PHO-Aklan at Department of Health, nagkaisa sa total ban sa paputok

Posted December 21, 2016

Ni Inna Carol L. Zambrona, YES FM Boracay

Nagkaisa ngayon ang Provincial Health Office (PHO-Aklan) at Department of Health (DOH) sa pagpapatupad ng total ban sa mga paputok ngayong kapaskuhan at pagsalubong ng bagong taon.

Ito ang sinabi ni Aklan Provincial Health Officer 2 Dr. Cornelio Cuachon Jr. sa isinagawang pagpupulong ng Provincial Health Office (PHO-Aklan) kaugnay sa Iwas Paputok Campaign.

Puspusan ang kampanya ng kagawaran sa pag-iwas sa paputok at sa halip ay hinihikayat ang kumunidad na maglaan na lamang ng designated area parasa fireworks display.

Sa datos ng DOH, lumalabas na madalas na biktima ngpaputok ay ang mga kabataan na nasa edad 15-anyos pababa.

Nabatid na nagsagawa ng motorcade ang kanilang opisina kabilang ang ibat-ibang representante ng MDRRMO sa probinsya at mga concern agencies nitong 13 ng Disyembre.

Kasabay nito, muling hinikayat ni Cuachon ang publiko na gumamit nalang ng mga alternatibong pampaingay sa pagsalubong sa bagong taon.