Seguridad sa pagdating ng mga cruise ship sa Pebrero at Marso, hindi binago --- Cabural

Ganoon pa rin ang [ating] security preparations.

Ito ang kampanteng sinabi ni Police Senior Inspector Joeffer Cabural, hepe ng Boracay PNP Station, kaugnay sa pagdating ng dalawang cruise ship sa darating na Pebrero at Marso.

Base umano kasi sa kanilang pagpupulong kasama ang Boracay Action Group, DOT, at pamunuan ng Cagban at Caticlan Jetty Port kamakailan lang, ang anchorage o pagdadaungan ng mga nasabing barko ay doon din dati sa kung saan dumaong ang Royal Caribbean nitong nagdaang buwan ng Oktubre ng nagdaang taon.

Ibig sabihin, hindi sila dadaong sa front beach, kundi sa pagitan ng Caticlan at Boracay.

Bagama’t hindi na nito dinitalye pa ang tungkol sa kung gaano karami at kung saan ipapakalat ang mga pulis para dito, sinabi ni Cabural na mas maliit lamang ang darating na cruiseship kung ikukumpara sa Royal Caribbean.

Ang pagdating ng mga bibisitang cruiseship sa isla ng Boracay ay isa sa mga pinaghahandaan ngayon ng pamahalaang probinsya at ng Departamento ng Turismo.  #bd012013

Dahil sa hindi naisauling iPhone, mag live in partner sa Boracay, timbog sa entrapment operation

Ni Malbert Dalida, News Director, YES FM Boracay

May  napulot ka bang bagay na hindi sa’yo?

Kung ganoon, mas makabubuting isauli mo ito ng maluwag sa puso.

Kung hindi, baka karmahin ka at ika’y makalaboso.

Ito ang sinapit ng diyes y otso at bente uno anyos na maglive in partner, matapos matimbog ng mga pulis Boracay sa isang entrapment operation kahapon ng hapon.

Ang siste, humingi umano ng trenta mil pisos ang lalaking suspek sa biktima, na isang general manager ng isang resort sa isla, kapalit ng kanyang iPhone.

Nabatid na bandang alas dos din kahapon ng hapon ay nagparekord sa Boracay PNP ang biktima tungkol sa kanyang nawawalang gadget.

Nawala umano ang kanyang iPhone nitong nagdaang Linggo ng madaling araw, nang pumasok ito sa isang disco bar.

Mabilis namang nagsagawa ng entrapment operation ang mga otoridad, nang bumalik at muling magsumbong ang biktima sa himpilan ng pulis.

Sa nasabing pagkakataon, itinimbre ng biktima na may lumapit umano sa kanyang lalaki at humingi ng naturang halaga ng pera.

Sa nasabing operasyon ay tinanggap ng maglive in partner ang pera sa mismong opisina ng pinagtatrabahuang resort ng biktima.

Kaagad namang inaresto ang mga suspek at kasalukuyang nasa kostodiya ng Boracay PNP, para sa karampatang disposisyon.

Sa tinutuluyang boarding house naman ng mga suspek narekober ang Iphone ng nasabing manager. 

Pampasaherong Traysikel sa Manoc-manoc, Boracay, Sumemplang; Drayber at mga pasahero, sugatan

Hindi na nakarating sa kani-kanilang paroroonan ang mga pasahero ng isang traysikel, matapos itong maaksidente sa barangay Manoc-manoc, Boracay kaninang umaga.

Base sa report ng Boracay PNP, pumutok ang unahang gulong ng nasabing traysikel, dahilan upang mawalan ng kontrol ang bente tres anyos na drayber nitong si Hernan Irabon.

Sinasabing bumangga pa sa pader ang traysikel bago ito sumemplang, kung kaya’t nagtamo ng pinsala sa iba’t-ibang parte ng katawan ang mga pasahero nitong sina Raffy Dalida y Abayon, Genaro Raz y Gonzalez, at Lucia Gelito y Semporio.

