Flying fish activities sa isla ng Boracay paiimbestigahan-SB Graf

Posted July 5, 2016  

Ni Jay-ar M. Arante, YES FM Boracay      

Dahil sa sunod-sunod na insidente sa Flying Fish activities sa isla ng Boracay paiimbestigahan umano ito ng Sangguniang Bayan ng Malay.

Ayon kay SB member Nenette Aguirre Graf, sa pagbubukas umano ng sesyon ng Malay ay tatalakayin nila ito at paiimbestigahan dahil sadya na umano itong nakakabahala.

Ang naturang aktibidad umanong ito ay delikado na dahil sa madami na ang naging biktima kung saan ilan sa mga ito ay nawawalan pa umano ng memorya sa loob ng dalawang araw at ang iba naman ay nagtamo ng dislocation sa paa, balikat at braso.

Nabatid na nais ni Graf na matigil na aktibidad na ito upang maiwasan ang mga insidente kabilang na ang iba pang mga aktibidad sa isla na sadyang dilikado sa mga turista.

Matatandaang hiniling rin ng BFRAV ng Boracay Action Group sa LGU Malay na e-regulate ang aktibidad na ito dahil sa sunod-sunod nga na insidente.