Tuesday, February 24, 2015

Mga kaso ng pananakit at child labor, mahigpit na tinututukan ng BTAC-WCPD sa isla ng Boracay

Posted February 23, 2015
Ni Gloria Villas, YES FM Boracay

Karamihan sa mga naitala sa Women and Children Protection Desk (WCPD) ng Boracay PNP Station ang mga kaso ng pananakit sa kabataan at kababaihan.

Ito ang sinabi ni SPO2 Lyn Ibañez ng Women and Children Protection Desk, kung kaya’t mahigpit umano nila ngayong tinututukan ang mga ganitong kaso.

Anya, isa sa mga hakbang na ginagawa nila sa kasalukuyan ang pagkakaroon ng mga “counseling program” kasama ang DSWD sa bawat barangay o komunidad.

Sa ilalim din umano ng mga programa ng Social Welfare and Development Office, naipapaliwanag sa mga magulang at kabataan ang mga dapat at hindi dapat gawin.

Ito’y katulad na lamang umano ng sapilitang pagpapatrabaho sa isang bata lalo na ang may edad 15 pababa na maituturing na paglabag sa Republic Act No. 9231 o Child Labor Law.

Nabatid din kasi na may ilang mga magulang ang naispatan sa Boracay na sya din umanong nag-uutos mismo sa kanilang mga anak na gumawa ng sandcastle sa isla lalo na kapag gabi at minsa’y inaabot pa ng hating-gabi.

Samantala, iginiit naman ni Ibañez na maaaring patawan ng kaukulang parusa ang mga maaaring lalabag sa  Republic Act No. 9262 at Republic Act 7610 o ang mga batas na nagbibigay proteksyon sa mga kabataan at babaeng nakakaranas ng pang-aabuso.

No comments:

Post a Comment