Dredging company sa Aklan, tiniyak na walang maaapektuhan ng kanilang dredging project sa Aklan River

Posted February 17, 2015

Ni Gloria Villas, YES FM Boracay

Tiniyak ng Santarli Panay Resources Company na walang maaapektuhan ng kanilang dredging project sa Aklan River.

Ito’y sa kabila ng pangamba ng ilang mga Aklanon na baka maubos ang buhangin doon.

Paliwanag ni Pablo Ocampo, consultant ng nasabing kompanya, masusi ang nasabing proseso at hindi sila nagkukulang na makipag-ugnayan sa lahat ng mga ahensya ng gobyerno lalo na sa pamahalaang probinsyal ng Aklan.

Anya, sinisiguro din nila na kumpleto at sumusunod sa mga alituntunin ang kanilang mga pagpaplano at pagsasagawa nito.

Saad ni Ocampo, kapag tapos na umano sila sa 15 million cubic meters sa loob ng tatlong taon, may environmental impact study na by flow of nature, kung saan mga 20 million cubic meters ang kapalit naman sa bawat 5 million cubic meters na kinukuha nila.

Kaya naman hindi talaga umano mawawalan ng buhangin doon.

Malayo din umanong maapektuhan ng maalat na tubig ang iniinom na tubig at irigasyon.

Ito’y dahil, hindi naman umano sa gitna kumukuha ng buhangin ang mga sand at gravel permittees kundi sa kilid lamang ng Aklan River.

Samantala, binigyan naman ng Environmental Compliance Certificate (ECC) ang Santarli Panay Resources Company o STL noong Enero 2014 matapos ang mahabang pag-aaral.

Nitong nakaraang taon lamang, sinuportahan mismo ni Aklan Governor Florencio Miraflores ang proyekto upang ma-declog o hindi na bumara ang Aklan River na siya namang nagiging sanhi ng pagbaha sa bayan ng Kalibo, Libacao, Banga, Malinao, Lezo, Numancia, at Madalag.