Mag-asawang turista sa Boracay, nabiktima ng magnanakaw

Posted July 8, 2015

Ni Jay-ar M. Arante, YES FM Boracay

Hindi akalain ng mag-asawang nagbabakasyon sa isla ng Boracay na mabibiktima ang mga ito ng magnanakaw sa loob mismo ng kanilang inuupang kwarto sa isang Inn sa Boracay.

Sa blotter report ng Boracay PNP, nakilala ang mag-asawang biktimang si Leon Wheland Couch III, 44-anyos at residente ng Florida, USA kasama ang asawa nitong si Russdawn Soliman, 37-anyos.

Sumbong ng biktimang babae na nagising umano siya bandang ala-6 ng umaga kanina ng mapansin nito na bahagyang nakabukas ang main door ng kanilang kwarto kung kayat isinara nita ito saka natulog muli.

Ngunit ilang minuto lang umano ang nakalipas ay kumatok sa kanilang pintuan ang caretaker at ipinakita sa kanya ang kanyang hawak-hawak na pitaka at short saka itinanong kung sakanila umano ito matapos niyang makita sa labas ng kwarto.

Agad namang sinabi ng biktimang lalaki na sa kanya nga ang mga ito kung saan naglalamanan umano ito ng cash na P5,000.

Dahil dito agad naman nilang sinuri ang iba pa nilang gamit sa loob ng kwarto at dito nga nila na diskubrehan na nawawala ang backpack ni Mr. Couch na nakalagay sa sahig at naglalaman ng Loptop, camera, dalawang USB Disk at cellphone.

Samantala, patuloy naman ang ginagawang embistigasyon ng Boracay PNP hinggil sa nangyaring insidente kung saan bigo pa ang mga itong matukoy ang salarin sa pagnanakaw.

Police Regional Office-6 nagsagawa ng re-orientation ng Municipal Advisory Council sa Aklan

Posted July 8, 2015

Ni Alan Palma Sr., YES FM Boracay

  

Muling nagsagawa ng orientation ang Police Regional Office-6 sa mga miyembro ng Municipal Advisory Council sa probinsya ng Aklan nitong nakaraang July 6,2015.

Ang nasabing aktibidad ay dinaluhan ng mga napiling Chairman at Members ng MAC mula sa iba’t-ibang bayan sa Aklan para muling ipresenta ang layunin ng pagtatag ng Advisory Councils na bahagi ng programa ng pambansang kapulisan na PNP P.A.T.R.O.L Plan 2030.

Ito ay isinagawa sa Aklan Police Provincial Office o APPO na dinaluhan din mismo ni Aklan Provincial Director Senior Superintendent Iver Apellido .

Sa ginawang lecture ni PRO-6 PNCO PO3 Francisco B. Lindero Jr., ipinunto niya na malaki ang katungkulan ng mga napiling council para sa ikakabuti ng serbisyo ng mga kapulisan kung saan napasama ang PNP sa pinaka-corrupt na ahensya ng gobyerno noong taong 2003.

Ang Advisory Council ay katuwang ng Technical Working Group ng PNP para magbigay ng payo at suporta para sa mga programa at estratehiya para sa ikagaganda ng imahe ng mga kapulisan.

Ilan sa mga chairman at miyembro nitong advisory councils ay kinabibilangan ng mga personalidad mula sa sector ng academe, media, business group, simabahan, NGO at Local Government Units.

Construction at expansion project ng Caticlan Airport inaasahang matatapos sa 2018

Posted July 8, 2015

Ni Jay-ar M. Arante, YES FM Boracay

Tatlong taon pa umano ang aantayin bago tuluyang makumpleto ang construction at expansion project ng ginagawang Caticlan Airport.

Ito ang sinabi ni Engr. Edgar Doña ng TransAir matapos na maimbitahan ang mga ito sa 23^rd SB Session ng Malay kahapon.

Ayon kay Engineer Doña ang proyekto umanong ito ay nagsimula noong 2010 kung saan ngayon ay natapos na nila ang 1, 650 meters runway na kadugtong ng 900 meters sa kasalukuyang ginagamit ng paliparan.

Umaasa umano sila na makukumpleto ang 1, 800 meters run way para ma-accommodate ang malalaking aircraft sa Marso 2016.

Samantala, sinabi nito na maaari na silang tumanggap ng eroplano na may 70-80 pax passengers ngayong buwan ng Oktobre sakaling mabigyan sila ng permit ng Civil Aviation Authority of the Philippines (CAAP). 

Nabatid na limitado lamang ngayon ang biyahe ng mga eroplano sa nasabing paliparan kung saan tumatanggap lamang sila ng maliliit na eroplano at day-time lang din ang kanilang operasyon.

Ang Caticlan Airport ay balak gawing International Airport dahil sa dumaraming mga turista ang nagbabakasyon sa isla ng Boracay mula sa ibat-ibang panig ng mundo.

Commissioning ng TIEZA sa pumping station sa Bulabog malaki umanong tulong sa Boracay

Posted July 8, 2015

Ni Jay-ar M. Arante, YES FM Boracay

Malaki umanong tulong sa isla ng Boracay ang ginawang testing at commissioning ng Tourism Infrastructure and Enterprise Zone Authority (TIEZA) sa pumping station sa Bulabog beach.

Ito ang sinabi ni Engr. Giovanni Rullan, TIEZA consultant at head ng nasabing project matapos ang kanilang ginawang commissioning nitong nakaraang linggo sa nasabing area.

Aniya, matagumpay umano ang kanilang ginawang operation sa paglinis ng kanal partikular sa D’mall, Regency at Mandarin area na bahagi ng kanilang phase 1 project.

Sinabi pa nito na ang tubig sa Bulabog beach ay hindi maapektuhan ng kanilang ginawang testing at commissioning dahil bago umano nila ito pinalabas ay gumamit muna sila ng organic minerals sa pumping station ng halos isang buwan para hindi ito mangamoy bago ipalabas.

Samantala, sa ngayon umano ay nasa proseso na sila para sa pag-turn over ng nasabing pumping station sa Boracay Island Water Company (BIWC) kung saan mayroon umano silang joint agreement para rito.

Dagdag nito na kung sakaling maiturn-over na ito sa BIWC ay sila na ang magtutuloy sa maintenance ng nasabing drainage system.

Nabatid na ang first phase project na ito ay nagkakahalaga ng P85-million para mabawasan ang mga pagbaha partikular sa 11-hectare central business district ng Boracay.