Nabatid na papunta sana ng Cagban port ang mga ito ng mangyari ang insidente, mag-aalas nuwebe kaninang umaga.

Samantala, dahil sa tinamong pinsala sa ulo at kaliwang braso, ay minarapat namang ilipat sa isang pagamutan sa bayan ng Kalibo ang drayber na si Hernan at ang pasahero nitong si Genaro.

Nasa kostodiya naman ng Boracay PNP ang nasabing traysikel, na maliban sa nabasag ang mga wind shield ay nagtamo din ng pinsala sa iba’t-ibang parte nito. 

Matapos mabawasan, mga pulis sa Boracay, muling nadagdagan

Matapos mabawasan ang puwersa ng mga pulis Boracay nitong nagdaang buwan ng Setyembre, kinumpirma naman ni Police Senior Inspector Joeffer Cabural, hepe ng BTAC o Boracay Special Tourist Assistance Center, na mayroon nang dagdag at bagong puwersa ng mga pulis dito.

Ito’y matapos matanggal at mailipat sa ibang police station ang mahigit dalawampung pulis nitong nagdaang ika-labing anim hanggang dalawampu’t isa ng Setyembre, dahil sa iba’t-ibang kadahilanan.

Subalit ang naipalit umano sa dalawampung na-relieve na mga pulis dito ay anim pa lamang, mula sa Regional Mobile Group.

Nabatid na bago madagdagan ang mga pulis dito sa isla ay kailangan pang idaan sa karampatang proseso.

Ibig sabihin, magre-request muna ang Boracay PNP sa Provincial Command, at ang Provincial Command naman ang hihiling nito sa PNP Regional Office.

Samantala, habang ginagawa ang balitang ito ay hindi pa masabi ni Cabural kung madadagdagan pa ang anim na bagong pulis dito, kapalit ng mga narelieve at mga kusang nagparelieve mula sa Boracay PNP.

Matatandaang nangako ng 24/7 o bente kuwatro oras na police visibility sa isla ang nasabing hepe, nang mag courtesy call ito sa mga LGU Malay, iba pang offices at mga stakeholders sa Boracay. | md102012

Lalaki, patay sa rambol sa Boracay

(Ni Malbert Dalida, Senior Field Reporter)

Dead on arrival sa ospital sa Boracay ang isang bente-kwatro anyos na lalaki makaraang mabugbog sa isang rambol sa Sitio Angol, Manoc-manoc, Boracay noong Mayo a-singko, taong kasalukuyan.

Malubhang pinsala sa ulo ang tinamo ng biktima na si Renan Borbon ng Bat-os, San Ramon, Pilar, Capiz, habang nagtamo rin ng pinsala sa iba’t-ibang parte ng katawan ang mga kasamahan nitong sina Roque Lorenzo y Manugid, trenta’y-dos anyos ng Kalibo, Aklan, at Jobert Dolar y Porras, bente uno anyos ng Lemery, Iloilo.

Ayon sa police report ng Boracay PNP, dakong alas-onse kagabi matapos ang inuman sa isang tindahan sa nasabing barangay, pauwi na sana ang mga ito nang umano’y harangin ng mga suspek na sina Christopher Cahilop y Casimiro, Jerry Casimiro y Griño at Raymond Tibio ng Tasblas, Romblon, nasa legal na mga edad at pawangresidenta ng Brgy. Manoc-manoc.

Armado umano ng isang patalim ang suspek na si Raymond habang bato naman ang hawak ni Christopher nang daluhungin ng mga ito ang mga biktima hanggang isang rambol ang naganap.

Tumakas at naiwan ng mga kasama si Borbon na sinasabing pinagtulungang bugbugin ng mga suspek.

Duguan na ito nang balikan ng mga kasama na humingi ng saklolo sa mga otoridad at agad itong isinugod sa ospital subali’t idinelekrang dead on arrival.

Arestado naman ang dalawa sa tatlong suspek at nasa kustodiya ng Boracay PNP habang pinaghahanp naman ang isa sa mga ito na si Raymond Tibio.