Pagiging regular entry at exit point ng Tabon at Tambisaan Port sa tuwing panahon ng Habagat, muling pinag-usapan sa SP Aklan

Posted October 31, 2014

Ni Gloria Villas, YES FM Boracay

Muling pinag-usapan sa Sangguniang Panlalawigan (SP) Aklan ang pagiging regular entry at exit point ng Tabon at Tambisaan Port sa tuwing panahon ng Habagat.

Sa ginanap na SP Regular Session, tinalakay ang endorsement letter ni Jetty Port Administrator Niven Maquirang kaugnay sa ipinasang Resolution No. 073 ng SB Malay.

Napag-alamang matapos ang isinagawang pag-aaral ng SB Malay sa resolusyong ini-akda ni SB Member Floribar Bautista ay ipapatupad na ang nasabing alituntunin kung sasangayon din dito ang pamahalaang probinsyal.

Nabatid sa nakaraang SB Session na kailangan munang ayusin ang problema sa traffic ng mga bangka sa nasabing pantalan bago ito ipatupad.

Dapat din umanong maging handa ang Tambisaan Port sakaling ito’y maipatupad na, dahil sa maliit lamang ang terminal area nito at masikip ang daungan.

Samantala, layunin naman ng nasabing resolusyon na  maiwasan ang pagkalito ng mga pasahero sa schedule ng mga byahe ng bangka sa tuwing panahon ng Habagat.

Sa ngayon ay masusi muna itong pinag-aaralan ng SP Aklan.