.

Dahil dito, bukas ay nakatakda na kausapin umano ni Cawaling ang miyembro ng council upang mapag-usapan at ma-plano ang mga dapat gawing paghahanda para sa pananalasa ng bagyo.

Samantala, inihayag naman ni Sangguniang Bayan Member Jupiter Gallenero Chairman ng Committee on Public Safety na sa kasalukuyan ay nakapag-simula na ring gumalaw o naka alerto na rin ang MDRRMC ng Malay. #ecm122012

SB Malay, naalarma sa rate increase ng BIWC

Naalarma ngayon ang Sangguniang Bayan ng Malay sa napipintong pagtataas sa taripa ng singil sa tubig sa BIWC.

Ito ay makaraang ihinayag ni SB Member Dante Pagsuguiron ang balak na increase sa singil ng BIWC sa serbisyo ng kanilang tubig at waste water na inaasahang ipapatupad na sa a-uno ng Enero ng susunod na taon.

Sa binasang Notice of Public Hearing ni Pagsuguiron mula sa TIEZA para darating na ika-anim ng Disyembre, nakasaad doon ang mga proposed rate para sa water services at waste water na nakatakdang ipatupad sa unang araw ng taong 2013.

Umalma ang nasabing SB member dahil ang tatlumpu’t-limang porsiyento umano na increase na ito ay nasakit para sa bulsa ng mga konsyumer at dagdag pasanin din sa mga negosyante sa Boracay.

Dahil dito, nagmungkahi si SB Member Rowen Aguirre na gumawa ng position letter ang konseho kung saan nakasaad ang kanilang pagtutol sa balak na pagtataas sa singil ng BIWC.

Balak din ng SB na imbitahan sa sesyon ang Tourism Infrastructure Enterprise Zone Authority (TIEZA) na siyang regulatory body ng BIWC kaugnay sa usapin.

Layunin dito ng SB ay maprotektahan ang interes ng mga konsyumer sa Boracay. #ecm112012

2013 budget ng LGU Malay, tumaas: umabot na sa P305M!

Tumaas ng P25-M ang Annual Budget ng LGU Malay sa taong 2013 kung ikukumpara ito sa taong 2012.

Sapagkat kung ngayong taon ng 2012 ay umabot lamang sa P280-M ang pondo na ginugol sa mga proyekto, programa at iba pang gastusan ng Malay kasama na ang sa isla ng Boracay.

Sa susunod na taon ng 2013, 305 milyong piso na ang pondo na maaaring gamitin ng gobyerno para sa pagpapatakbo sa bayang ito at ng isla ng Boracay.

Dahil dito, noong ika-21 ng Nobyembre ay nagkaroon na ng Budget Hearing sa Sangguniang Bayan ng Malay para sa pagpaplano at alokasyon ng pondong ito.

Dito ay nakatakdang ipatawag ng SB ang mga Department Heads ng LGU Malay para masimulan ang pagdinig, kung gaano kalaking pondo ang ilalaan sa bawat departamento na magsisilbing budget nila sa loob ng isang taon.

Sa pagdinig na gagawin bukas, dito malalaman kung saan at para sa ano gagastusin ang halaga ng alokasyon.

Ang SB Malay ang may mandatu para magrebyu ng mga pondo o alokasyon bago ito aprubahan ng Punong Ehekutibo. #ecm112012

Mga naglalako sa front beach, umapela sa SB

Nag-iisip na ngayon ang Sangguniang Bayan ng Malay kung ano ang magiging aksiyon nila sa sunud-sunod na apela ng mga naghahanap buhay sa vegetation area sa front beach ng Boracay.

Sapagkat kung ang mga hair braiders o taga-tirintas ng buhok sa Boracay ay humingi ng pag-unawa kaugnay sa kanilang kabuhayan sa lokal na pamahalaan ng Malay bagay na nagpadala ng sulat na kung maaari ay gawin ng legal ang kanilang propisyon na napili.

Ang mga ambulant vendors gaya ng nagbibenta ng taho at isda sa front beach ay nagpaabot din ng sulat sa SB na naglalayong mabigyan sila ng kahit dalawang oras na makapaglako sila sa area na ito.

Gayong ang nasabing mga vendors ay hinuhuli ng MAP o pulis kapag nakita ang mga ito na nagsasagawa ng kanilang aktibidad sa front beach.

