Malay PNP may lead na suspek sa pagpaslang sa dispatcher ng CBTMPC

Posted March 20, 2014

Ni Jay-ar M. Arante, YES FM Boracay

May lead na ang Malay PNP sa suspek sa pagpaslang sa dispatcher ng CBTMPC nitong Marso a-otso sa baranggay Caticlan Malay, Aklan.

Ayon kay SPO1 Ben Estuya ng Malay Police Station Office, patuloy umano ang kanilang ginagawang pag-iimbistiga sa nangyaring krimen kung saan malapit na rin nilang matukoy ang tutuong pagkakakilanlan ng suspek.

Bagamat hindi pa nila ito pinangalanan sinisiguro naman nilang mareresolba ang nangyaring krimen.

Kinilala ang biktimang si Dandy Teodosio, 37 anyos, tubong Cortes, Balete, Aklan at residente ng San Jose, Romblon.

Base sa imbistigasyon ng kapulisan, nakipag-inuman ang biktima sa mga kasama niyang drayber bago nangyari ang insidente.

Subali’t natagpuan na lamang umano ito sa loob mismo ng kanilang terminal na duguan at may tatlong saksak sa kaliwang dibdib, nguni’t wala nang buhay.

Dahil dito, mas pinaigting pa ngayon ng Malay PNP ang kanilang 24 hour police visibility sa baranggay Caticlan lalo na sa cargo area kung saan maraming mga nag-iinuman at mga tambay na nagpapalipas ng kanilang oras.

Sa ngayon patuloy paring sumisigaw ng hustisya ang pamilya ng biktima para sa pagkamatay ni Teodosio.