Kita sa pagtaas ng Teminal Fee sa Caticaln Jetty Port, paghahati-hatian

Ni Edzel Mainit, Senior Field Reporter, YES FM Boracay

Bagamat kumpirmadong isinusulong na sa ngayon ang planong pagpapataas sa singil ng Terminal Fee sa Caticlan Jetty Port mula sa pitongpu’t-limang piso hanggang ay gagawin na itong isangdaang piso, ihinayag ni Caticlan Jetty Port Administrator Nieven Maquirang na kapag naipatupad na ito ay hindi lang naman sa pamahalaang probinsiya mapupunta ang kikitain dito.

Ayon kay Maquirang, 20 porsiyento dito ay mapupunta sa lokal na pamahalaan ng Malay, sa barangay ng Manoc-manoc at Caticlan.

Napag-alaman din mula sa administrador na ang matitirang bahagi na walumpung porsiyento ay gagamitin sa pagbabayad ng 260 milyong pisong bond floation ng probinsiya.

Gayon pa man, ang pagsasabatas sa planong pagtaas sa terminal fee ay kasalukuyang nasa estado pa lang ng pagdinig ng Sangguniang Panlalawigan ng Aklan, ngunit nakapagsagawa na rin ayon dito ng public hearing.

Ang nasabing proposisyon ay bahagi na rin ng pagbabago sa isinusulong na Revenue Code ng Aklan na siyang pinagdedebatihan ng SP sa kasalukuyan.

Samantala, bagama’t 80 porsiyento ang mapupunta sa pamahalaang probinsiyal, ang matitira naman sa kanila ay mapupunta sa mga gastusin sa operasyon ng Jetty Port, katulad ng pambili ng CCTV Camera para sa Caticlan at Cagban Jetty Port, metal detector o x-ray machine para sa passenger’s terminal ng RoRo, pagpapa-unlad sa mga pasilidad ng pantalan, at ilalaan sa mga inprastrakturang ipamamahagi sa iba’t-ibang bayan sa Aklan.

Inihayag din ni Maquirang na kapag na-aprubahan ang isangdaang pisong Terminal Fee ay maaring manatili hanggang tatlong taon na nang mangyayaring pagtataas o pagdadagdag sa babayaran para sa mga turistang papasok sa Boracay.