PSA-Aklan nagsagawa ng survey of Tourism Establishments sa Pilipinas

Posted May 16, 2015

Ni Jay-ar M. Arante, YES FM Boracay

Nagsagawa ngayon ng 2014 Survey of Tourism Establishments sa Pilipinas (STEP) ang Philippine Statistics Authority-Aklan.

Ito’y naglalayong mangolekta ng impormasyon sa mga magagamit na supply ng turismo kalakal, mga produkto at serbisyo, na kung saan ay mahalagang input upang masukat ang pang-ekonomiyang mga kontribusyon ng industriya ng turismo sa ekonomiya.

Nabatid na sa 233 establishments sa Aklan ang pinili bilang mga halimbawa para sa STEP kung saan higit sa kalahati rito ay nagmumula sa isla ng Boracay.

Ayon naman kay Interim Provincial Statistics Officer Rodelyn Panadero, ang mga establisyementong sakop ng tourism survey ay ang accommodation, restaurant, transport operator, tour at travel agency, health at wellness at iba pang tourism activities.

Sinabi pa nito na ang turismo ay may malaking ginagampanang papel at impak sa ekonomiya  para sa pag-unlad ng bansa.

Kaugnay nito umapela naman si Panadero sa lahat ng mga respondents na magbigay ng kumpleto at totoong impormasyon sa mga PSA Filed Personnel na nagsasagawa ng survey.

Samantal, iginiit din nito na lahat ng impormasyon na maibibigay sa kanila ay “strictly confidential” at hindi umano nila ito gagamitin para sa taxation, investigation o iba pang law enforcement purposes.

Pagpapapintura sa street gutter ng main road Boracay, tapos na

Posted May 16, 2015

Ni Bert Dalida YES FM Boracay

Tapos na ang pagpapapintura sa street gutter ng main road Boracay.

Ito ang kinumpirma ni Municipal Engineer OIC Engr.Arnold Solano sa kanyang text message kaugnay ng pagpapaganda ng kalsada mula sa Barangay Manoc-manoc papuntang Barangay Balabag.

Bagama’t hindi naihabol bago ang APEC Ministerial meeting sa Boracay, kapansin-pansin na trinabaho ang pagpipintura sa street gutter kahit gabi.

Nabatid na 410 thousand pesos ang inilaang budget ng LGU Malay para sa pagpapapintura ng nasabing existing curve at gutter ng kalsada.

Magugunitang ang pagapapapintura sa street gutter ang naging tugon ng LGU Malay sa mga aksidenteng dulot ng sira o kawalan ng street light sa mainroad na madalas mangyari tuwing gabi.

Ikatlong Flores De Mayo sa Boracay ikinasa na ng BFI

Posted May 15, 2015

Ni Jay-ar M. Arante, YES FM Boracay

Muling ikinasa ng Boracay Foundation Incorporated (BFI) ang ika-tatlong Flores De Mayo ngayong buwan sa isla ng Boracay.

Ayon kay Marketing Officer Raffy Cooper ng BFI, ang mga kasali umano rito ay mula sa mga hotel at resort kasama na ang ibat-ibat organisayson sa isla.

Sinabi din nito na kakaiba ang Flores De Mayo sa Boracay kumpara sa nakaugaliang tradisyon sa bansa dahil sa isasagawa umano ito sa sikat na white beach.

Ito din umano ay pagpapakita sa tradition ng Filipino sa mga turistang nagbabakasyon sa Boracay lalo na at kasalukuyang ginaganap ang APEC sa isla.

Kaugnay nito isang misa ang magaganap sa Mayo 23 sa Balabag Holy Rosary Parish Church bandang ala-5 ng hapon kasabay ng pag-blessing sa mga partisipante at susundan naman ng parada mula sa station 1 hanggang sa Boracay Regency Beach Resort Station 2.

Samantala, kabilang naman sa criteria for judging ay ang Best in Escort, Best in Floral Arc, 3^rd grand Boracay Festival Queen at Best Dress.

Construction sa gilid ng laketown sa Boracay pinatigil ng LGU Malay dahil sa mga violation

Posted May 15, 2015

Ni Jay-ar M. Arante, YES FM Boracay

Pinatigil ngayon ng Sangguniang Bayan ng Malay at ng Municipal Planning ang ginagawang construction sa gilid ng Lake Town na pagmamay-ari ng isang resort sa Boracay.

Ito’y matapos na makitaan ng ilang paglabag katulad ng walang building permit at kaukulang dokumento mula sa LGU Malay tungkol sa kanilang ginagawang construction.

Kaugnay nito sinabi ni SB Member Frolibar Bautista sa privilege hour ng 16^th regular SB Session ng Malay nitong Martes na kailangang mag-order na ng demolition para dito.

Aniya, sinuri niya ito at hinanapan ng dokumento ngunit wala umano silang maipakita na mga permit mula sa municipal planning at engineering office.

Samantala,sinabi naman ni Municipal Planning Officer Alma Belehirdo na hindi umano sila ang nagbigay ng issuance sa nasabing construction nito gayon din ang municipal engineering office.

Tanong pa ni Bautista na bakit pinahintulutan ang nasabing construction gayong may setback na umiiral sa Boracay at ang mahigpit na pagbabawal ng pagpapatayo ng anu mang instraktura sa gilid ng mga water waste.

Sa ngayon nais namang tukuyin ni Bautista kung sino ang nagbigay ng permiso dito upang  pagpanagutin na ngayon ay pinatigil na ng LGU Malay.

Dalawang divers sa Boracay, nailigtas matapos mawala ang bangka habang nagda-dive

Posted May 15, 2015

Ni Bert Dalida YES FM Boracay

Nilinaw kahapon ng Philippine Coast Guard (PCG) Boracay na nawala ang bangka ng dalawang divers sanhi ng kanilang pagpalutang-lutang sa laot.

Nabatid sa report ng PCG na nag-diving sa Bulabog Point ang mga divers na sina Darwin Tejada, 22 anyos, dive master ng Calypso Diving School, at ang 36 anyos na Japanese National na si Jinichi Okada nang mangyari ang insidente.

Ayon pa sa PCG, lumagpas na ang dalawa sa oras ng kanilang pag-ahon kung kaya’t hindi na umano nila nakita ang kanilang bangka.

Dahil dito, tumagal ng dalawang oras sa laot ang dalawa bago nailigtas ng Rescue Team.

Samantala, itinuturo namang rason ng PCG ang malakas na kuryente ng tubig sa lugar kung bakit nawala ang bangka ng mga nasabing divers.