Paghahanda sa pagdating ng MS Columbus bukas, all set na

Ni Malbert Dalida, News Director, YES FM Boracay

All set na ang paghahanda para sa pagdating ng MS Columbus bukas.

Ito ang kinumpirma ni Department of Tourism officer in charge Tim Ticar, matapos ang kanilang penal na pagpupulong kahapon, kaugnay sa pagdating ng nasabing  barko.

Base sa kanilang napagkasunduan, sinabi ni Ticar na ang mga taga Philippine Coastguard at Navy ang in charge para sa seguridad ng barko, habang ang mga taga BTAC o Boracay Tourist Assistance Center ang nakatoka para sa mga bababang pasahero nito.

Maghihintay naman sa Cagban port ang mga Ati-atihan dancers ng pamahalaang probinsya, habang nakahanda na rin ang mga Leis na isasabit ng mga taga LGU Malay.

Ang mga taga DOT o Department of Tourism naman, ay naghanda rin umano ng mga streamers na ilalagay sa nasabing pantalan.

Ang pangkalahatang paghahanda ayon pa kay Ticar ay iniatang na sa port administrator, habang ang pagsundo’t-hatid naman sa mga pasahero sa Cagban ay sa isang transport service na ipinagkatiwala.

Inaasahang darating bukas ng alas-12 ng tanghali ang MS Columbus, na may tinatayang 500 pasahero at 300 crews. #022013

PCG Aklan, may bagong hepe na: Lt. Cmdr. Alsosa, nag-goodbye na!

Sumakalibang probinsiya na si PCG Lt. Commander Terrence Alsosa.

Kasabay nito may bagong hepe na rin ngayon ang Philippine Coast Guard o PCG sa Aklan, Caticlan at Boracay kapalit ni Alsosa.

Epektibo nitong Lunes, ika-5 ng Pebrero ng taong ito, pormal nang umupo sa binakanteng upuan ni Alsosa ang 33-anyos na si Lt. Cmdr. Jimmy Oliver Vingno.

Sa panayam dito nitong umaga, nabatid mula kay Vingno na tila swap ang nagyari sa kanila ni Alsosa, dahil ang dating hepe ng PCG sa Aklan at Caticlan ay siyang ipinalit din doon sa pinagmulan niyang probinsiya, at iyon ay sa Roxas City sa probinsiya Capiz.

Aniya, ang pagkakalipat sa kanila ay dala na rin ng haba ng panahon na panunungkulan sa Aklan ni Alsosa na umabot na rin sa tatlong taon, kaya ipinatupad umano ang “rotation policy” sa kanila.

Dagdag pa dito, dahil sa ang Boracay umano ay isang sikat na Tourist Destination, isang malaking hamon para sa kaniya ang pamunuan ang PCG dito maliban pa sa sakop na rin ng kaniyang hurisdiksiyaon ang buong probinsiya ng Aklan.

Bunsod nito, implementasyon at regulasyon sa mga bangka upang masiguro aniya ang kaligatasan ng publikong pasahero ang kaniyang pangunahing pagmamalasakitan.

Samantala, dahil sa tatlong araw pa lang ito sa kaniyang pwesto ngayon, nakatakda na rin umano ang kaniyang gagawing pagkurtesiya sa mga opisyales ng bayang ito.

Kahapon naman sa State of the Province Address o SOPA ni Aklan Governor Carlito Marquez, unang nakilala ng ilang matataas na opisyal ng probinsiya si Vingno. #ecm022013

BIHA, problemado na sa bagal ng serbisyo ng MARINA

Namomoblema ngayon ang kooperatiba ng mga bangkang pang-island hopping sa Boracay.

Ito ang isiniwalat ni Sangguniang Bayan Member Jupiter Gallenero, Chairman ng Committee on Cooperative, sa sesyon ng SB Malay kahapon.

Aniya, ang Boracay Island Hopping Association o BIHA umano ay namomoblema na sa ngayon at umaapela ng tulong.

Sapagkat ang mga dokumento umano ng bangka ng mga ito para sa kanilang operasyon na nire-renew pa lang ay nasa Marina pa rin hanggang sa ngayon.

Kaya naman umaalma na ang mga bangka operator na ito sa tagal ng proseso ng kanilang mga dokumento.

