Clearing operation laban sa mga illegal vendors, commissioners, at tour guide, sinaluduhan

Posted February 17, 2015

Ni Bert Dalida, YES FM Boracay

Photo Credit by BTAC

Umani ng papuri mula sa mga netizens ang LGU Malay dahil sa ginawang clearing operation kahapon laban sa mga illegal vendors, commissioners at tour guides.

Ayon sa isang netizen na isa rin sa mga stakeholder sa Boracay, ipinakita umano ng LGU Malay ang kamay na bakal sa pagpapatupad ng matagal nang batas sa isla.

Itinuring namang ‘answered prayer’ ng isa pang face book user ang naging hakbang ng munisipyo matapos makumpiska kahapon ang brochures, flyers at iba pang marketing materials mula sa mga tinaguriang ‘pasaway sa baybay’.

Photo Credit by BTAC

Binalaan din ang mga ito kaugnay sa mga kaakibat na penalidad kapag nahuling muli.

Nabatid na marami nang nakarating na reklamo sa Department of Tourism, LGU at Boracay PNP mula sa mga turistang nabibiktima umano ng estafa o panloloko ng mga illegal commissioners at tour guides.

Marami din ang nagpaabot ng pagkadismaya sa mga nang-aalok ng kung anong paninda sa mga turistang namamasyal o nagpapahinga sa beach kung kaya’t kumilos na ang LGU Malay sa tulong ng Boracay PNP at Task Group Boracay-Philippine Army.