Boracay Action Group, nagpakitang gilas sa kanilang sorpresang simulation exercise

Posted December 1, 2014

Ni Bert Dalida, YES FM Boracay

Nagpakitang gilas sa kanilang sorpresang simulation exercise ang BAG o Boracay Action Group.

Sa ginanap na Joint Flag Raising Ceremony kaninang umaga sa station 2, sinorpresa ng BAG maging ang mga dumadaang turista sa bilis ng kanilang pagresponde at pagligtas sa isang nabiktima ng pagkalunod.

Hindi rin kasi sukat akalain ng mga dumadaan doon na isang simulation exercise lamang pala ang nagaganap dahil sa mistulang totoo ang pagresponde ng BAG sa ilang pasyente kunwari ng pagkalunod.

Sa simula ng hudyat ng isang sigaw, kaagad lumusong sa tubig ang ilang rescuer upang saklolohan ang isang nalulunod umano sa dagat.

Nagmistulang pelikula naman ang sumunod na eksena nang magsidatingan din ang mga rescue boat ng BAG habang alistong nakaantabay sa beach ang mga magbibigay ng first aid.

Samantala, kaagad dumating ang isang ambulansya sa lugar upang kumpletuhin ang nasabing simulation execercise na natapos sa loob lamang ng halos 15 minuto.

Nagpalakpakan naman ang mga turistang nanonood dahil sa ipinamalas na galing ng Boracay Action Group.