Aklanon na hinirang bilang MVP sa UAAP Men’s Volleyball, paparangalan ng SP Aklan

Posted April 3, 2014 as of 12:00nn

Ni Gloria Villas, YES FM Boracay

Labis na ikinatuwa ng Aklan Provincial Government ang pagkahirang bilang Most Valuable Player (MVP) sa isang atletang Aklanon sa katatapos na UAAP Season 76 Men’s Volleyball tournament.

Kaugnay nito isang resolusyon ang inihain sa 12^th Regular Session ng Sangguniang Panlalawigan (SP) Aklan na inisponsor ng lahat ng myembro ng konseho upang bigyang parangal si Reuben Nemis Inaudito.

Si Inaudito ay myembro ng National University (NU) Bulldogs kung saan dinomina ang laban sa UAAP Season 76 Men’s Volleyball tournament na napanatili ang korona bilang kampeon.

Samantala, nabatid na humataw ang NU sa finals laban sa Ateneo de Manila University gamit ang 25-22, 21-25, 25-23, 27-25 na panalo sa pagtatapos ng Season 76th UAAP men’s volleyball noong March 5, 2014 sa Smart Araneta Coliseum.

Kabilang sa mga mahigpit na nakalaban ng NU Team Skipper Reuben Inaudito ang Rookie-MVP ng Ateneo na si Marck Espejo.

Napag-alaman na si Inaudito ay tubong Numancia Aklan at naging varsity sa volleyball sa National University.

Samantala ang University Athletic Association of the Philippines (UAAP) volleyball tournament ay ginaganap tuwing second semester ng pasukan at sinimulan noong 1938.