Mga illegal vendors at commissioners sa vegetation area ng Boracay, tutuluyan na sa Lunes

Posted February 10, 2015

Ni Bert Dalida, YES FM Boracay

“Walang samaan ng loob!”

Ito ang mensahe ni Barangay Balabag Captain Lilibeth Sacapaño sa mga illegal vendors at commissioners sa Boracay, partikular sa Barangay Balabag.

Ayon kasi kay ‘Kap Lilibeth’ Sacapaño, tuloy na tuloy na sa Lunes o sa February 16 ang kanilang operasyon kaugnay sa mga illegal vendors at iba pang may mga illegal na aktibidad sa vegetation area ng Boracay.

Base sa Municipal Ordinance No. 181, S. 2002, ang mga vendors, masahista, maging ang mga manikuristang accredited ng MABOVEN o Malay-Boracay Vendors, Peddlers, Ambulant Masseurs and Manicurists Association lamang ang pinahihintulutang mag-market ng kanilang produkto o serbisyo.

Maliban dito, pinahihintulutan din ang mga vendors at kahalintulad na frontliners kapag merun silang mayor’s permit at lisensya.

Subali’t nabatid na marami paring illegal vendors at commissioners ang malayang nagtitinda at nang-aalok ng island activities sa vegetation area, at maging sa beach mismo.

Ayon pa kay Kap Lilibeth’, matagal na rin umano itong ordinansa ng Malay kung kaya’t umapela din ito na makipagtulungan para sa ikabubuti ng isla.

Samantala, base sa ordinansa, dapat naka ID at suot ng mga ito ang unipormeng ipinag-utos ng office of the mayor bago sila pahintulutan sa vegetation area.

Nabatid na marami na ring mga turista sa isla ang nagreklamo sa DOT o Department of Tourism Boracay-Sub-Office, Boracay PNP Station at maging sa LGU Malay dahil sa pananamantala ng mga illegal na vendors at commissioners sa Boracay dahilan upang maghigpit ang lokal na pamahalaan ng Malay.