Boracay Sto. Niño Ati- Atihan 2017, kasado na

Posted January 6, 2017

Ni Danita Jean A. Pelayo, YES FM Boracay

Plantsado na ang mga aktibidad para sa Boracay Ati- Atihan simula sa Enero 7 hanggang 8 ngayong taon.

Magsisimula ang selebrasyon sa sabado na magkakaroon ng  pagsundo sa imahen ng Sto.Niño sa tanghali at sa gabi naman ay ang Kabataan’s  Night kabilang ang Opening Salvo at Hip Hop Dance Competition.

Dagdag pa rito, may mga special guest pa umano na darating katulad na lamang ni Abra at Andrew E. habang ang Salbakuta naman ay magpeperform sa araw ng Linggo.

Kaugnay nito sa araw naman ng Linggo ay magaganap ang 2017 Boracay Sto. Niño Ati-Atihan kung saan isang Motorcade at Fluvial Parade ang sisimulan ng alas- kwatro ng umaga simula sa Cagban papuntang Boracay Rock at pabalik sa Balabag Plaza na susundan ng isang misa at Tribal Street Dancing Competition na lalahukan ng iba’t – ibang mga tribo kung saan susundan ito ng prosisyon sa hapon at awarding night.

Maliban dito, magkakaroon naman ng misa sa Enero 8,araw ng Linggo sa ganap na alas- sais y medya ng umaga sa Holy Rosary Parish, habang alas- syete y medya  naman ang High Mass sa Balabag Plaza na susundan ng Tribal Street Dancing Competition.

Nabatid na sa Procession of Sto. Niño Image na gaganapin ng alas-5:30 ng hapon, gagamitin umano ang main road para dito at magkakaroon ng short mass.

Ang Boracay Ati-Atihan ay taunang ginagawa sa isla bilang selebrasyon sa kapistahan ni Sr. Sto Niño na ginanap sa unang linggo ng Enero.