"No Party on Good Friday", muling ipinaalala ng LGU Malay

Posted March 31, 2015

Ni Bert Dalida, YES FM Boracay

Muli ngayong nagpaalala ang LGU Malay tungkol sa ipinapatupad na "No Party on Good Friday"sa isla ng Boracay.

Sa kabila ito ng inaasahang pakikiisa ng lahat sa isla sa solemneng pagdiriwang ng Semana Santa at panawagan ng Simbahang Katolika sa Boracay na igalang ang Kristiyanong Selebrasyon.

Sa pamamagitan kasi ng SB Resolution No. 015 Series of 2009.

Iginiit ng LGU Malay na hindi mag-iisyu ng permit ang munisipyo para sa anumang party o maiingay na aktibidad para sa Biyernes Santo.

Epektibo itong ipapatupad mula alas 6:00 ng umaga ng Biyernes hanggang alas 6:00 ng umaga ng Sabado de Gloria o Black Saturday.

Samantala, inaasahang magbabalik sa normal ang kaliwa’t-kanang pagpa-party sa isla pagkatapos ng mga nasabing banal na araw.

Mezzanine project ng HRP Boracay, nagagamit na kahit hindi pa lubusang natatapos

Posted March 31, 2015

Ni Bert Dalida YES FM Boracay

Umani ngayon ng papuri sa mga ‘netizens’ at parokyano ng HRP o Holy Rosary Parsih Boracay ang mezzanine project ng simbahan.

Nagagamit na kasi ito ngayon kahit hindi lubusang natatapos.

Ayon sa ilang ‘netizens’at debotong Katoliko sa isla, masaya sila dahil nagagamit na nila ang mezzanine o balcony na sinimulang ipagawa ni HRP Boracay Priest Moderator Father ‘Nonoy’ Crisostomo nitong nakaraang taon.

Ayon pa sa ilang ‘church goers’, malaking tulong din ang balcony para may masilungan at maupuan ang dumarami pang nagsisipagsimba lalo na ngayong Semana Santa.

Nabatid na binuksan ang nasabing mezzanine ng simbahan nitong nakaraang Linggo, na siya namang unang araw ng Semana Santa upang ma-accommodate nito maging ang mga turistang nagsisipagsimba.

Samantala, ikinatuwa naman ni Father ‘Nonoy’ ang naging reaksyon ng mga debotong Katoliko sa pagbubukas ng balcony.

Magugunitang target sana ng simbahan na matapos ang proyekto bago ang Simbang Gabi nitong nakaraang taon, subali’t kinapos ito ng budget.

Accident prone area sa Nabas Aklan, mahigpit na tinututukan ng mga pulis

Posted March 30, 2015

Ni Gloria Villas, YES FM Boracay

“Mag-ingat sa pagmamaneho at huwag kakalimutan ang mga Road Safety Measures.”

Ito ang paalala ng Nabas Municipal Police Station kasabay ng kanilang mahigpit na pagtutok sa mga accident prone area sa lugar.

Kaugnay na rin ito ng mataas na kasong naitatala sa nasabing police station tungkol sa sunod-sunod na mga nangyayaring aksidente sa kalsada doon.

Ayon kay Nabas PNP Deputy Police Chief SPO4 Crispin Calzado.

Sa ngayon ay nakikipag-ugnayan na rin sila sa Department of Public Works and Highways (DPWH) upang madagdagan ang mga signages at mapalitan ng bago ang mga luma na.

Samantala, nabatid na nitong ika-27 ng Marso lamang ay may isa na namang vehicular accident ang nangyari sa Nabas matapos mabangga ng van ang isang nagbibisekleta.

Malaking pagbabago sa Caticlan Jetty Port nasa plano na

Posted March 30, 2015

Ni Jay-ar M.Arante, YES FM Boracay

Nasa plano na ng Provincial Government at ng Jetty Port Administration ang malaking pagbabago sa Caticlan Jetty Port.

Ayon kay Jetty Port Administrator Niven Maquirang, mayroon na silang plano para sa 2.6 hectares na reclamation project sa nasabing pantalan na gawing docking area ng mga bangka mula sa Cagban Jetty Port, kung saan dito umano ililipat ang mga Ferry Boat at Fast Craft.

Base pa sa plano, magiging organisado na ang lahat ng mga dadaong na sasakyang pandagat katulad ng Roro-Vessel na-nag do-dock sa existing port.

Samantala magtatayo rin sa reclamation area ng tatlong palapag na gusali kung saan makikita ang shopping mall, hotel, centralize ticketing ng pumpboat, holding area para sa mga resort at sa ground floor naman ang parking area.

Kaugnay nito hahabaan din umano ang existing na rampa sa Caticlan Jetty Port para sa mga cruise ship na bibisita sa isla ng Boracay.

Ayon pa kay Maquirang may sapat umanong pondo rito ang Aklan Provincial Government, ngunit tiniyak din nito na aabutin ng bilyong piso ang halagang magagastos sa nasabing proyekto.

Nabatid na ang proyektong ito sa Caticlan Jetty Port na siyang main entrance ng mga taong pumapasok sa isla ng Boracay ay inaasahang matatapos ng limang taon.

Mga establisemyentong tatamaan ng demolition ang ‘major structures’, binibigyan ng konsiderasyon ng LGU Malay

Posted March 30, 2015

Ni Bert Dalida, YES FM Boracay

Iba-iba ang epekto ng road easement sa mga resort at establisemyento sa isla ng Boracay.

Ilan sa mga ito ang maliit lang ang bahaging gigibain, habang may ilan naman na ‘major structures’ ang tatamaan.

Kaugnay nito, nilinaw ngayon ng BRTF o Boracay Redevelopment Task Force na magbibigay ng konsiderasyon ang LGU Malay sa mga establisemyentong kailangang gibain ang bahagi ng kanilang gusali katulad ng malalaking poste.

Ayon kasi kay BRTF Secretary Mabel Bacani, summer season ngayon kung saan ‘fully book’ ang mga resort, kung kaya’t hindi ito maaaring i-demolish.

Nabatid na ikinabahala ng karamihan sa mga establisemyento sa isla ang magiging epekto ng road easement.

Magiging ‘eye sore’ umano kasi ito para sa mga turista kung ipagpapatuloy ang demolition lalo pa’t nalalapit na ang APEC ministerial meeting.

Maliban dito, itinuturing ding kawalan para sa mga resort kung magkakansela sila ng ‘bookings’ para mag-voluntary redevelopment ngayong summer season.