Pagtaas sa singil ng Terminal Fee sa Caticlan Jetty Port, dapat unawain --- Maquirang

Ni Edzel Mainit, Senior Field Reporter, YES FM Boracay

Tila inaasahan na ni Caticlan Jetty Port Administrator Nieven Maquirang ang pagtutol ng publiko sa pagtaas ng Terminal Fee sa Caticlan Jetty Port, at naiintindihan naman niya ito, lalo na kung ang pagtutol na ito ay mula sa stakeholders.

Gayon pa man, pag-unawa ang hinihiling ni Maquirang mula sa mga apektadong sektor ng napipintong pagtataas ng singil sa nasabing puwerto.

Ayon dito, hindi lamang umano ang Caticlan Jetty Port ang nagpapatupad ng na may karagdagan singil dahil maging ang Caticlan Airport ay may ihinihirit ding pagtataas sa kanilang mga singilin.

Hindi rin dapat aniya manghinayang sa mangyayaring pagtataas, lalo pa at ang kikitain naman mula dito ay mapupunta sa pagpapa-unlad ng pasilidad ng pantalan para sa maayos na pagtanggap sa mga turista, at hindi naman pwedeng lahat na lang umano ay iasa pa sa kakahingi sa pamahalaang nasyonal.

Samantala, kahit na may mga tumututol, naniniwala pa rin ang administrador na ipagpapatuloy pa rin ng Sangguniang Panlalawigan ang pag-pasa sa ordinansang babago sa Revenue Code ng Aklan.

Subalit ang section o probisyon umano doon na tinututulan at kwestiyunable ay maaring hindi muna ipatupad.