YES THE BEST 911 BORACAY

Monday, October 07, 2019

Suspek sa pag saksak-patay sa caretaker ng isang resort patuloy na pinaghahanap

Posted October 7, 2019
Inna Crol L. Zambrona, YES THE BEST BORACAY NEWS DEPARTMENT

Image may contain: one or more people and text
ctto
Patuloy ang ginagawang pagtugis ng Malay PNP sa suspek na sumaksak sa isang caretaker ng resort sa Sitio Bolabog Brgy. Balabag, Boracay nitong umaga ng Oktubre 4.

Ang nadiskubreng bangkay ay kinilalang si Dionilo Flores y Molas, 54 anyos ng Tayhawan Lezo, Aklan.

Nabatid na patay na at tadtad ng saksak nang matagpuan ang bangkay ng biktima sa loob mismo ng naturang resort na kanyang pinag-tatrabahuhan.

Ayon sa imbestigador ng Malay PNP, maliban sa basag ang ilong ng biktima ay nagtamo ito ng tatlong saksak sa likurang bahagi ng ulo at dalawang saksak naman sa leeg.

Bago madiskubre ang bangkay, pinuntahan umano ito ng kasamahang maintenance ng resort ang kwarto ng biktima para tanungin sana kung anong oras bubuksan ang generator subalit sa pagpasok nito ay laking gulat nalang nito na naliligo na si Flores sa kanyang sariling dugo.

Agad na tumawag ng pulis ang maintenance at dinala pa sa ospital ang biktima subalit idineklarang itong DOA.

Samantala, sa follow-up operation ng imbestigador, isang lifeguard ng hotel ang nagsauli ng Eco Bag na naglalaman ng mga damit na mayroong dugo na pina-niniwalaang galing sa pinangyarihan ng krimen.

Sa kuha naman ng CCTV camera sa naturang resort may isang lalaki ang dumaan sa bahagi ng exit ng gusali kung saan nakasuot ito ng itim na long sleeve, naka-short at naka backpack na dumaan sa direksyon ng Bloomfield Academy.

Sa ngayon ay patuloy na sinusundan at inaalam ang pagkakakilanlan ng suspek na ayon sa mga otoridad ay patuloy na pinaghahanap.