Lalo na at masigasig na rin umano ang Philippine Coast Guard o PCG sa Boracay sa operasyon nila, na hulihin ang mga bangka na wala pang kaukulang dokumento para sa taong ito. #ecm012013

Bilang ng naputukan sa Aklan, bumaba; Pagsalubong sa Bagong Taon sa Boracay, naging mapayapa

Ni Christy Dela Torre, YES FM Boracay

Sa pagdiriwang ng Bagong Taon sa probinsya ng Aklan, apat lamang ang naitalang naputukan ng iba’t-ibang firecrackers ngayong taon kumpara nang nakaraang taon.

Base sa listahan ng Aklan Provincial Hospital, umabot sa 13 katao ang bilang ng naputukan sa probinsya noong nakaraang taon ng 2012.

Ayon kay Dr. Cornelio Cuatchon, Chief of Hospital ng Aklan Provincial Hospital, ito ay isang patunay umano na umiiwas na nga ang mga Aklanon sa mga paputok.

Dagdag pa niya, mas minabuti na lamang umano ng mga tao na gumamit ng mga pampa-ingay tulad ng torotot sa pagsalubong ng Bagong Taon.

Samantala, nakauwi na rin naman sa kanya-kanyang mga bahay ang mga biktima pagkatapos gamutin sa ospital.

Ngunit isa namang biktima ang naitalang tinamaan ng stray bullet, na agad namang naisugod sa ospital ang biktima at nabigyan ng lunas.

Samantala, dito naman sa isla ng Boracay, ay naging maayos naman ang pagsalubong sa Bagong Taon.

Nakabantay sa buong magdamag ang Philippine Coast Guard, Boracay Police at maging ang Red Cross Unit ay naka-antabay rin.

Ito ay para mapanatili ang kaayusan sa ginanap na fireworks display sa Boracay at kaligtasan ng lahat ng sumaksi na halos ika-puno ng beachfront.

Hanggang ngayon ay patuloy pa rin ang ginagawang pagsusubaybay ng mga ahensya ng gobyerno na may kinalaman sa pagdiriwang ng Bagong taon partikular sa isla ng Boracay.

Kung saan karaniwan nang dinarayo ng mga turista lalo na pagsapit ng Kapaskuhan at Bagong taon.

WEATHER UPDATE: Boracay, pasok na sa storm signal number 2; RE: Bagyong Pablo

Bandang alas-singko y media ng hapon ay nagpahayag na ang Philippine Coast Guard (PCG) Caticlan na nasa storm signal number 2 na ang Aklan kasama na ang isla ng Boracay.

Dahil dito, ipinababatid ng PCG Caticlan sa publiko na hindi na pinapayagan ang paglalayag ng anumang motorized water vehicle, lalo na ang mga bangka, na pumalaot upang makaiwas sa sakuna.

Nangangahulugan na kanselado pa rin ang biyahe ng mga bangka at cargo vessels hanggang sa muling advisory ng PCG Caticlan.

Biyahe ng bangka bukas, posibleng ibalik depende sa panahon

Dahil nasa storm warning signal # 1 pa rin ang Aklan, ipapatupad parin ng Philippine Coast Guard o PCG Caticlan ang “sun rise to sunset” sa biyahe ng bangka.

Kung kaya’t nitong hapon ay kinansela ulit ang biyahe ng lahat ng pampasahero at pang cargoes na bangka naging ang fast craft na may rutang Caticlan-Boracay.

Subalit nabatid mula sa PCG Caticlan na bukas ng umaga kapag maayos parin ang lagay ng panahon kahit nasa signal number parin ang buong probinsiya, may posibilidad na ibabalik nanaman ang biyahe ng bangka.

Samantala, hanggang sa kasalukuyan ay kanselado parin ang biyahe ng barkong pan-RORO papuntang Roxas, Oriental Mindoro.

Matatandaang nitong alas singko ng hapon, sa kalatas na ipinalabas ng pamunuan Caticlan Jetty Port muling sinuspende  ang biyahe ng bangka. #ecm122012

Mahigit isang daang pasahero, na-stranded pa rin sa Caticlan Jetty Port

Sa kabila ng maagang advisory na ipinalabas ng PAGASA at pa-abiso ng Caticlan Jetty Port ng itigil ang biyahe ng bangka kahapon dahil sa bagyong Pablo, hindi pa rin naiwasang mayroong mga na-stranded sa Jetty Port kagabi at doon na inumaga sa holding area.

Nabatid mula kay Lt. Comdr Terence Alsosa, Station Commander ng Philippine Coast Guard Caticlan, na nakapagtala parin ng isang daan at anim na put anim na pasahero ang na-stranded papuntang Boracay.

