DepEd Aklan, makikipagpulong sa mga stakeholders para sa K to 12 program

Posted July 14, 2015

Ni Jay-ar M. Arante, YES FM Boracay

Nakatakdang makipagpulong ang Department of Education (DepEd) Aklan kasama ang mga stakeholders kaugnay sa K to 12 program.

Ito ay gaganapin bukas araw ng Miyerkules sa ABL Sports Complex sa bayan ng Kalibo simula  alas-9 ng umaga na kung saan ay may tema itong “Ang K to 12, Kayang-kaya Kapag Sama-sama”.

Dahil dito hinihikayat ni Aklan School District Superintendent Dr. Jesse Gomez, ang lahat ng mga namumuno sa probinsya, bayan at barangay na dumalo para rito upang lalong maintindihan ng mga leader kung ano talaga ang tinatawag na K to 12.

Hinihiling din ni Gomez na dumalo rito ang representante ng mga ahensya ng gobyerno na kabilang sa edukasyon , media at General PTA President ng lahat ng public at private kindergarten, elementary, secondary at integrated school sa Aklan.

Ayon pa sa Division Aklan, ito ay isang mahalagang okasyon para masiguro ang tagumpay ng implentasyon ng K to 12 Basic Education Program lalo na sa Senior High School.

Samantala, inaasahan naman ang pagdating nina Congressman Teodorico Harisco Jr., Governor Florencio Miraflores at Vice Governor Billie Calizo Quimpo sa naturang pagpupulong.

Tourist Arrival sa Boracay umabot na sa mahigit 800 libo sa first half ng 2015

Posted July 14, 2015

Ni Jay-ar M. Arante, YES FM Boracay

www.google.com

Umaabot na ngayon sa 852,168 ang naitalang tourist arrival sa isla ng Boracay sa loob ng first half ng taong 2015.

Ito ay base sa record ng Municipal Tourism Office (Mtour) Malay kung saan naitala ang 357, 303 foreign tourists, 25,638 overseas Filipino at 469,227 na domestic tourists.

Nabatid na sa buwan ng Abril nakapagtala ng 178, 656 tourists arrival na siyang may pinaka mataas na bilang na tourists registered para sa first semester.

Sinundan naman ito ng buwan ng Mayo na 168, 025, January na 133, 598, February -130, 293 at March 124, 804 habang ang pinakababa ay ang buwan ng Hunyo na 116, 792 tourists.

Samantala, inaasahan ng Provincial Tourism Office at ng Malay Tourism Office na maaabot ang target na tourist arrival na 1.5 Milyon ngayong taong 2015.

Fire Dancers sa Boracay pinagbabawalang mag-perform ng walang permit sa LGU Malay

Posted July 13, 2015

Ni Jay-ar M. Arante, YES FM Boracay 

Mahigpit na ipinagbabawal ng Environmental Management Services (EMS) ng Malay ang pagtatanghal ng mga Fire Dancers sa Boracay ng walang permit mula sa LGU.

Ito ang sinabi ni Malay EMS Administrative Assistant Adel Lumagod matapos umano nilang imbitahan ang mga ito para sa isang meeting na tinawag na information campaign. 

Dito ipinaliwanag ng EMS sa mga Fire Dancers na mayroong existing Municipal Ordinance 257 series of 2014 ang LGU Malay kung saan mahigpit na ipinagbabawal na mag-perform ang walang Mayor’s permit, endorsement mula sa PESO Office at Health Card.

Dahil dito nakatakda umano silang mag-monitor sa darating na Biyernes para alamin kung ang lahat ng mga Fire Dancers ay mayroon ng permit matapos nila itong bigyan ng 30 working days na maayos ang mga requirements. 

Ayon kay Lumagod sakaling mahuli nilang nagpe-perform ang isang fire dancer na walang permit ay iisyuhan nila ito ng citation ticket na lumalabag sa nasabing ordinansa.

Maliban dito mahigpit din silang pinagbabawalang sumayaw sa pathway o sa vegetation area ng beach front gayon din ang pagsasayaw sa buhangin ng walang platform.

Ang Fire Dance ay isa sa mga nagpapasiglang atraksyon sa Boracay tuwing pagsapit ng gabi na sadyang kinagigiliwan ng mga turista.

Mga lumutang na patay na isda sa Bulabog beach hindi umano dahilan ng Coliform bacteria

Posted July 13, 2015

Ni Jay-ar M. Arante, YES FM Boracay

Tiniyak ngayon ng LGU Malay na hindi dahilan ng high chemical content o Coliform bacteria ang sanhi ng mga nakitang palutang-lutang na patay na isda sa Bulabog beach Boracay.

Ito ay base sa pagsusuri ng Environmental Management Services (EMS) Unit matapos na makita ang mga patay na isda nitong Hunyo 17.

Ayon kay Malay EMS Administrative Assistant Adel Lumagod, maliliit lamang na isda ang nakita sa may nasabing beach area na kung tawagin ay Sap-Sap.

Base pa sa pag-aaral posible umanong itinapon ito ng mga mangingisda na sumama sa kanilang mga nahuli dahil sa hindi naman ito mabibili sa mga tindahan na kinukunsidira nilang “trash fish” taliwas sa mga haka-hakang namatay ito dahil sa Coliform bacteria.

Samantala, nakikipag-ugnayan naman ngayon ang EMS Unit sa Environmental Management Board (EMB) Region 6 para sa masusing embistigasyon at para ma-assist ang sitwasyon ng kalidad ng tubig sa Bulabog beach.

NTC magsasagawa ng Mobile Licensing sa isla ng Boracay ngayong Hulyo

Posted July 13, 2015

Ni Jay-ar M. Arante, YES FM Boracay

Nakatakdang magsagawa ng Mobile Licensing ang National Telecommunications Commission (NTC) sa Boracay ngayong darating na Hulyo 27-31 at sa Agosto 19-21 ngayong taon.

Ito ay kinakailangan para sa lahat ng mga nasa business ng purchasing, selling, leasing, retailing o mga nag-aayos ng sirang cellphone na kung saan ay kinakailangan nilang kumuha ng permit at registration certificate mula sa National Telecommunications Commission.

Kasama rin dito ang radio transceivers kung saan ang NTC ay inaatasan ang radio transceiver users na kumuha ng permit sa kanila para sa kanilang legal operation.

Nabatid na kung bigo ang mga itong makakuha ng permit ay maaaring maipasara ang kanilang establisyemento o mabigyan ng penalidad kasama na ang pag-kumpiska ng kanilang cellphone units at radio transceiver sets.

Dahil dito ang NTC Personnel ay tutungo sa Boracay sa nasabing petsa para e-assist ang mga aplikante na kumuha ng kinakailangang lisensya sa kanilang negosyo.

Samantala, maliban sa mga ito hinihikayat rin ng NTC ang business at commercial establishment kagaya ng Hotel/Resorts, Mall at Restaurant owners ng two-way radio transceivers na bisitahin lamang sila sa Marzon’s Resort Station 3 para kumuha ng kinakailangang permit at lisensya upang maiwasan ang pag-kumpiska at pagpataw sa kanila ng penalidad.