Dahil sa aso, lalaki pinagtulungang bugbugin ng grupo ng kalalakihan

Posted November 3, 2015

Ni Inna Carol L. Zambrona, YES FM Boracay

Pasa at sugat ang tinamo ng isang lalaki matapos pagtulungan bugbugin ng walong kalalakihan sa Brgy. Yapak Boracay kagabi dahil lamang sa aso.

Sa blotter report ng Boracay PNP, nakilala ang biktimang si Johnny Adegue, 25-anyos ng Sibuyan Romblon at temporaryong nakatira sa nasabing Brgy.

Sa imbistigasyon ng mga pulis, pauwi na umano ang biktima sa kanyang tinitirahan ng makasalubong ang isang aso na panay ang tahol sa kanya.

Dahil umano sa takot na baka kagatin siya nito ay mabilis siyang kumuha ng bato at ibinato sa aso ngunit hindi niya ito natamaan at sa halip ay tumama ito sa isang bahay kung saan mayroong nag-iinuman.

Dito na umano lumabas ang mga suspek at isang mainit na argumento ang namagitan sa kanila kung saan agad siyang pinagtulungang bugbugin ng sinasabing walong kalalakihan.

Samantala, nagpapatuloy naman ang imbistigasyon ng Boracay PNP hinggil sa nasabing insidente habang ang biktima ay nagpapagaling sa isang pagamutan sa Boracay.