Kaugnay nito, nilinaw ni Vice Mayor Ceceron Cawaling na hindi ipinagbabawal ang mga naglalako ng taho at isda sa mga eskinita sa Boracay.

Pero sa vegetation area kung saan doon din ang mga turista ay tila hindi umano pwede.

Dahil dito, aalamin aniya ng konseho mula sa Punong Ehikutibo kung ano ang saloobin nito kaugnay sa apela ng mga naghahanap buhay sa front para magawan nila ng Ordinansa ng SB kung kailangan pa o kaya ay ma-rebyu nila ang ordinansa kung ano ang mayroon na. #ecm112012

Pag-uusap ng legislative at executive body, kailangan sa paglinis ng vegetation area sa Boracay

Masinsinang pag-uusap parin umano ang sagot sa problemang nakikita ngayon sa vegetation sa Boracay.

Ito ang sagot ni Island Administrator Glenn Sacapaño sa panayam dito, hinggil sa komento ng Sangguniang Bayan ng Malay kamakailan.

Kaugnay ito sa di umano’y tila kulang na implementasyon sa mga ordinansa sa isla para malinis na ang vegetation area.

Partikular na tinukoy dito ng SB ang mga tent at iba pang illegal structure sa vegetation area ng front beach na matagal na umanong problema pero hindi parin natatanggal sa kabila umano ng mga ordinansang mayroon sa isla.

Bilang sagot ng Island Administrator sa katulad na problema, sinabi nitong mahalaga umanong magkaroon muna ng pag-uusap ang legislative body at executive pagdating sa mahigpit na implementasyon kaugnay dito, at upang magkaroon ng iisang katayuan o desisyon.

Sapagka’t ang nangyayari umano, ayon kay Sacapaño, sila ang madalas na nababanatan at nakakasuhan kapag nagpatupad na ng mga nasabing orinansa, dagdag pa na wala umanong linaw kung anong supurta ang ipapaabot ng LGU sa kanila.

Aminado din ito na naririyan ang mga batas at ordinansa na anumang oras ay pwede naman nilang ipatupad, pero hindi naman aniya ganon kadali ang lahat.

Ganoon pa man, nilinaw nitong bago matapos ang 2012 ay pipilitin nilang maayos ang lahat, para pagsapit ng 2013 ay mabawasan na rin ang mga problemang ito kasama na ang suliranin hinggil sa mga pagala-galang mga vendor sa front beach. #ecm112012

Mga naghi-hair braids sa Boracay, may apela sa SB Malay

image by

http://www.gracefulwalk.com/2011/03/my-braided-hair-in-boracay.html

Nakahandang sagutin ng Sangguniang Bayan ng Malay ang apela ng grupo ng mga naghi-hair braids Boracay.

Sa paraan ng Committee Meeting na ipapatawag ng SB sa mga naghi-hair braids sa front beach, ipapaliwanag ng mga ito ang kanilang kasagutan kung bakit hindi na umano pinag-renew ng lokal na pamahalaan ang Malay ang permit ng mga ito.

Sa sulat na ipinadala ng nasabing grupo sa konseho na binasa ni SB Member Wilbec Gelito, humingi ng pag-unawa ang mga ito sa LGU Malay, kaugnay sa kabuhayang napili nila bilang kababaihan sa islang ito.

Kaya nagsusumamo ang mga kababaehang ito na gawin ng “legal” ang hair braiding sa isla dahil sa ngayon ay ipinagbabawal na ang mga ito sa front beach, sa kabila anila na ang serbisyo nila ay nagugustuhan naman ng mga turista.

Sakaling maging legal umano ang trabaho nilang ito, nakahanda naman silang sumunod sa ordinansang ipinapatupad sa isla.

Subalit ang isa umano sa nakikita ng SB ay tila hindi organisado ang mga magi-hair braids na ito sa front beach.

Ito rin ang naging mitsa umano kung bakit ipinagbabawal at hinuhuli ang mga ito, sapagkat kahit saan lang naka-puwesto.

Pero para kay SB Member Rowen Aguirre di naman kailangan ipagbawal ang mga ito, sa halip ay ilagay nalang umano sa iisang lugar para hindi na pakalat-kalat pa sa vegetation area.