Pero nitong umaga ay naisakay na rin lahat sa bangka patawid ng isla.

Samantala, 18 naman ang pasahero na hindi nakatawid papuntang Roxas Oriental Mindoro dahil simula kahapon hanggang ngayon araw ay kanselado parin ang biyahe ng RORO.

Naniniwala si Alsosa na ang 18 na ito ay possible umanong kinulang sa impormasyon kaugnay sa bagyo kaya dumiritso parin sa Jetty Port.

Samantala, maliit lamang ang bilang ng na stranded na pasahero ng RORO, dahil kahapon palang umano ng hapon ay pinabalik na ang mga RORO bus kung saan lulan ang mga pasahero papuntang Roxas Mindoro. #ecm122012

Biyahe ng bangka, balik na, pero maaaring makansela anumang oras --- Coast Guard

Balik biyahe na ang mga pampasaherong bangka na may rutang Caticlan-Boracay epektibo ngayong 5:45 ng umaga.

Ito ay makaraang kanselahin ang biyahe ng bangka bandang alas-5:30 ng hapon kahapon, matapos sa isinailalim sa Storm Signal #1 ang probinsiya ng Aklan kasama na ang isla ng Boracay.

Dahil dito, sunrise to sunset na biyahe ng bangka ang ipinatupad sa Boracay alinsunod sa kautusan ng Philippine Coast Guard.

Ayon kay Lt. Cmdr. Terence Alsosa, Station Commander ng PCG Caticlan, ibinalik ang biyahe ng bangla ngayong araw sa kabila ng storm signal number 1.

Ito ay dahil nakita nilang maayos pa naman ang panahon dito at hindi pa ganoon kalakas ang galaw ng dagat.

Subalit kapag tumaas na umano sa signal number 2 kahit ganito parin ang panahon ay awtomatikong ikakansela nanaman nila ang beyahe sa lahat na sasakyang pandagat na ito.

Dagdag pa nito, ano mang oras ngayon araw ay pwede nilang makansela ulit ang biyahe depende sa takbo ng panahon.

Nabatid din mula kay Alsosa na hanggang sa ngayon ay kanselado parin ang operasyon ng Sea Sports activity sa Boracay, dahil hindi muna nila ito pinayagan ng Coast Guard dala ng bagyong Pablo, at para sa kaligtasan umano ng lahat.

Samantala, nilinaw nito na hindi naman ipinagbabawal ang paliligo sa beach ngayong araw dahil tiwala ito na may mga nakabantay naman life guard, na kapag sumama umano ang panahon ay maaaring paalalahanan nalang ang mga naliligo sa beach.

Paliwanag ng opisyal, wala kasing lokal na ordinansa na nagbabawal maligo sa beach kapag may parating na bagyo. #ecm122012

Sea sports at biyahe ng bangka sa Boracay, itinigil na dahil kay “Pablo”

Epektibo ngayong alas 5:30 ng hapon, ika-3 ng Disyembre, kanselado na ang biyahe ng mga bangka na may rutang Caticlan-Boracay.

Ito ay sa kabila ng maaliwalas na panahon na nararanasan dito, pero isinailim na Storm signal # 1 ng PAGASA ang Aklan kasama na ang Boracay dahil sa papalapit na bagyong “Pablo”.

Kasunod nito, nagkasundo na ang lokal na pamahalaan ng Malay, probinsiya at maging ang Philippine Coast Guard sa Caticlan na itigil muna pansamatala ang biyahe ng bangka para masiguro ang kaligtasan ng lahat.

Sa opisyal na kalatas na ipinalabas ng Caticlan Jetty Port Public Information Officer Marce Bernabe, simula alas singko y medya ngayon hapaon ay wala ng biyehe ang lahat ng bangka at maging ang fast craft.

Nilinaw din nitong wala na ring biyahe mga barkong pang-RORO simula nitong hapon.

Samantala, sa bahagi naman ng Coast Guard, ipinatigil na rin ang kawaning ito ang iba’t ibang sea sports sa Boracay para maiwasan ang sakuna. #ecm122012

Mahigit 600 na pasahero, stranded sa Caticlan; 2 bangka tumaob dahil sa bagyong Ofel

Siksikan at stranded ang mga pasaherong tinatayang nasa animnaraan ngayong umaga sa Caticlan Jetty port sa kasagsagan ng Signal number 2 ng Bagyong Ofel.

