Linggo ng palaspas sa Boracay kahapon, dinagsa ng mga debotong Katoliko

Posted April 14, 2014

Ni Bert Dalida, YES FM Boracay

Dinagsa ng mga debotong Katoliko ang selebrasyon ng Linggo ng palaspas sa Boracay kahapon.

Ayon kay HRP o Holy Rosary Parish Team Mediator Father Arnold Crisostomo, mas marami ang mga dumalo sa misa kahapon kumpara sa nakaraang taong pagdiriwang ng Linggo ng palaspas.

Kapansin-pansin kasi ang mga taong siksikan sa labas ng simbahan na nag-abang sa misa at sa pagpapabendisyon ng kanilang dalang palaspas.

Sinabi pa ni Crisostomo na patunay lamang ito na marami ang tao sa Boracay ang nais makibahagi sa pagdiriwang ng Semana Santa sa kabila ng pagiging abala ng mga ito.

Ang Linggo ng palaspas ang siyang unang araw ng Semana Santa bilang paggunita sa matagumpay na pagpasok ni Hesu Kristo sa Herusalem.