Mga nagsipagsimba sa Nativity Mass kagabi, nagmistulang record breaking

Posted December 25, 2014

Ni Bert Dalida, YES FM Boracay

Nagmistulang record breaking ang mga nagsipagsimba sa Nativity Mass kagabi.

Ayon kay Holy Rosary Parish Boracay Team Moderator Fr. Arnold Crisostomo, masaya ito dahil mas marami ang mga nagsipagsimba kung ikukumpara sa dalawang taon nitong karanasan sa pagmimisa sa bispera ng Kapaskuhan.

Maliban dito, madalas umanong umuulan tuwing nativity mass, kung kaya’t hindi gaano karami ang nakakapagsimba.

Bagama’t hindi umano nito matantiya ang bilang ng mga dumalo sa misa, sinabi pa ni father Nonoy na puno maging ang plaza.

Masaya din umano ito dahil sa nakita niyang bakas sa mukha ng mga nagsipagsimba ang kasiyahan.

Samantala, hanga din umano si father Nonoy sa dami ng mga batang nagsipagsimba kagabi at kaninang umaga.

Inanyayahan naman nito ang lahat para sa misa ng pasasalamat para sa mga biyayang natanggap na gaganapin sa araw ng Miyerkules, alas 9:00 ng gabi.

Nabatid na hindi lamang mga Pilipino ang dumadalo sa misa sa HRP Boracay tuwing pasko kungdi pati na rin ang mga turistang banyaga.