Sa anim na daang pasahero, humigit kumulang dalawang daan dito ay pasahero ng Roll-on-Roll-Off (RORO).

Sa panayam kay Jetty Port Administrator Nieven Maquirang ng himpilang ito, simula pa ng alas-kwatro ng hapon kahapon nang idineklarang kanselado ang biyahe patawid ng Boracay kasama sa inilabas na utos ng Philippine Coast Guard Caticlan Detachment ay dumami ang na stranded hanggang ngayong umaga.

Sa lakas naman ng alon buong magdamag, tumaob at nasira ang pampasaherong bankang “Michael “2 at isang cargo banca habang ang mga ito ay naka-angkla sa Jetty Port mag a-alas-singko nitong umaga.

Inaasahann naman ngayong umaga na posibleng dumaan ng Boracay ang bagyong Ofel na may lakas na 65 kph bago ito lumabas kanlurang bahagi ng Mindoro. #acpsr102012

Pagdating ng barkong Legend of the Seas sa Boracay, lalong pinaghandaan

Malbert Dalida, News Director, YES! FM Boracay

Mahigit isang linggo na lang at darating na sa Boracay ang Legend of the Seas ng Royal Caribbean Cruise Ltd.

Kung kaya naman ibayong paghahanda ang pinag-usapan ng mga taga pamahalaang probinsyal at lokal na pamahalaan ng Malay.

Ayon kay Jetty Port Administrator Nieven Maquirang, nasa ikatlong pagkakataon na ang nasabing pagpupulong na ginanap sa isang resort sa station 3, Boracay.

Ilan sa mga umano’y pinag-uusapan doon ay ang tungkol sa island hopping activities para sa humigit-kumulang dalawang libong pasahero ng nasabing barko.

Sa pagdating kasi ng Legend of the Seas sa ika a-bente siyete ng buwan at taong kasalukuyan ay inaasahang malakas ang hangin at alon dahil sa hanging amihan.

Kung kaya’t ang mga bangkang maliliit para sa pag-island hopping ay hindi muna puwedeng gamitin para sa nasabing aktibidad.

Naisingit din sa nasabing pagpupulong ang tungkol sa paghahanda tungkol sa tsunami alert.

Subali’t nilinaw naman ni Maquirang na para lamang ito sa nasabing aktibidad at hindi pa kumprihensibo, kung kaya’t kailangan pa itong paplantsahin.

Presente sa mga dumalo sa pagpupulong kanina ay ang tatlong barangay kapitan sa isla, si mismong Boracay Island Administrator Glenn Sacapano, Philippine Coast Guard at Marina. 

Imbestigasyon sa tumaob na bangkang sinakyan ng mga Taiwanese National, hindi pa tapos

Hindi pa naiisasara ng Philippine Coastguard sa Caticlan ang kanilang imbestigasyon kaugnay sa tumaob na bangkang pang-island Hopping nitong nagdaang Miyekules, kung saan lulan ang 31 katao na kinabibilangan ng mga turista, tour guide at tripulante.

Noong Sabado, sinabi ni Chief Petty Officer Ronie Hiponia, OIC Station Commander ng PCG-Caticlan, hindi pa nila nakukunan ng statement ang tour guide ng mga Taiwanese national na kasama sa tumaob na bangka kung ano talaga ang nangyari.

Gayon pa man, nangako ito na sa oras na matapos ang kanilang imbestigayon at kung ano man ang resulta, nasa kamay na umano ng Regional Office ng Coast Guard ang pagpataw ng karampatang penalidad sa operator ng bangka.

Sa ngayon, tila wala pa naman umanong natatanggap na reklamo ang PCG mula sa mga biktima na pinabayaan sila ng may-ari ng nasabing sasakyang pandagat dahil sa pagkakaalam aniya nito ay binalikat naman ng operator ang gastos ng mga biktima.

Samantala, dahil sa nakumpirmang tatlong insidente agad ang naitala sa loob lamang ng 24 oras sa araw mismong iyon, kabilang na ang paglubog ng bangka sa Tabon Port ng madaling araw na iyon, pagkalunod ng mga estudyante sa front beach, tatlo ang binawian ng buhay at insidente ng pagtaob ng bangkang sinasakyan ng Taiwanesse National pagkahapon, agad naman umanong nagpatawag ng Emergency Meeting ang Punong Ehekutibo para maaksiyunan at mapagplanuhan ang mga bagay, upang hindi na maulit pa ang pangayayari. | ecm102012