Boracay Filipino Chinese Association, handang tumulong sa problemang Waste Water sa Boracay

Posted April 2, 2018

Ni Inna Carol L. Zambrona, YES THE BEST Boracay

Handa umanong tumulong ang Boracay Filipino Chinese Association partikular sa pangunahing problemang ng isla ng Boracay, ang drainage system at waste water management.

Ito ang pahayag ni Thomas Santiago, Presidente ng Boracay Filipino Chinese Association sa ginawang press conference ng kanilang grupo kaugnay sa planong rehabilitasyon at paghahanap ng solusyon para maisaayos ang isla.

Ani Santiago, may ilang inisyatibo at paraan na sila para makatulong na hindi ipasara ang Boracay katulad aniya ng paggamit ng teknolohiya para madaling malinis ang tubig at pwede umano nila itong ipanukala.

Nagbigay na umano ng proposal ang kanilang grupo sa LGU Malay kung saan nakapaloob dito ang technology na makakatulong sa water treatment ng Boracay.

Samantala, nagdulot na umano ng pagkalito sa mga turista at investors ang usaping “total closure” dahil hindi pa nila tiyak kung hanggang  sakaling mangyayari ito.

Aniya, apektado na kasi ang ibang flights na papunta ng Boracay halimbawa umano dito ang mga turistang Taiwanese na nagkansela na ng biyahe ngayong buwan.

Dagdag pa nito hindi kailangan magdeklara ng “total closure” sa Boracay dahil maraming maaapektuhan kung ipapasara ito lalo na ang kanilang tour guide association.

Apela nito sa National Government na huwag basta-bastang isara ang Boracay na siyang tourist destination ng marami lalo na ng mga turistang Chinese na siyang may pinakamataas na bilang na bumibisita sa isla.