Club DJ at Therapist sa Boracay, timbog sa magkahiwalay na buy-bust operation

Posted March 26, 2014

Ni Bert Dalida YES FM Boracay

Maaaring hindi na muli makapagpatugtog sa bar ang isang Club DJ sa Boracay, matapos umano itong mahulihan ng marijuana.

Sa isang buy bust operation na ikinasa ng pinagsanib na pwersa ng BTAC o Boracay Assistance Center at PIBO o Provincial Intelligence Branch Operatives, naaresto dakung alas 3: 30 kaninang madaling araw sa Sitio Bolabog, Balabag Boracay ang Club DJ o Disc Jockey na si Michael David Collantes, 39 anyos ng Las Pinas, Metro Manila.

 Nakuha mula sa suspek ang tinatayang 1.2 kilo ng pinatuyong dahon ng marijuana.

Nabatid na hindi na maaaring makapagpiyansa ang suspek, dahil sa laki ng value o halaga ng drogang nakuha sa kanya.

Samantala, bago nito, natimbog din kaninang hatinggabi ng mga operatiba ang isang therapist sa Sitio Bantud Manoc-manoc, Boracay.

Narekober mula sa suspek na si Soledad Natural, 56 anyos ng España, Manila at kasalukuyang residente ng Manoc-manoc, Boracay ang 9 na sachet ng suspected shabu.

Ikinostodiya naman ng Boracay PNP ang mga suspek dahil sa paglabag sa Republic Act 9165, o Comprehensive Dangerous Drugs Act of 2002, para sa karampatang disposisyon.

Matatandaang nagbabala ang mga otoridad laban sa mga nagbibenta ng ilegal na droga sa isla na tigilan na ang nasabing gawain.